ოქტომბრიდან ახალ ზელანდიაში შესვლა ფასიანი იქნება. ე.წ ქვეყანაში შესასვლელი მოსაკრებელი უცხოელი ვიზიტორებისთვის 35 ახალი ზელანდიური დოლარი ეღირება. გადაწყვეტილება ქვეყნის ტურიზმის სამინისტრომ მიიღო. 

ტურისტებისთვის დაწესებული გადასახადიდან ყოველწლიურად ქვეყნის ბიუჯეტში დაახლოებით, 47 მილიონი აშშ დოლარი შევა, ფული ქვეყნის გარემოსა და ტურიზმის გაუმჯობესებას მოხმარდება. 

ახალი ზელანდია სიდნეიდან დაახლოებით 2200 კილომეტრით არის დაშორებული, კუნძულოვან ქვეყანას 4,9 მილიონი მოსახლე ჰყავს. 2018 წლის მონაცემებით, ახალ ზელანდიას 3,8 მილიონი უცხოელი დამსვენებელი ეწვია. 

სამოქალაქო ავიაციის სააგენტომ სამხრეთ კორეასა და საქართველოს შორის ჩარტერული საჰაერო მიმოსვლის შესრულების თაობაზე ავიაკომპანია Korean Air-ის განაცხადი დააკმაყოფილა. 

უწყების ინფორმაციით, კორეული ავიაკომპანია Korean Air სეულსა და თბილისს შორის პირდაპირ ჩარტერულ რეისებს მიმდინარე წლის ზაფხულის სანავიგაციო სეზონზე განახორციელებს. ფრენები ორი ქვეყნის დედაქალაქებს შორის 30 მაისს, 13 ივნისს, 27 ივნისსა და 11 ივლისს, Airbus A330 ტიპის საჰაერო ხომალდით შესრულდება. ჩარტერული რეისები საქართველოში ტურისტების ჩამოყვანას მოემსახურება. 

ცნობისთვის: Korean Air კორეის რესპუბლიკის წამყვანი ავიაკომპანიაა, რომელიც SkyTeam-ის ალიანსის წევრია და 44 ქვეყნის 124 მიმართულებით ოპერირებს. Korean Air-მა საქართველოს საავიაციო ბაზარზე ჩარტერული ოპერირება 2018 წელს დაიწყო. შარშან ავიაკომპანიამ სეული-თბილისი-სეულის საჰაერო ხაზზე ორი ჩარტერული ფრენა განახორციელა.

4 ივლისიდან საქართველოს ავიაბაზარზე ოპერირებას ავიაკომპანია "AIR MALTA" იწყებს. 

რეგულარული რეისები თბილისი-მალტა-თბილისის მიმართულებით ყოველ ხუთშაბათს, Airbus A 320 ტიპის თვითმფრინავით შესრულდება. 

საქართველოს ავიაბაზარზე „AIR MALTA”-ს შემოსვლასთან დაკავშირებით 16 მაისს, 11;00 საათზე სასტუმრო HOLIDAY INN-ში პრესკონფერენცია გაიმართება, რომელშიც მონაწილეობას მიიღებენ ავიაკომპანიის წარმომადგენლები და საქართველოში „AIR MALTA“-ს კომერციული წარმომადგენელი „ინტერკო თრეველ ჯგუფის“ ვიცე-თავმჯდომარე ზურაბ შარაშენიძე. 

ღონისძიებას დაესწრებიან ეკონომიკისა და მდგრადი განვითარების სამინისტროს შპს ,,საქართველოს აეროპორტების გაერთიანების“ დირექტორი გიორგი ჩოგოვაძე, სსიპ ტურიზმის ეროვნული ადმინიტრაციის ხელმძღვანელი მარიამ ქვრივიშვილი და TAV GEORGIA-ს გენერალური მენეჯერი მეთე ერქალი. 

,,საქართველოს აეროპორტების გაერთიანების“ ინფორმაციით, საავიაციო სფეროში საჯარო და კერძო სექტორს შორის ურთიერთობის ხელშეწყობა მნიშვნელოვანია მიზნობრივ ტურისტულ ბაზრებზე, მათ შორის ევროკავშირის ქვეყნებში, საქართველოს სწორად პოზიციონირებისთვის. სწორედ მსგავსი აქტიური მუშაობის შედეგად საქართველოს საავიაციო ბაზარს „AIR MALTA“-ს სახით კიდევ ერთი ავიაკომპანია შეემატება. 

„პირდაპირი რეისები მალტიდან ხელს შეუწყობს ორ ქვეყანას შორის ტურისტული პოტენციალის განვითარებას“, - ნათქვამია გავრცელებულ ინფორმაციაში. 

15 მაისიდან ევროკავშირი საერთო ევროპულ ჭერს განსაზღვრავს მობილური ზარების ფასზე.

ეს იქნება 19 ევროცენტი ერთ წუთზე და 6 ევროცენტი ერთ sms-ზე. ამის შესახებ ბრიუსელში გამართულ ბრიფინგზე ევროკომისიის წარმომადგენელმა მარგარიტის სხინასმა განაცხადა.

"ამიერიდან მობილური ზარის წუთობრივი საფასური არ შეიძლება აღემატებოდეს 19 ევროცენტს, ხოლო ერთი სმს-გზავნილის ფასი 6 ევროცენტს. ეს გადაწყვეტილება ევროპელ მომხმარებელს პრაქტიკულ შედეგს მოუტანს და მობილურ კავშირზე ერთიანი ევროპული ბაზრის ცალკეულ ქვეყნებში დისპროპორციული ფასების გამოსწორებას შეუწყობს ხელს,“ - განაცხადა მან.

აღსანიშნავია, რომ ამ ფასში არ არის გათვალისწინებული დღგ. შესაბამისად იმის გათვალისწინებით, რომ ევროკავშირის ქვეყნებში ის 17-დან 25%-მდე მერყეობს, ერთიანი ტარიფი ევროკავშირის ტერიტორიაზე მაინც ვერ იქნება მიღწეული.

შეზღუდვა მიღებულია სუფთა ადმინისტრაციულ დონეზე, შესაბამისად ჯერ უცნობია, როგორ აისახება ის სატელეკომუნიკაციო სექტორზე ევროკავშირში.

ეკონომიკისა და მდგრადი განვითარების სამინისტროს ,,საქართველოს აეროპორტების გაერთიანების“ ინფორმაციით, 2019 წლის 4 თვის მონაცემებით, საქართველოს აეროპორტები ჯამში, 1,450,847 მგზავრს მოემსახურა, რაც 20%-ით აღემატება წინა წლის ანალოგიურ პერიოდს (2018 წელი - 1,208,422 მგზავრი). 

აპრილში მგზავრთნაკადის ზრდის მაღალი მაჩვენებელი ქვეყნის სამივე საერთაშორისო აეროპორტში დაფიქსირდა: 

თბილისის საერთაშორისო აეროპორტი აპრილში 331,523 მგზავრს მოემსახურა, რაც 12%-ით მეტია წინა წლის ანალოგიურ პერიოდთან შედარებით (2018 წელი 296,163 მგზავრი ). 4 თვის ჭრილში კი, მგზავრთნაკადმა 11%-ით მეტი შეადგინა (2018 წელი 1,020,104 მგზავრი). 

ქუთაისის საერთაშორისო აეროპორტში მგზავრთნაკადი 2019 წლის აპრილში 67%-ით გაიზარდა და 67,530 მგზავრი შეადგინა (2018 წელი 40,413 მგზავრი). რაც შეეხება 4 თვის მონაცემებს, ჯამში ქუთაისის საერთაშორისო აეროპორტი 224,314 მგზავრს მოემსახურა, რაც წინა წლის ანალოგიურ პერიოდთან შედარებით 89%-ით მეტია. (2018 წელი 118,433 მგზავრი). 

ზრდის ტენდენცია ნარჩუნდება ბათუმის საერთაშორისო აეროპორტში. 2019 წლის აპრილში ბათუმის ალექსანდრე ქართველის სახელობის საერთაშორისო აეროპორტით 36,532 მგზავრმა ისარგებლა. რაც 16%-ით მეტია შარშანდელ ანალოგიურ პერიოდთან შედარებით (2018 წელი 31,501 მგზავრი). 4 თვის ჭრილში, ბათუმის საერთაშორისო აეროპორტში შარშანდელ ანალოგიურ პერიოდთან შედარებით მგზავრთნაკადი 30%-ით გაიზარდა და 88,448 მგზავრი შეადგინა. (2018 წელი 68,261 მგზავრი). 

რაც შეეხება ადგილობრივ აეროპორტებს, მესტიის აეროპორტი 4 თვეში 1,626 მგზავრს მოემსახურა. რაც 16%-ით მეტია გასული წლის ანალოგიურ პერიოდთან შედარებით (2018 წელი 1,406 მგზავრი). 

ამბროლაურის აეროპორტით, 2019 წლის პირველ 4 თვეს 261 მგზავრმა ისარგებლა, რაც 20%-ით მეტია გასული წლის ანალოგიურ პერიოდთან შედარებით (2018 წელი 218 მგზავრი). 

ჯამში, 4 თვეში ადგილობრივი აეროპორტებით 1,887 მგზავრმა ისარგებლა, რაც 16%-ით აღემატება წინა წლის ანალოგიურ პერიოდში გადაყვანილი მგზავრების რაოდენობას (2018 წელი 1,624 მგზავრი). 
 

შვებულების პერიოდი უკვე ახლოვდება. ადამიანების უმრავლესობა მოუთმენლად ელოდება, როდის დააღწევს თავს ყოველდღიურ რუტინულ ცხოვრებას.

თუმცა არსებობს რისკები, რომელიც მოგზაურობის დაწყებამდე უნდა გაითვალისწინოთ, რათა თქვენი დასვენება კოშმარად არ იქცეს.

  წარმოგიდგენთ 8 საფრთხეს, რომელიც ყველა ტურისტმა უნდა გაითვალიწინოს:

1. ავადმყოფობის რისკი - უცხო ქვეყანა, უცნობი საკვები და კლიმატი - ყველა ამ ფაქტორს შეუძლია ისეთი დაავადებების გამოწვევა, რომლის გამოც შესაძლოა, ტურისტმა დასვენებისთვის უბრალოდ, ვერ მოიცალოს. საუბარია, მოწამვლაზე, მზის დარტყმასა თუ ეგზოტიკურ დაავადებებზე. თუმცა, ამის თავიდან აცილება სრულიად შესაძლებელია, თუ განსაკუთრებულ სიფრთხილეს გამოიჩენთ. გამოცდილ მოგზაურთა რჩევაა, რომ სანაპიროზე გატარებული დრო სწორად მართოთ, არ დააგემოვნოთ უცნობი საკვები, რომელიც ქუჩაში იყიდება და არ იცურაოთ თქვენთვის უცნობ წყალში. ამასთან, თუ ეგზოტიკურ ქვეყანაში მოგზაურობა გადაწყვიტეთ, უმჯობესია, გაიკეთოთ შესაბამისი ვაქცინა, რომელიც სხვადასხვა დაავადებებისგან დაგიცავთ.

2. წყალში დახრჩობის რისკი - ტურისტის დახრჩობის რისკი 3-ჯერ მეტია, ვიდრე ადგილობრივის. ამის მიზეზი კი დამსვენებლების დაუდევრობაა. ხალხის სიმცირე, ბარებისა და რესტორნების სიმრავლე, ალკოჰოლი, დაუცველობის რისკებს კიდევ უფრო ზრდის. ამას ემატება ზოგიერთი სანაპიროს თავისებურებები, დიდი და მოულოდნელი ტალღები, რომელსაც ტურისტების უმრავლესობამ არ იცის, როგორ გაუკლავდეს. ამასთან, ზოგიერთ სანაპიროს არ აქვს გაფთხილების სისტემა და მეტიც, მაშველებიც კი არ ჰყავს. გამოცდილ მოგზაურთა რჩევაა, რომ ტურისტებმა მხოლოდ მათთვის რეკომენდირებულ სანაპიროებზე დაისვენონ, იქ სადაც მაშველები და ხალხმრავლობაა.

3. ფულისა და პასპორტის ქურდობის რისკი - კვლევის თანახმად, წლიურად დაახლოებით, 300-მდე ამერიკული პასპორტია მოპარული. გამოკითხული ტურისების 9% კი აცხადებს, რომ ისინი საბუთების ქურდობის მსხვერპლნი არიან. თუმცა, ხშირად არამხოლოდ პასპორტს, არამედ ფულსაც იპარავენ. ამიტომ აუცილებელია, რომ ტურისტულ ადგილებზე განსაკუთრებით დიდი ყურადღება გამოიჩინოთ საკუთარი ნივთების მიმართ. არასდროს დაიტოვოთ საფულე ან პასპორტი ჯიბეში, რადგან ტურისტების თავშეყრის თითქმის ყველა ადგილზე სპეციალური „ჯგუფები“ მოქმედებენ, რომლთაც არა მხოლოდ ფულის, არამედ პასპორტის გამოყენებაც თაღლითური მიზნებისთვის შეუძლიათ. ამიტომ, აუცილებელია, ყველა იმ ადგილთან დაკავშირებით, რომლის მონახულებასაც აპირებთ, ინფორმაცია დაწვრილებით მოიძიოთ. ამასთან, გამოკითხოთ ის ადამიანებიც, ვინც ეს ადგილები უკვე მოინახულა.

4. მომსახურების/ პროდუქტების ხარჯების სწორად გადანაწილება - ადგილობრივი მომსახურე პერსონალი ხშირად ტურისტებს აღიქვამს, როგორც შემოსავლის დამატებით წყაროს. ეს არ გულისხმობს ფულის მოპარვას, თუმცა მომსახურების სანაცვლოდ, არსებულზე ძვირს ახდევინებენ. ამასთან, ხშირად ტურისტები პროდუქტებსა თუ ტაქსის მომსახურებაში ადგილობრივებზე ძვირს იხდიან. სწორედ ამიტომ, მნიშვნელოვანია, რომ მოიძიოთ ალტერნატიული გზები, კერძოდ, რომელ ქვეყანაში სად და როგორ არის შესაძლებელი შედარებით იაფად ვაჭრობა.

5. ცუდი ამინდი - ვინც მოგზაურობას გეგმავს, რა თქმა უნდა, ის ამინდის შესახებაც ინფორმირებულია, თუმცა ყველაფერი ისე არ ხდება, როგორც წინასწარ ჩანს. ამინდი შესაძლოა, ტურისტებისთვის სასტიკ ხუმრობადაც კი იქცეს. ამიტომ ყველა ტურისტი არა მხოლოდ ზოგად, არამედ კონკრეტული ქვეყნის ამინდის სპეციფიკას უნდა გაეცნოს და მხოლოდ ამის შემდეგ დაგეგმოს მოგზაურობა.

6. ავიაბილეთებსა და საცხოვრებელთან დაკავშირებული პრობლემები - როდესაც მოგზაურობას ვგეგმავთ, ყველას აქვს სურვილი, რომ გეგმებს ხელი არაფერმა შეუშალოს. თუმცა ხშირად მოულოდნელი სიურპრიზები ჩვენზე არ არის დამოკიდებული. შესაძლოა, პრობლემა შეიქმნას გამგზავრების დროსთან დაკავშირებით, გადაიდოს ფრენა ან თუნდაც საცხოვრებელმა არ დაგაკმაყოფილოთ. ამის მოგვარების ერთადერთი გზა, ალტერნატიული ვარიანტების წინასწარ შემუშავებაა.

7. სტიქიური მოვლენები - სტიქიური მოვლენები ის მნიშვნელოვანი რისკებია, რომელსაც შეუძლია, რომ თქვენს დასვენებას ხელი შეუშალოს. მიწისძვრა, წყალდიდობა, შტორმი და სხვა კატასტროფები შეიძლება ტურისტულ სეზონებზეც მოხდეს. არის ქვეყნები, რომლებიც განსაკუთრებით მიდრეკილია სტიქიური მოვლენებისადმი. ამიტომ, უმჯობესია გაითვალისწიოთ, რომ ასეთ 10 ქვეყანაში მოიზარება: ინდოეთი, იაპონია, ინდონეზია, აშშ, ბანგლადეში, ბრაზილია, პაკისტანი, ჩინეთი, მექსიკა და ფილიპინები.

8. ტერორიზმი - ბოლო პერიოდში, ტერორიზმი ტურისტებისთვისაც საფრთხეს წარმოადგენს. ამისთვის საკმარისია გავიხსენოთ თუნდაც ერთი შემთხვევა, რა დროსაც ეგვიპტეში ავიარეისზე განხორციელდა ტერორისტული თავდასხმა და უამრავი ადამიანი დაიღუპა. როგორც მოგზაურები გვირჩევენ, უჯობესია, ტერორისტების სამიზნე ქვეყნების მიმართ განსაკუთრებით დიდი სიფრთხლე გამოვიჩინოთ.

წყაო: bpn.ge

2019 წლის მარტში ქვეყნიდან 281 019 საქართველოს მოქალაქე გავიდა.

შს სამინისტროს ცნობით, საქართველოს მოქალაქეები შენგენის ზონის ქვეყნებიდან ყველაზე ხშირად გერმანიაში მიემგზავრებოდნენ.

კერძოდ, გერმანიაში საქართველოს მოქალაქეთა გასვლების რაოდენობა 6 056 იყო. მას მოსდევს საბერძნეთი, სადაც 3 730 გამგზავრება ფიქსირდება; მე-3 ადგილზე კი 3 185 გასვლით პოლონეთია.

რაც შეეხება ქვეყნების ტოპ-სამეულს, სადაც მარტში საქართველოდან ყველაზე იშვიათად მიემგზავრებოდნენ, ასე გამოიყურება: რუმინეთი - 10 გამგზავრება; ბულგარეთი - 102 და ბელგია - 168 გამგზავრება.

აღსანიშნავია, რომ სტატისტიკა 16 ქვეყანას მოიცავს და აქედან მხოლოდ სამ ქვეყანაში არ ფიქსირდება უარი საზღვრის კვეთაზე. ეს ქვეყნებია: რუმინეთი (გაემგზავრა - 10); ლიეტუვა (გაემგზავრა - 501) და ნიდერლანდები (გაემგზავრა - 331).

რაც შეეხება შენგენის ზონის ქვეყნებში შესვლაზე უარის თქმის მაჩვენებლებს, ჯამში ასეთი 13 ქვეყანა იყო. ყველაზე მეტი - 105 უარი წინა თვეში საქართველოს მოქალაქეებს ავსტრიაში უთხრეს. მას მოსდევს კვიპროსი - 39 უარით, მე-3 ადგილზე კი ესპანეთია, სადაც მარტში 37 უარი დაფიქსირდა; მე-4 და მე-5 ადგილებს კი საფრანგეთი და გერმანია ინაწილებენ, შესაბამისად, 35 და 31 უარით.

რაც შეეხება სხვა ქვეყნებში უარის თქმის სტატისტიკას, ასე გამოიყურება: იტალია - 30 უარი, საბერძნეთი - 13, პოლონეთი - 20 უარი, უნგრეთი - 10, ჩეხეთი - 3, ლატვია - 27 უარი, ბელგია - 4 და ბულგარეთი - 1 უარი.

მსოფლიოს მასშტაბით, 2019 წლის ძვირად ღირებული ქალაქების ჩამონათვალში, აზიისა და ევროპის ქალაქები მოხვდნენ.

კვლევას ორგანიზაცია the economist intelligence unit-ი ყოველწლიურად ატარებს და მსოფლიოს 10 ყველაზე ძვირად ღირებულ ქალაქს მიმოიხილავს. ანგარიში მიმოიხილავს 160-ზე მეტ სხვადასხვა პროდუქტისა და მომსახურების ფასს, მათ შორის საკვები, სასმელი, ტანსაცმელი და სახლის დაქირავება.

ყველაზე ძვირად ღირებული ქალაქის სტატუს 2014 წლიდან სინგაპური იკავებს, რომელმაც პირველობა ტოკიოს ჩამოართვა. მიუხედავად იმისა, რომ სინგაპური კვლავ პირველ ადგილზეა, ის პირველობას პარიზთან და ჰონკ-კოგთან ინაწილებს.

სიაში შემდეგ ადგილზეა - ციურიხი, ჟენევა, ოსაკა, სეული, კოპენჰაგენი, ნიუ იორკი, თელავივი და ლოს ანჯელესი.

საქართველო-ფიჯის რესპუბლიკას შორის უვიზო მიმოსვლა ძალაში შევიდა.

მთავრობის და ფიჯის რესპუბლიკის მთავრობას შორის ორდინალური, დიპლომატიური და სამსახურებრივი პასპორტების მფლობელთა ვიზის მიღების ვალდებულებისგან გათავისუფლების შესახებ“ შეთანხმების დამტკიცებისა და ძალაში შესვლის თაობაზე მთავრობის დადგენილება საკანონმდებლო მაცნეში უკვე გამოქვეყნდა.

აღსანიშნავია, რომ „საქართველოს მთავრობასა და ფიჯის რესპუბლიკის მთავრობას შორის ვიზის მიღების ვალდებულებისგან გათავისუფლების შესახებ“ შეთანხმებას ხელი 2019 წლის 7 მარტს მოეწერა.

როგორც დადგენილებაშია აღნიშნული, საგარეო საქმეთა სამინისტრომ უნდა აცნობოს საქართველოს პრეზიდენტსა და პარლამენტს ამ დადგენილების პირველ მუხლში აღნიშნული შეთანხმების დადების შესახებ; ასევე უნდა შეატყობინოს ფიჯის რესპუბლიკის მხარეს ამ დადგენილების პირველ მუხლში აღნიშნული შეთანხმების ძალაში შესვლისთვის აუცილებელი შიდასახელმწიფოებრივი პროცედურების საქართველოს მხრიდან დასრულების თაობაზე.

ცნობისთვის, დადგენილება გამოქვეყნებისთანავე ამოქმედდა.

საქართველოში შესაძლოა, კიდევ ერთი დაბალბიუჯეტიანი ავიაკომპანია შემოვიდეს.

საუბარია ყაზახური ავიაკომპანიაზე „ფლაიასტანა“. აღნიშნული საკითხი განხილული იყო საქართველოს ეკონომიკისა და მდგრადი განვითარების მინისტრის ნათია თურნავასა და ყაზახეთის პრემიერ-მინისტრის მოადგილის ჟენის კასიმბეკის შეხვედრისას.

ამასთან, როგორც თურნავას ყაზახეთში სამუშაო ვიზიტის შედეგად გახდა ცნობილი, საქართველოში ყაზახური ხორბლის იმპორტი მნიშვნელოვნად გაიზრდება. ყაზახეთში შემდგარი მოლაპარაკების თანახმად, ყაზახეთის მთავრობა ქვეყნის ბიუჯეტიდან საქართველოს ბაზარზე ხორბლის ტრანსპორტირების სუბსიდირებას მოახდენს და 50%-მდე დაწევს ტარიფებს, რაც მოგვცემს საშუალებას ყაზახური ხორბალი შედარებით ხელმისაწვდომ ფასებად მივიღოთ.

აღნიშნული ინიციატივა უკვე მომზადებულია, ყაზახური ხორბლის იმპორტთან დაკავშირებით საბოლოო გადაწყვეტილება მიღებული იქნება საქართველოს პრემიერ-მინისტრის, მამუკა ბახტაძის ყაზახეთში მომავალი ვიზიტის ფარგლებში.

გარდა ამისა, კიდევ ერთი საკითხი, რომელზეც ნათია თურნავამ და ჟენის კასიმბეკმა ისაუბრეს, ყაზახური დაბალბიუჯეტიანი ავიაკომპანიის „ფლაიასტანა“-ს მიერ ქართულ ბაზარზე შემოსვლის სურვილი იყო.

პოლონეთის ქალაქ გდანსკიდან ქუთაისის საერთაშორისო აეროპორტში დღეს, 22: 50 საათზე პირველი პირდაპირი ავიარეისი შესრულდება.

პირველი რეისის მგზავრებს „საქართველოს აეროპორტების გაერთიანების“ დირექტორი გიორგი ჩოგოვაძე დახვდება და სიმბოლურ საჩუქრებს გადასცემს.

გდანსკი პოლონეთის ერთ-ერთი მსხვილი სავაჭრო ცენტრი და ნავსადგურია ბალტიის ზღვაზე. ქუთაისიდან გდანსკის მიმართულებით და პირიქით, რეგულარულ რეისებს ავიაკომპანია „ვიზეარი“ კვირაში ორჯერ, სამშაბათსა და შაბათს შეასრულებს.

მიმდინარე წლის 16 ივლისიდან ტაშკენტი-თბილისი-ტაშკენტის მიმართულებით ავიარეისების შესრულებას ავიაკომპანია „უზბეკეთის ავიახაზები“ (Uzbekistan Airways) იწყებს.

ფრენები თბილისის საერთაშორისო აეროპორტში შესრულდება.

თბილისის საერთაშორისო აეროპორტის ინფორმაციით, ზაფხულის სეზონზე რეისები კვირაში ორის სიხშირით, ყოველ სამშაბათსა და კვირას, „აირბუს (Airbus) 320“ ტიპის საჰაერო ხომალდით განხორციელდება.

„უზბეკეთის ავიახაზები“ 1992 წელს დაარსდა. დღეისთვის, ავიაკომპანია ფრენებს 40 სხვადასხვა მიმართულებით ასრულებს.

თბილისის საერთაშორისო აეროპორტში ფრენების დაწყებასთან დაკავშირებით, აეროპორტების მმართველი კომპანია „ტავ ჯორჯია“ მოლაპარაკებებს ორ ახალ ავიაკომპანიასთან აწარმოებს.

„ტავ ჯორჯიას“ ინფორმაციით, მოლაპარაკებები მიმდინარეობს „ონურ ეარსა“ (Onur Air) და „ჯეტ ჰანდლინგთან“.

მათივე ცნობით, ზაფხულის სეზონზე თურქული დაბალბიუჯეტიანი ავიაკომპანია Onur Air ანტალიის მიმართულებით ჩარტერული ფრენების დაწყებას კვირაში სამჯერ გეგმავს, კვიპროსული Jet Handling კი, ჩარტერული რეისების განხორციელებას კვიპროსიდან თბილისის მიმართულებით აპირებს.