ადამ მიცკევიჩის ქუჩა N11

info@oktravel.ge

დაბალბიუჯეტიანი ავიაკომპანია Air Manas-ი საქართველოს მიმართულებით იწყებს ოპერირებას

ყირგიზეთის რესპუბლიკის დაბალბიუჯეტიანი ავიაკომპანია Air Manas-ი საქართველოს მიმართულებით იწყებს ოპერირებას. ფრენები ბიშკეკი - ბათუმი - ბიშკეკის მიმართულებით 18 ივლისიდან დაიწყება. ამის შესახებ საქართველოს სამოქალაქო ავიაციის სააგენტო იტყობინება. უწყებაში წარდგენილი განაცხადის შესაბამისად, ავიაკომპანია მრავალჯერადი ჩარტერული რეისების განხორციელებას მიმდინარე წლის 1 ნოემბრამდე, კვირაში 1 სიხშირით (კვირა) გეგმავს.

საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს მიერ, ავიაკომპანიას მრავალჯერადი ჩარტერული საჰაერო მიმოსვლის განხორციელებისათვის აუცილებელი ნებართვა მიმდინარე წლის 17 ივნისს მიენიჭა.

"გთხოვთ გაითვალისწინოთ, რომ ეპიდემიოლოგიური მდგომარეობის შესაბამისად, სახელმწიფოების მიერ პერიოდულად იცვლება სასაზღვრო შეზღუდვები და სანიტარული მოთხოვნები, რაც ასახვას ჰპოვებს ავიაკომპანიების გადაწყვეტილებებზე ამა თუ იმ მიმართულებით საჰაერო მიმოსვლის დაწყების, გაგრძელების ან განახლების კუთხით. მოქალაქეებს მოვუწოდებთ, გამოიჩინონ სიფრთხილე მგზავრობის დაგეგმვის დროს, ყურადღებით გაეცნონ დანიშნულების ქვეყნის მიერ დაწესებულ სასაზღვრო და სანიტარულ რეგულაციებს, ავიაკომპანიების შეტყობინებებს, ოფიციალურ წყაროებზე განთავსებულ განცხადებებს და განრიგებს", - აღნიშნულია სამოქალაქო ავიაციის სააგენტოს მიერ გავრცელებულ ინფორმაციაში.

ვრცლად ნახვა
ევროკავშირი საზღვრებს ხსნის: ვის და რა პირობით შეუშვებენ შენგენის ზონაში?

ევროკავშირის საბჭომ მესამე სამყაროს ქვეყნებიდან შენგენის ზონაში შესვლის შეზღუდვის შემსუბუქების შესახებ რეკომენდაცია დაამტკიცა. მოგზაურთათვის ერთგვარი საშვი იქნება ახალი კორონავირუსის ვაქცინა, თუმცა არა ყველა მათგანი. კონკრეტულად ვის და რა პირობებით შეუშვებენ შენგენის ზონაში, ამის გარკვევას Deutsche Welle შეეცადა.

ვის მისცემენ ევროკავშირის ქვეყნებში შესვლის უფლებას და საჭიროა თუ არა აცრა?

ვინაიდან ვაქცინაცია ამცირებს არა მხოლოდ COVID-19-ით ინფიცირების, არამედ კორონავირუსით სხვების დაავადების ალბათობას, ევროკავშირსა და შენგენის ზონაში მესამე სამყაროს ქვეყნების სრულად აცრილ მოქალაქეებს შეუშვებენ. უფრო მეტიც, მათი მოგზაურობის მიზანი შეიძლება იყოს ნებისმიერი, მათ შორის – ტურისტული. სრულად აცრილი ნიშნავს, რომ ვაქცინის აუცილებელი ბოლო დოზის გაკეთებიდან, სულ ცოტა, 14 დღეა გასული. ამ ეტაპზე ევროკავშირის ქვეყნები მესამე სამყაროს ქვეყნების მოქალაქეებს უშვებენ მხოლოდ იმ შემთხვევაში, თუ ისინი ცხოვრობენ შენგენის ზონაში ან მოგზაურობისთვის საპატიო მიზეზი აქვთ. 

აცრის ძირითადი დამადასტურებელი დოკუმენტი იქნება ციფრული კოვიდ- სერტიფიკატი, ევროკავშირის „ციფრული მწვანე სერტიფიკატი“  და ასევე მათი ანალოგები მესამე სამყაროს ქვეყნებიდან. ამავდროულად, ეს დოკუმენტი ჯერ დამტკიცებული არ არის: ევროპარლამენტისა და ევროკავშირის საბჭოს წარმომადგენლები მოლაპარაკებებს განაგრძობენ. იქამდე კი შენგენის ზონის ქვეყნებს შეეძლებათ მიიღონ სხვა ქვეყნების მიერ გაცემული სერტიფიკატები, თუ მათი ავთენტურობის შემოწმება შესაძლებელია. ამიტომაც ევროკავშირმა ვაქცინაციის სერტიფიკატების ორმხრივი აღიარების შესაძლებლობა უზრუნველყო. შესაბამისად, არის მოლოდინი, რომ ევროპული დოკუმენტის მიღება მესამე ქვეყნის მოქალაქეებსაც შეეძლებათ. 

ბავშვები, რომლებიც ასაკის გამო ჯერჯერობით აცრილები არ იქნებიან, შენგენის ზონაში შესვლას ვაქცინირებულ მშობლებთან ერთად შეძლებენ. თუმცა მათ მოუწევთ წარადგინონ ბავშვის PCR ტესტის უარყოფითი პასუხი, რომელიც საზღვრის გადაკვეთამდე არა უადრეს 72 საათისა გაკეთდა. როგორც ცნობილია, ევროკავშირის ქვეყნებში ვაქცინების უმეტესობა 18 წელზე უფროსი ასაკის ადამიანებისთვის არის დაშვებული. მხოლოდ BioNTech / Pfizer-ს აქვს უფრო დაბალი ბარიერი – ამ პრეპარატით აცრა 16 წლიდან არის დაშვებული. თუმცა ამ დროისთვის ევროკავშირი განიხილავს განაცხადს, რომ აღნიშნული ვაქცინა 12-დან 15 წლამდე ბავშვებისთვის დაუშვას.

რომელი პრეპარატებით აცრილ პირებს შეუშვებენ ევროკავშირის ქვეყნებში?

დაიშვებიან ის პირები, რომლებიც ევროკავშირში რეგისტრირებული რომელიმე ვაქცინით იქნებიან აცრილი: BioNTech / Pfizer-ი, Moderna, AstraZeneca და Johnson & Johnson-ი. ეს ეხება სამხრეთკორეული წარმოების AstraZeneca-საც, რომელსაც იყენებენ, მაგალითად, უკრაინაში. 


წესით, პრობლემები არ უნდა შეექმნათ მათაც, ვინც Covishield-ითა (AstraZeneca- ს ინდური ანალოგი) და ჩინური კომპანია Sinopharm-ის მიერ წარმოებული პრეპარატით აიცრა. ეს ორივე ვაქცინა ჯანდაცვის მსოფლიო ორგანიზაციის (WHO) მიერ არის რეკომენდებული საგანგებო სიტუაციაში გამოსაყენებლად. ევროკავშირის საბჭოს გადაწყვეტილებაში აღნიშნულია, რომ ამ გაერთიანებაში შემავალ თითოეულ სახელმწიფოს ” ასევე შეუძლია” შეუშვას ის პირები, ვინც ზემოთ ხსენებული პრეპარატებით სრულად არის აცრილი.

ევროკავშირი საზღვრებს  ხსნის. რომელი ქვეყნები არიან სიაში?

შეზღუდვების შემსუბუქების მეორე ტალღა იმოქმედებს მათზე, ვინც ჯერ კიდევ არ არის აცრილი, მაგრამ ახალი კორონავირუსის გავრცელების დაბალი მაჩვენებლის მქონე  ქვეყნებში ცხოვრობს. ამ ეტაპზე იმ სახელმწიფოთა ჩამონათვალში, რომელთათვისაც შენგენის საზღვრები გახსნილია, შვიდი ქვეყანა შედის: ავსტრალია, ახალი ზელანდია, რუანდა, სინგაპური, ტაილანდი, სამხრეთ კორეა და ჩინეთი. 


თუმცა ევროკავშირის საბჭომ ამ ჩამონათვალში ქვეყნების დამატების ძირითადი კრიტერიუმი შეცვალა: ამა თუ იმ სახელმწიფოში, ბოლო 14 დღის განმავლობაში, 100 ათას მოსახლეზე 75 ახალ შემთხვევაზე მეტი არ უნდა ფიქსირდებოდეს. აქამდე ეს ბარიერი 25 ახალ შემთხვევას მოიცავდა. 

ამავდროულად, ჩამონათვალში დამატების სხვა კრიტერიუმები უცვლელი დარჩა. კერძოდ, ახალი დაავადებების რაოდენობის კლების ტენდენცია უნდა იყოს სტაბილური, ეპიდემიოლოგიური მდგომარეობის შესახებ ქვეყნის მიერ მოწოდებული მონაცემები კი – სანდო. მხედველობაში მიიღება COVID-19-ზე გაკეთებული ტესტების რაოდენობაც და დადებითი პასუხების წილი 4% -ს არ უნდა აღემატებოდეს. 

ევროკავშირის საბჭომ შეიმუშავა „ავარიული მუხრუჭის“ შესაძლებლობაც. ეს გულისხმობს შესაძლებლობას, რომ სასწრაფოდ აიკრძალოს ყველა გასვლითი რეისი იმ ქვეყნებიდან, სადაც ახალი კორონავირუსის პოტენციურად საშიში მუტაცია დაფიქსირდება. 

რატომ უნდა ევროკავშირს შენგენის ზონაში შესვლასთან დაკავშირებული შეზღუდვების შემსუბუქება? 

პირველ რიგში, ისმის კითხვა: რატომ არის ეს მხოლოდ რეკომენდაცია? შენგენის ზონაში ხომ პანდემიის შედეგად დაწესებული შეზღუდვების დაცვით თავისუფლად შეგიძლიათ გადაადგილდეთ. საქმე ისაა, რომ თითოეულ სახელმწიფოს აქვს ექსკლუზიური უფლებამოსილება თავად გადაწყვიტოს,  ვის მისცემს თავისი საზღვრის გადალახვის უფლებას. სწორედ ამიტომ, ევროკავშირის დონეზე შესაძლებელია მხოლოდ რეკომენდაციის დამტკიცება, თუმცა მას თითოეული ქვეყანა საკუთარი შეხედულებისამებრ გამოიყენებს. მაგალითად, საბერძნეთმა მაისის შუა რიცხვებში მთელი რიგი ქვეყნის ტურისტებისთვის საზღვრები გახსნა. ამასთანავე, რადგან ევროკავშირის საბჭო ნაციონალური მთავრობების წარმომადგენლებისგან შედგება, მის რეკომენდაციებს უმეტესწილად ითვალისწინებენ. 

ეს გადაწყვეტილება შენგენის ზონასა და მასთან დაკავშირებულ ქვეყნებზე ვრცელდება. საუბარია ევროკავშირის 25 ქვეყანაზე, ირლანდიისა (რომელიც შენგენის ზონაში არ შედის) და დანიის გარდა. თუმცა, მათაც შეუძლიათ გადაწყვიტონ, რომ ეს რეკომენდაცია მათზეც გავრცელდება. აღნიშნული რეკომენდაცია მოიცავს ისლანდიას, ლიხტენშტაინს, ნორვეგიასა და შვეიცარიას, რომლებიც არ არიან ევროკავშირის წევრები, მაგრამ შენგენის ზონაში შედიან. 

წყარო: ImediNews.ge

ვრცლად ნახვა
3 ივნისიდან Aegean Airlines-ი ათენი-თბილისი-ათენის მიმართულებაზე რეგულარული რეისებით ბრუნდება

საბერძნეთის უმსხვილესი ავიაკომპანია Aegean Airlines-ი საქართველოს ავიაბაზარს რეგულარული რეისებით უბრუნდება.

როგორც თბილისისა და ბათუმის საერთაშორისო აეროპორტების ოპერატორ კომპანია TAV Georgia-ში აცხადებენ, ავიაკომპანია ათენი-თბილისი-ათენის საჰაერო ხაზზე რეგულარულ რეისებს 3 ივნისიდან შეუდგება და კვირაში 3 სიხშირით მოახდენს ოპერირებას.

არსებული განრიგის მიხედვით Aegean Airlines-ი ​ ათენსა და თბილისს შორის​ ფრენებს ყოველ ოთხშაბათს, პარასკევს და კვირას შეასრულებს. 

ვრცლად ნახვა
ავიაკომპანია FLY ARISTAN-მა ქუთაისის აეროპორტიდან რეგულარული ფრენები დაიწყო

გაცნობებთ, რომ 2021 წლის 02 მაისიდან ავიაკომპანია FLY ARISTAN-მა დაიწყო რეგულარული ფრენების განხორციელება ქუთაისის აეროპორტიდან !!

 ფრენები სრულდება შემდეგი განრიგით:

სამშაბათი, ხუთშაბათი, პარასკევი - ნურსულთანი-ქუთაისი-ნურსულთანი

სამშაბათი, პარასკევი - აქტაუ-ქუთაისი-აქტაუ

ხუთშაბათი, კვირა - ატირაუ-ქუთაისი-ატირაუ

ვრცლად ნახვა
1-ელი თებერვლიდან ყველა მიმართულებით რეგულარული ფრენები აღდგება

1-ელი თებერვლიდან რეგულარული ფრენები ყველა მიმართულებით აღდგება. ამის შესახებ ეკონომიკისა და მდგრადი განვითარების მინისტრმა ნათია თურნავამ უწყებათაშორისი საკოორდინაციო საბჭოს სხდომის დასრულების შემდეგ განაცხადა.

მისივე ინფორმაციით, ფრენები ყველა სამედიცინო პროტოკოლის წესების დაცვით განხორციელდება.

„1-ელი თებერვლიდან ჩვენ მივიჩნიეთ შესაძლებლად, რომ გავაუქმოთ რეგულარულ ფრენებზე შეზღუდვა. ანუ დავუშვათ რეგულარული ფრენები. ეს ნიშნავს იმას, რომ ყველა ავიაკომპანია, ვინც დღემდე მოქმედებდა და მოქმედებს საქართველოში, ან თუნდაც ახალი ავიაკომპანიები, ვინც საქართველოში შემოსვლის სურვილს გამოთქვამს, შეძლებენ რეგულარული ფრენების დაგეგმვას და შესრულებას გარკვეული სიხშირეებით. რა თქმა უნდა, ეს მოხდება ყველა სამედიცინო პროტოკოლის და უსაფრთხოების წესების დაცვით. მსოფლიოში ბევრი ავიაკომპანია ამას ისედაც ახორციელებს. აქედან გამომდინარე, ჩვენ ამას ვხედავთ ისე, რომ არ იქნება რაიმე დამატებითი საფრთხის მომტანი“, - განაცხადა თურნავამ.

ვრცლად ნახვა
რამდენიმე თვიანი პაუზის შემდეგ, Air Arabia საქართველოს ავიაბაზარზე ბრუნდება

რამდენიმე თვიანი პაუზის შემდეგ, არაბული ავიაკომპანია Air Arabia საქართველოს ავიაბაზარზე ბრუნდება.

Air Arabia 23 იანვრიდან, (უკვე დამტკიცებულია განრიგი თებერვლის ჩათვლით) პირდაპირ რეისებს განაახლებს შარჯა-თბილისი-შარჯა, მიმართულებაზე. ფრენები კვირაში ერთი სიხშირით, ყოველ შაბათს შესრულდება.

“ახალი კოვიდ რეგულაციით, სავალდებულოა იქონიოთ სამოგზაურო დაზღვევა, რომლის ღირებულებაა – 29 დოლარი.

აღნიშნული რეისით ასევე შეგიძლიათ იფრინოთ ჩენაის, მუმბაის, ჯაიპურის და სხვა მიმართულებებით.

 

ვრცლად ნახვა
ქუთაისიდან ავიარეისები 12 ახალი მიმართულებით ინიშნება

Wizz Air ევროპის 12 ახალი მიმართულებით პირდაპირ ავიარეისებს ამატებს.

ფრანკფურტი (გერმანია), ჰამბურგი (გერმანია), ბადენ-ბადენი (გერმანია), ვენეცია (იტალია), ნეაპოლი (იტალია),ნიცა (საფრანგეთი), პიზა (იტალია), სტოკჰოლმი (შვედეთი), ნიურნბერგი (გერმანია), პოზნანი (პოლონეთი), ჰერაკლიონი (საბერძნეთი, კუნძული კრეტა), ტურკუ (ფინეთი) – 12 ახალი ევროპული ავიამიმართულება ქუთაისის საერთაშორისო აეროპორტიდან

ქუთაისის დავით აღმაშენებლის საერთაშორისო აეროპორტში ოპერირებას Wizz Air მეოთხე და მეხუთე ბაზირებულ AIRBUS A 320 ტიპის თანამედროვე საჰაერო ხომალდებს ამატებს. მეოთხე ბაზირებული ბორტი 2019 წლის ბოლოდან რეგულარულ ფრენებს ევროკავშირის ქვეყნების 7 მიმართულებით: პოზნანი, ჰამბურგი, ნეაპოლი, ვენეცია, პიზა, ფრანკფურტი და ბადენ-ბადენში შეასრულებს. ხოლო 2020 წლის ზაფხულიდან ქუთაისის საერთაშორისო აეროპორტს მეხუთე ბაზირებული საჰაერო ხომალდით კიდევ ევროპის 5 ახალი მიმართულება: სტოკჰოლმი, ნიურნბერგი, ტურკუ, ნიცა, ჰერაკლიონი დაემატება. საქართველოდან დღემდე არ სრულდება ფინეთსა და შვედეთში პირდაპირი რეგულარული საჰაერო მიმოსვლა.

შეთანხმებას ხელი მოაწერეს ეკონომიკისა და მდგრადი განვითარების სამინისტროს “საქართველოს აეროპორტების გაერთიანების” დირექტორმა გიორგი ჩოგოვაძემ და უნგრული დაბალბიუჯეტიან ავიაკომპანია Wizz Air -ის ლოგისტიკის დირექტორმა, ანდრაშ სებოკმა.

ეკონომიკისა და მდგრადი განვითარების სამინისტროს და Wizz Air-ს შორის რამდენიმეთვიანი მოლაპარაკებებისა და რამდენიმეწლიანი წარმატებული თანამშრომლობის შედეგად, ქუთაისის საერთაშორისო აეროპორტში მესამე ბაზირებული საჰაერო ხომალდის დაანონსებიდან უპრეცედენტოდ მოკლე ვადაში – 4 თვეში, Wizz Air ქუთაისში მეოთხე და მეხუთე თვითმფრინავსა და 12 ახალ ევროპულ მიმართულებას ამატებს. 2020 წლის ზაფხულისთვის ქუთაისის საერთაშორისო აეროპორტიდან პირდაპირი რეგულარული რეისები ევროკავშირის უკვე 19 ქვეყნის 39 მიმართულებით იქნება შესაძლებელი.

ავიაკომპანია Wizz Air-მა ქუთაისის საეთაშორისო აეროპორტიდან ოპერირება 2012 წელს დაიწყო. 2016 წლის სექტემბერში ქუთაისის საერთაშორისო აეროპორტში გაიხსნა ავიაკომპანია Wizz Air-ის პირველი ბაზა რეგიონში. 2017 წლის მაისში ქუთაისის საერთაშორისო აეროპორტს Wizz Air-ს მეორე ბაზირებული საჰაერო ხომალდი და ევროპის 5 ყველაზე მოთხოვნადი მიმართულება დაემატა. 2018 წელს Wizz Air-მა ქუთაისის საერთაშორისო აეროპორტის მგზავრთნაკადის 95 % გადაიყვანა ( 587,643 მგზავრი) და საქართველოს ავიაციის ისტორიაში პირველად, Wizz Air ბაზრის ლიდერი გახდა.

ვრცლად ნახვა
BUTA AIRWAYS თბილისის მიმართულებით რეგულარული ფრენების სიხშირეს ზრდის

აზერბაიჯანული ავიაკომპანია Buta Airways თბილისის მიმართულებით რეგულარული ფრენების სიხშირეს ზრდის. მიმდინარე წლის ზაფხულის სანავიგაციო სეზონის განმავლობაში, 15 ივნისიდან 15 სექტემბრამდე, ბაქო-თბილისი-ბაქოს საჰაერო ხაზზე ავიაკომპანია 5 სიხშირეს ამატებს. ჯამში, ბაქოდან თბილისის მიმართულებით ფრენები კვირაში 19 სიხშირით შესრულდება („Buta Airways"- 17 სიხშირე, „Azerbaijan Airlines" – 2 სიხშირე). 

ფრენები Embraer E190, Airbus A319, Airbus A320 და Boeing B757 ტიპის საჰაერო ხომალდებით შესრულდება. 

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ, ავიაკომპანიას გაზრდილი სიხშირით რეგულარული რეისების განხორციელებისათვის აუცილებელი ნებართვა 2019 წლის 13 ივნისს მიენიჭა. 

Buta Airways აზერბაიჯანული ავიაკომპანია Azerbaijan Airlines-ის სტრუქტურის ქვეშ დაფუძნებული დაბალბიუჯეტიანი ავიაგადამზიდველია, რომელმაც ფუნქციონირება და თბილისის მიმართულებით საავიაციო მიმოსვლის განხორციელება 2017 წელს დაიწყო.

ვრცლად ნახვა
137-წლიანი ლოდინის შემდეგ, ბარსელონის მერიამ საგრადა ფამილიაზე მშენებლობის ნებართვა გასცა

ბარსელონის მერიამ საგრადა ფამილიას ტაძარზე სამშენებლო სამუშაოების წარმოების ნებართვა გასცა.

მშენებლობაზე ლიცენზიის გაცემა ბარსელონის მერიისა და ტაძრის წარმომადგენლებს შორის ორწლიანი მოლაპარაკებების შემდეგ გაიცა.

საგრადა ფამილიამ მშენებლობაზე ლიცენზია 137 წლის შემდეგ მიიღო.  

2018 წლის ოქტომბერში ტაძრის წარმომადგენლები დათანხმდნენ ბარსელონის მერიისთვის 36 მლნ ევროს გადახდას ქალაქის სასარგებლოდ, იმის გამო რომ ტაძარს მშენებლობის უფლება 130 წელზე მეტ ხანს არ ეძლეოდა.

მხარეები შეთანხმდნენ, რომ ტაძარი ამ თანხას 10 წლის განმავლობაში გადაიხდის. ფინანსები ტაძრის გარშემო სატრანსპორტო ინფრასტრუქტურასა და მიმდებარე ქუჩების კეთილმოწყობას მოხმარდება.

ტაძრის მშენებლობა ცნობილი არქიტექტორის ანტონიო გაუდის პროექტის მიხედვით 1882 წელს დაიწყო.

მთელი ამ დროის განმავლობაში ტაძრის მშენებლობა დაუსრულებელი იყო. საგრადა ფამილიას მშენებლობის დამთავრება მხოლოდ 2030 წლისთვის იგეგმება.

ვრცლად ნახვა
ტურისტებისთვის საშიში, თუმცა მიმზიდველი მიმართულებები მსოფლიოში

ყველაზე საშიშ ტურისტულ მიმართულებებს შორის პირველი დედამიწის უმაღლესი მწვერვალი ევერესტია. სიმაღლის მატების პარალელურად, აქ მცირდება ჟანგბადი და ატმოსფერული წნევა, რთულდება გზა და იწყება „სიკვდილის ზონა“.

სიმაღლის დაავადებასთან ერთად, ევერესტის მთაზე სიკვდილიანობის ყველაზე გავრცელებულ მიზეზად ზვავი და მოტეხილობები სახელდება. მძიმე სტატისტიკის თანახმად კი, ჯამში 200 ადამიანია დაღუპული, თუმცა ეს რიცხვი ტურისტებისთვის, როგორც ჩანს არაფერს ნიშნავს და მძაფრი შეგრძნებებისთვის სიკვდილსაც არ უშინდებიან. 

მძაფრი შეგრძნებების გარდა, მოგზაურობის ერთ-ერთი განუყოფელი ნაწილი ფოტოგრაფიაა, სწორედ ამ მიზეზით ეწირებიან ადამიანები არკანზასის შტატში მდებარე Hawksbill-ის კლდეს. არიზონას დიდი კანიონის ეროვნულ პარკში კი, ყოველწლიურად 12 ადამიანი კვდება. მიზეზი, ხრამში გადავარდნა და სიცხით გამოწვეული ჯანმრთელობის პრობლემები სახელდება. 

გარდა მთებისა, საშიში მოგზაურობა წყალშიც შესაძლებელია, მაგალითად კოლორადოს მდინარეში, რომელიც ერთ-ერთი ყველაზე პოპულარული ტურისტული ღირსშესანიშნაობაა. ზაფხულში, ტემპერატურის მატებასთან და თოვლის დნობასთან ერთად, მდინარე იწყებს სწრაფ დინებას და რაც კი გზად ეღობება ყველაფერს ანადგურებს, ამიტომაც ღირსშესანიშნაობა საშიშ ტერიტორიად იქცევა, თუმცა არსებული მსხვერპლის მიუხედავად, არიან ადამიანები, ვინც ამას არ უშინდებიან. 

საშიშ ტურისტულ პარკად არის მიჩნეული იუტაში მდებარე ლაბირინთი, სადაც ტემპერატურა ფარენჰეიტით 110 გრადუსს აჭარბებს და იმდენად შორია, რომ სასწრაფო დახმარებაც ვერ აღწევს.თავგადასავლის მაძიებელ ტურისტებს კი არც ეს ანაღვლებთ და ლაბირინთს ყოველწლიურად 2 ათასი ადამიანი სტუმრობს. 

რაც შეეხება ფლორიდას, ეს არის ამერიკის შტატი,მსოფლიოში საუკეთესო და ულამაზესი სანაპიროებით. თუმცა აღწერაში ვერსად გაიგონებთ უსაფრთხოს, რადგან აქ ადამიანებთან ერთად ზვიგენებიც ნებივრობენ, განსაკუთრებით საშიში კი ვოლუსიას რეგიონია. 

და ბოლო კალიფორნიაა. Half Dome-ის კლდე ის ადგილია, რომლზეც ამბობენ, რომ სიცოცხლეში ერთხელ აუცილებლად უნდა ნახო, თუმცა თუკი ნახავთ თქვენ შეიძლება მოკვდეთ. ტურისტებს კი, ცხადია ფრაზის პირველი ნაწილი კარგად ესმით, ხოლო მეორეს ყურადღებას არ აქცევენ ან ეს არ აშინებთ და ამიტომაც, ტერიტორიაზე დამთვალიერებელთა რაოდენობა ყოველწლიურად იზრდება.

 

ვრცლად ნახვა
5 თვის მონაცემებით, საქართველოს აეროპორტებში მგზავრთნაკადი 19% გაიზარდა

ეკონომიკისა და მდგრადი განვითარების სამინისტროს ,,საქართველოს აეროპორტების გაერთიანების“ ინფორმაციით, 2019 წლის 5 თვის მონაცემებით, საქართველოს აეროპორტები ჯამში - 1,912,352 მგზავრს მოემსახურა, რაც 19%-ით აღემატება წინა წლის ანალოგიურ პერიოდს (2018 წელი 1,610,246 მგზავრი).

,,საქართველოს აეროპორტების გაერთიანების“ მიერ „ინტერპრესნიუსისთვის“ მოწოდებული ინფორმაციით, მაისში მგზავრთნაკადის ზრდის მაღალი მაჩვენებელი ქვეყნის სამივე საერთაშორისო აეროპორტში დაფიქსირდა. კერძოდ: თბილისის საერთაშორისო აეროპორტი მაისში 348,878 მგზავრს მოემსახურა, რაც 13% მეტია წინა წლის ანალოგიურ პერიოდთან შედარებით (2018 წელი 307,431 მგზავრი ). 5 თვის ჭრილში კი მგზავრთნაკადი 12%-ით გაიზარდა და 1,485,079 მგზავრი შეადგინა (2018 წელი 1,327,535 მგზავრი). ქუთაისის საერთაშორისო აეროპორტში მგზავრთნაკადი 2019 წლის მაისში 22%-ით გაიზარდა და 64,312 მგზავრი შეადგინა (2018 წელი 52,631 მგზავრი). რაც შეეხება 5 თვის მონაცემებს, ჯამში ქუთაისის საერთაშორისო აეროპორტი 288,626 მგზავრს მოემსახურა, რაც წინა წლის ანალოგიურ პერიოდთან შედარებით 69%-ით მეტია. (2018 წელი 171,064 მგზავრი).

ზრდის ტენდენცია ნარჩუნდება ბათუმის საერთაშორისო აეროპორტში. 2019 წლის მაისში ბათუმის ალექსანდრე ქართველის სახელობის საერთაშორისო აეროპორტით 47,491 მგზავრმა ისარგებლა. რაც 15%-ით მეტია შარშანდელ ანალოგიურ პერიოდთან შედარებით (2018 წელი 41,244 მგზავრი). 5 თვის ჭრილში, ბათუმის საერთაშორისო აეროპორტში შარშანდელ ანალოგიურ პერიოდთან შედარებით მგზავრთნაკადი 24%-ით გაიზარდა და 135,939 მგზავრი შეადგინა. (2018 წელი 109,505 მგზავრი).

რაც შეეხება ადგილობრივ აეროპორტებს, მესტიის აეროპორტი 5 თვეში 2,340 მგზავრს მოემსახურა. რაც 28% მეტია გასული წლის ანალოგიურ პერიოდთან შედარებით (2018 წელი 1,833 მგზავრი).

ამბროლაურის აეროპორტით, 2019 წლის პირველ 5 თვეს 368 მგზავრმა ისარგებლა, რაც 19%-ით მეტია გასული წლის ანალოგიურ პერიოდთან შედარებით (2018 წელი 309 მგზავრი).

ამასთან, ჯამში, 5 თვეში ადგილობრივი აეროპორტებით 2,708 მგზავრმა ისარგებლა რაც 26% აღემატება წინა წლის ანალოგიურ პერიოდში გადაყვანილი მგზავრების რაოდენობას (2018 წელი 2,142 მგზავრი).

ვრცლად ნახვა
ქუთაისის საერთაშორისო აეროპორტში ოპერირება SKY UP AIRLINES-მა დაიწყო

ქუთაისის დავით აღმაშენებლის სახელობის საერთაშორისო აეროპორტში ოპერირება უკრაინულმა დაბალბიუჯეტიანმა ავიაკომპანია SKY UP AIRLINES დაიწყო. 

პირდაპირი რეგულარული რეისები ხარკოვიდან და ოდესიდან ქუთაისის მიმართულებით და პირიქით უკვე შესრულდა. 

რეისები კვირაში ორჯერ, სამშაბათსა და პარასკევს ბოინგ 737-800 ხორციელდება. 

ეკონომიკისა და მდგრადი განვითარების სამინისტროს "საქართველოს აეროპორტების გაერთიანების“ დირექტორის გიორგი ჩოგოვაძის განცხადებით, ქუთაისის საერთაშორისო აეროპორტში კიდევ ერთი დაბალბიუჯეტიანი ავიაკომპანიის მიერ ოპერირების დაწყება სრულ თანხვედრაშია იმ სტრატეგიასთან, რასაც ქუთაისის აეროპორტის დაბალბიუჯეტიანი ავიაკომპანიების ჰაბად ქცევა ჰქვია. 

“ქუთაისის საერთაშორისო აეროპორტში კიდევ ერთი დაბალბიუჯეტიანი ავიაკომპანია შემოვიდა. 4 ივნისიდან უკრაინულმა დაბალბიუჯეტიანმა ავიაკომპანია SkyUp Airlines-მა ხარკოვისა და ოდესის მიმართულებით დაიწყო ავიარეისების შესრულება, რაც სრულ თანხვედრაშია ჩვენს სტრატეგიასთან, რომ ქუთაისი ვაქციოთ დაბალბიუჯეტიანი ავიაკომპანიების შეთავაზების ცენტრად, არამხოლოდ საქართველოს მოქალაქეებისათვის და უცხოელებისათვის, არამედ რეგიონის პოტენციალისათვის. ჩვენ გავაგრძელებთ მუშაობას იმისათვის, რომ უფრო მეტი ავიაკომპანია დავაინტერესოთ საქართველოში და კონკრეტულად ქუთაისში ოპერირების დაწყებით“, - აცხადებს გიორგი ჩოგოვაძე. 

უკრაინული დაბალბიუჯეტიანი ავიაკომპანია SKY UP 2016 წელს დაფუძნდა და ფრენების განხორციელება 2018 წლის მაისიდან ევროპის, აფრიკისა და ახლო აღმოსავლეთის მიმართულებით დაიწყო. საქართველოს ბაზარზე ავიაკომპანიამ ოპერირება 2018 წლის ზაფხულში, ჩარტერული რეისებით, ბათუმის საერთაშორისო აეროპორტიდან დაიწყო, მოგვიანებით კი რეგულარული რეისების განხორციელება თბილისის საერთაშორისო აეროპორტიდანაც დაამატა. 
 

ვრცლად ნახვა
ადგილები, სადაც ივნისში უნდა იმოგზაუროთ

ზაფხული მოგზაურობისთვის საუკეთესო დროა.

ივნისში კი ევროპაში სამოგზაუროდ ტემპერატურა იდეალურია. თუ მოგზაურობას ამ თვეში დაგეგმავთ, დიდი ალბათობი, გრძელ რიგებსა და ფრენის მაღალ ფასებს ასცდებით.

10 ადგილი ევროპაში, სადაც ივნისში უნდა იმოგზაუროთ:

იტალია - რომი

ივნისში რომში ამინდი ძალიან მზიანი და თბილია. რომი მსოფლიოს ერთ-ერთი ყველაზე დიდი ტურისტული ქალაქია, შესაბამისად ქაოტურია. ამიტომ მხოლოდ სამი ღამეა მიზანშეწონილი დასარჩენად. ივნისში 3 ვარსკვლავიანი სასტუმროს ფასი ორ ადამიანზე 60 ევროდან იწყება. ხოლო ჰოსტელის ფასი 11 ევროა.

იტალია - ფლორენცია

რომის შემდეგ ფლორენციაც ვიზიტორების კუთხით დატვირთულია. ფლორენციაში მოგზაურობისას, ტურისტებში პოპულარულია პიზა და სიენა. რაც შეეხება სასტუმროების ფასებს, ფლორენციაში რომთან შედარებით ძვირია, თუმცა ვენეციაზე იაფი. ივნისში 3 ვარსკვლავიანი სასტუმროს ფასი ორ ადამიანზე 71 ევროდან იწყება. ხოლო ჰოსტელის ფასი 13 ევროა.

იტალია - ვენეცია

სიაში იტალიის მესამე ქალაქი ვენეციაც შევიდა. ეს ქალაქი ცხოვრებაში ერთხელ მაინც უნდა ინახულო. ვენეცია მთელი წლის განმავლობაში ხალხმრავლობით გამოირჩევა. სასტუმროს ფასები ვენეციაში საკმაოდ ძვირია, განსაკუთრებით მთავარ კუნძულზე. ქალაქი პატარაა, ამიტომ დასათვალიერებლად 24 საათი საკმარისია. ივნისში 3 ვარსკვლავიანი სასტუმროს ფასი ორ ადამიანზე 85 ევროდან იწყება. ხოლო ჰოსტელის ფასი 21 ევროა.

ისლანდია - რეიკიავიკი

რეიკიავიკი ისლანდიის დედაქალაქი და უმსხვილესი ქალაქია. ივნისში რეიკიავიკი შედარებით გრილია, თუმცა ღირშესანიშნაობების დასათვალიერებლად საკმარისად თბილა. საუკეთესო ვარიანტია, დაიქირაო მანქანა და ქალაქში ისე გადაადგილდე. რაც შეეხება სასტუმროს ფასებს, ივნისში 3 ვარსკვლავიანი სასტუმროს ფასი ორ ადამიანზე 152 ევროდან იწყება. ხოლო ჰოსტელის ფასი 45 ევროა.

საფრანგეთი - პარიზი

ივნისი პარიზისთვის ერთ-ერთი ხალხმრავალი დროა. ეს ქალაქი, მსოფლიოს ერთ-ერთი ყველაზე ლამაზი და საინტერესო ქალაქია, ხოლო ივნისის ხანგრძლივი დღეები და თბილი ტემპერატურა კი უფრო მიმზიდველს ხდის. ივნისში 3 ვარსკვლავიანი სასტუმროს ფასი ორ ადამიანზე 104 ევროდან იწყება. ხოლო ჰოსტელი 22 ევრო ღირს.

საფრანგეთი - ნიცა

შეიძლება ითქვას, საფრანგეთში პარიზის შემდეგ მეორე საუკეთესო გაჩერებაა. ნიცაში ცხოვრება საკმაოდ იაფია. საკმაოდ პოპულარულია ნიცას სანაპირო. რაც შეეხება სასტუმროს ფასებს, ივნისში 3 ვარსკვლავიანი სასტუმროს ფასი ორ ადამიანზე 74 ევროდან იწყება. ხოლო ჰოსტელის ფასი 15 ევროა.

შვეიცარია - ინტერლაკენი

მიუხედავად იმისა რომ შვეიცარია ტურისტებში ძალიან პოპულარულია, ინტერლაკენის შესახებ ძალიან ცოტა ადამიანმა იცის. მთის სოფლებში ივნისის ტემპერატურა კომფორტულია, თუმცა ჯერ კიდევ გრილი. ივნისში 3 ვარსკვლავიანი სასტუმროს ფასი ორ ადამიანზე 76 ევროდან იწყება. ხოლო ჰოსტელის ფასი 12 ევრო ღირს.

ინგლისი - ლონდონი

წელიწადის ყველა დროს ლონდონი ცნობილია, როგორც ყველაზე ნაცრისფერი ქალაქი. 10 ივნისის შემდეგ შესანიშნავი ტემპერატურაა მოსალოდნელი, ამიტომ იდეალურია ქალაქის დასათვალიერებლად. ლონდონის სასტუმროს ფასები ივნისში საკმაოდ მაღალია. 3 ვარსკვლავიანი სასტუმროს ფასი ორ ადამიანზე 99 ევროდან იწყება. ხოლო ჰოსტელის ფასი 30 ევროა.

ესპანეთი - ბარსელონა

ბარსელონა ტურისტებში იმდენად პოპულარული ადგილია, რომ თითქმის ყველა სეზონზე ხალხმრავლობაა. თუმცა ივნისის თბილი ამინდები ბარსელონიასთვის იდეალური დროა. არქიტექტურა ქალაქისთვის მთავარ ღირშესანიშნაობას წარმოადგენს. სასტუმროები აქ საკმაოდ ძვირია, მაგრამ ჰოსტელს ჯერ კიდევ გონივრულ ფასად იშოვით. 3 ვარსკვლავიანი სასტუმროს ფასი ორ ადამიანზე 72 ევროდან იწყება. ხოლო ჰოსტელის ფასი 15 ევროა.

პორტუგალია - ლისაბონი

მთელს ევროპაში ივნისში ლისაბონს ყველაზე კარგი კლიმატი აქვს. მიუხედავად ამისა, ამ პერიოდის ლისაბონი ხალხმრავლობით არ გამოირჩევა. სასტუმროს ფასები და სხვა ყველაფერი, ესპანეთის ქალაქებთან შედარებით დაბალია. რაც შეეხება ფასებს, ივნისში 3 ვარსკვლავიანი სასტუმროს ფასი ორ ადამიანზე 47 ევროდან იწყება. ხოლო ჰოსტელი 13 ევრო ღირს.

ვრცლად ნახვა
ტალინიდან ბათუმის მიმართულებით ჩარტერული ფრენები შესრულდება

ესტონური ავიაკომპანია „SmartLynx Airlines" ტალინიდან ბათუმის მიმართულებით ჩარტერულ ფრენებს განახორციელებს. 

რეისები 27 ივნისს, 4 ივლისს, 11 ივლისსა და 18 ივლისს, Airbus A320-ის ტიპის საჰაერო ხომალდებით შესრულდება და საქართველოში ესტონელი ტურისტების ჩამოყვანაზე იქნება ორიენტირებული. 

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ, ჩარტერული საჰაერო მიმოსვლის განხორციელებისათვის აუცილებელი ნებართვა ესტონურ ავიაკომპანიაზე 29 მაისს გაიცა. 

ვრცლად ნახვა
პარიზში ლუვრის მუზეუმი შესაძლოა, ამ კვირაში ისევ დაიხუროს

პარიზში ლუვრის მუზეუმი შესაძლოა, ამ კვირაში მეორედ, ისევ დაიხუროს. 

Bloomberg-ის ინფორმაციით, აღნიშნულის მიზეზი კვლავ თანამშრომლების გაფიცვაა. როგორც პარიზის მუზეუმში დასაქმებულები აცხადებენ, უზომოდ ბევრ დამთვალიერებელს დასაქმებული პერსონალი ფიზიკურად ვეღარ აუდის. 

ამ დროისთვის საფრანგეთის პროფკავშირები საკითხს განიხილავს, დეტალები მალე გახდება ცნობილი. ლუვრის თანამშრომლებმა გაფიცვა ორშაბათსაც გამოაცხადეს, რის გამოც მუზეუმი დამთვალიერებლისთვის დახურული იყო. 

Bloomberg-ის ცნობით, ბოლო რამდენიმე წლის განმავლობაში მუზუემის თანამშრომლები მასობრივად შეამცირეს, მიუხედავად იმისა, რომ ლუვრის მნახველთა რაოდენობა უკანასკნელ 10 წელიწადში 20%-ით გაიზარდა. 

2018 წელს ლუვრის მუზეუმს 10,2 მილიონი ადამიანი ესტუმრა. 

ვრცლად ნახვა