ადამ მიცკევიჩის ქუჩა N11

info@oktravel.ge

კორონა ვირუსთან დაკავშირებით Oktravel დისტანციურ სამუშაო რეჟიმზე გადადის

  ახალ კორონა ვირუსთან (Covid-19) დაკავშირებით, ტურისტული კომპანია Oktravel მუშაობის განსხვავებულ, დისტანციურ რეჟიმზე გადადის!
კომპანია მაქსიმალურად ითვალისწინებს ჯანდაცვის მსოფლიო ორგანიზაციის რეკომენდაციებს შექმნილ ვითარებასთან დაკავშირებით და სიტუაციის დასტაბილურებამდე მომხმარებლებს ონლაინ პლატფორმების საშუალებით მოემსახურება.
Oktravel ზრუნავს თანამშრომლებსა და მომხმარებლებზე და ამასთან ერთად, იაზრებს პასუხისმგებლობას, რაც კომპანიის შეუფერხებლად ფუნქციონირებას უკავშირდება და მზად ვართ, ამ პერიოდში მაქსიმალურად გაგიმარტივოთ ჩვენი სერვისებით სარგებლობა.

ვიმედოვნებთ, ვითარება მალე დასტაბილურდება და დავუბრუნდებით ცხოვრების ჩვეულ რეჟიმს, იქამდე კი - ყველამ ერთად გავიაზროთ ის მაღალი სამოქალაქო პასუხისმგებლობა ქვეყნის წინაშე, რომელიც ასე მნიშვნელოვანია ვირუსის გავრცელების პრევენციისთვის.

#დაიცავისაკუთარითავი #დაიცავირეკომენდაციები #ერთადვებრძოლოთკორონავირუსს
#დაიცავისხვა 

ვრცლად ნახვა
რა უნდა გაითვალისწინოთ მგზავრობისას, თუკი კორონავირუსის გამო მოგზაურობის გეშინიათ

უნდა გავაუქმო თუ არა დაგეგმილი მგზავრობა?

 არა. მსოფლიო ჯანდაცვის ორგანიზაციის რეკომენდაციების თანახმად, ამ ეტაპზე, სხვადასხვა ქვეყანაში მგზავრობის გაუქმების აუცილებლობა არ დგას. მსოფლიო ჯანდაცვის ორგანიზაციის განცხადებით, არ არის აუცილებელი სამოგზაურო გეგმების შეცვლა. მთავარია, მგზავრობისას დაიცვათ ჰიგიენის ნორმები.
 

როგორ დავიბანო ხელები?

ხელები მინიმუმ 30 წამის განმავლობაში და აუცილებლად საპნით უნდა დაიბანოთ. უფრო ზუსტად კი, 20 წამის განმავლობაში წაისვით საპონი, 10 წამი კი საპნის წყლით ჩამობანას დაუთმეთ. არ დაგავიწყდეთ, კარგად გამოისუფთაოთ ფრჩხილები.

ხელების სისუფთავის შესანარჩუნებლად, კარგი საშუალებაა ეთანოლის შემცველი ანტისეპტიკური საშუალებები. მათ შორის საუკეთესოა ისეთი საშუალებები, რომლებიც 70% ეთანოლს შეიცავს.

არ მიიტანოთ ხელები სახესთან: პირთან, ცხვირთან, თვალებთან.

მოასუფთავეთ ის გარემო, სადაც ზიხართ.

თან ატარეთ ანტისეპტიკური, სველი ხელსახოცები. გაწმინდეთ სკამის სახელურები, მაგიდა.

დისტანცია ადამიანებს შორის - მინიმუმ სამი ნაბიჯი. განსაკუთრებით კი მათთან, ვინც აცემინებს, ახველებს.

 

რამდენად ეფექტიანია მგზავრობისას პირბადე?

პირველ რიგში, პირბადე უნდა გაიკეთონ იმ ადამიანებმა, რომლებსაც ვირუსი ან ვირუსის ნიშნები აქვთ. ამით ისინი იცავენ სხვა ადამიანებს ინფიცირებისაგან.

ხოლო იმ ადამიანებისათვის, რომლებიც არ არიან ავად, პირბადის გამოყენება არ არის სავალდებულო. თუმცა, ცხადია, სურვილის შემთხვევაში, შეგიძლიათ გაიკეთოთ პირბადე. მეტი ეფექტიანობისთვის, პირბადე სწორად უნდა გაიკეთოთ. ის სრულად უნდა ფარავდეს ცხვირს და პირს. პირბადე უნდა იცვალოთ ხშირად, მინიმუმ ორ საათში ერთხელ.

 

როგორ დავიცვა თავი თვითმფრინავში?

ვირუსი ვრცელდება ჰაერწვეთოვანი გზით. ეს ნიშნავს, რომ ვირუსი შეიძლება გადაგედოთ ინფიცირებულთან მხოლოდ ახლო კონტაქტის შედეგად. ვირუსი გარკვეული პერიოდის განმავლობაში რჩება საგნების ზედაპირზე, ამიტომ საუკეთესო საშუალება ვირუსისგან თავის დასაცავად, პირველ რიგში, ეს არის ხელების სისუფთავისა და გარშემო საგნების სისუფთავის შენარჩუნება.

გასათვალისწინებელია, რომ თვითმფრინავის კაბინაში ჰაერის სისტემატური ცირკულირება ხდება, დამონტაჟებულია სპეციალური სისტემა, რომელიც უზრუნველყოფს კაბინის მუდმივ ვენტილაციას. მგზავრებს შეუძლიათ მშვიდად იყვნენ, რადგან ერთ სივრცეში სუნთქვით, ვირუსი არ გადაგედებათ.

 

მოკლედ კორონავირუსისა და უახლესი სტატისტიკის შესახებ

ახალი სახეობის კორონავირუსი 2019-nCoV დეკემბრის ბოლოდან გავრცელდა ჩინეთის ჰუბეის პროვინციის ქალაქ უჰანიდან, სადაც 11 მილიონზე მეტი ადამიანი ცხოვრობს. უჰანში ინფიცირების პირველ შემთხვევებს კავშირი ჰქონდა ზღვის პროდუქტების საბითუმო ბაზართან.

24 თებერვლის მონაცემებით, ჩინეთში, კორონავირუსით დაავადებულთა რიცხვი შეადგენს 77 262-ს. საზღვარგარეთ ინფიცირებულთა რაოდენობაა 2 101. კორონავირუსით ჩინეთში გარდაიცვალა 2 595 ადამიანი. საზღვარგარეთ - 24. გამოჯანმრთელდა 24 757.

კორონაავირუსი მსოფლიოს 30-მდე ქვეყანაშია გავრცელებული.

ჩინეთის შემდეგ, ირანი მეორე ადგილზე დგას COVID-19-ის ვირუსის გავრცელების დინამიკით და ფატალური შედეგით. ირანში კორონავირუსს უკვე 8 ადამიანი ემსხვერპლა. მკურნალობას 43 ადამიანი გადის.

ახალი COVID-19 ტიპის ვირუსი ირანში, პირველად გამოჩნდა 19 თებერვალს. ქვეყნის ჯანმრთელობის დაცვის სამინისტროს ცნობით, ვირუსი სავარაუდოდ ჩინელმა მუშებმა გაავრცელეს, რომლებიც ყუმში მუშაობენ და ჩინეთში დადიოდნენ.

მსოფლიო ჯანდაცვის ორგანიზაციის ინფორმაციით, მეცნიერები მუშაობენ ვაქცინის შექმნაზე. მათ შორის, აქტიური მუშაობა მიმდინარეობს ამერიკის ჯანდაცვის ეროვნულ ინსტიტუტში. თუმცა, მათი განცხადებით, ვაქცინის შექმნას, შესაძლოა, წელიწადზე მეტი დასჭირდეს.

 

წყარო: რადიო თავისუფლება

ვრცლად ნახვა
საფრანგეთში კორონავირუსით დაავადებული ყველა პაციენტი განიკურნა

 საფრანგეთს ჯანდაცვის მინისტრის ოლივიე ვერანის განცხადებით, ყველა პაციენტი, რომელსაც საფრანგეთში კორონავირუსის დიაგნოზი დაუსვეს, განიკურნა.

ჯანმრთელობის მსოფლიო ორგანიზაციის მონაცემებით, საფრანგეთში კორონავირუსით 12 ადამიანი დაინფიცირდა, ერთი მათგანი გარდაიცვალა.

"საფრანგეთში დაავადების შემთხვევები აღარ არის... ვირუსი აღარ ვრცელდება. ბოლო პაციენტი, რომელიც ლიონში საავადმყოფოში გადაიყვანეს, განიკურნა. ის აღარ არის გადამდები. ამიტომ შეძლო შინ დაბრუნება", - თქვა ვერანმა.

კორონავირუსით დაინფიცირების შემთხვევების უმრავლესობა ჩინეთში ფიქსირდება, რომელიც ინფექციის ძირითადი წყაროა.

ამ დროისთვის, ჩინეთში 77 000 ადამიანია დაინფიცირებული, ხოლო 2600-ზე მეტი გარდაიცვალა.

აღსანიშნავია, რომ ჩინეთში ახალი შემთხვევების რიცხვი მცირდება.

ჩინეთის საზღვრებს მიღმა კორონავირუსით დაინფიცირების 1200-ზე მეტი შემთხვევა დაფიქსირდა 30 სხვადასხვა ქვეყანაში.

დღეის მდგომარეობით, იტალიამ 3 ადამიანის გარდაცვალება დაადასტურა.

24 თებერვლის მონაცემებით, კორონავირუსის პირველი შემთხვევები დააფიქსირეს ერაყში, ავღანეთში, ქუვეითში, ომანსა და ბაჰრეინში.

 

წყარო: პრაიმტაიმი

ვრცლად ნახვა
„ეარ ფრანსი“​ პარიზი-თბილისის მიმართულებით ფრენებს აახლებს

პირველი აპრილიდან საფრანგეთის ეროვნული ავიაკომპანია „ეარ ფრანსი“ (AIR FRANCE) პარიზი-თბილისის მიმართულებით ფრენებს განაახლებს. ინფორმაციას „ტავ ჯორჯია“ ავრცელებს.

ზაფხულის სეზონზე პარიზის შარლ დე გოლის აეროპორტიდან თბილისის საერთაშორისო აეროპორტის მიმართულებით ფრენები კვირაში ორჯერ სიხშირით, „ეარბას A 320-21“ ტიპის საჰაერო ხომალდით შესრულდება (ჩამოფრენა ოთხშაბათს და შაბათს, გაფრენა – ხუთშაბათს და კვირას).

„ეარ ფრანსი​“ საქართველოს საავიაციო ბაზარზე 2019 წლის 31 მარტს შემოვიდა, დღეისათვის კი ფრენებს 170 მიმართულებით ახორციელებს. კომპანიის ავიაპარკი 212 სხვადასხვა ტიპის საჰაერო ხომალდისგან შედგება. „ეარ ფრანსი“ პარიზის შარლ დე გოლის აეროპორტში ბაზირებული ავიაკომპანიაა. შარლ დე გოლის ოპერატორი ფრანგული სახელმწიფო კომპანია ADP Group-ია, რომელიც TAV Airports-ის მთავარი აქციონერია.

ვრცლად ნახვა
ავიაკომპანია "აირზენამ" რამდენიმე მიმართულებით ფრენები შეწყვიტა

ავიაკომპანია "აირზენამ" რამდენიმე მიმართულებით ფრენები შეწყვიტა, - ამის შესახებ  კომპანიის გენერალურმა დირექტორმა რომან ბოკერიამ განაცხადა.


მისივე თქმით, ფრენები შეწყდა ბარსელონას, ბოლონიის, ბერლინის (ერთი სიხშირე შეწყდა, მეორე დარჩა), პრაღის, ლონდონის მიმართულებით, ხოლო ამ დრომდე დაფრინავს მხოლოდ ამსტერდამის, პარიზის და თელ–ავივის მიმართულებით.

როგორც ბოკერია განმარტავს, ამ გადაწყვეტილების მიზეზი არის რუსეთის რეისების აკრძალვიდან გამომდინარე მიღებული ფინანსური ზარალი, რაც 26 მილიონამდე აშშ დოლარს აღწევს, ასევე ის, რომ კონკურენტი ავიაკომპანიები, "ვიზეარი" და "რაინეარი" ფინანსდებიან სახელმწიფოსგან და ქართული ავიაკომპანია მათთან კონკურენციაში აგებს.

"2016 წლიდან მთავრობა ახორციელებს აღნიშნული ავიაკომპანიების დაფინანსებას, რასთან დაკავშირებითაც შეიქმნა არაკონკურენტული, უსამართლო გარემო. ჩვენ ვმარცხდებით საერთაშორისო ავიაკომპანიებთან კონკურენციაში გამომდინარე იქიდან, რომ მათ დაიწყეს ფრენა ჩვენს მიმართულებებზე. მთავრობისგან ვითხოვდით, რომ მომხდარიყო ჩვენი თანადაფინანსება სწორედ ისე, როგორც უცხოური კომპანიების შემთხვევაში ხდება. ეს არ ხდება დღევანდელ დღემდე. იყო შეპირება, მოლაპარაკებები, მაგრამ დღემდე არაფერია ცვლილება. შექმნილმა სიტუაციამ ძალიან დაგვარტყა. ჩვენ ბიზნესი ვართ და როგორმე თავი უნდა გადავირჩინოთ. შევწყვიტეთ ფრენები, რადგან ბილეთებს ვერ ვყიდით. "აეროპორტების გაერთიანება" აფინანსებს უცხოური ქვეყნის ავიაკომპანიას ჩვენი გადასახადების ფულით, ამით კი ანადგურებს და აბანკროტებს ეროვნულ ავიაკომპანიას. 2020 წლიდან უსაფრთხოების გადასახადები გაიზარდა და ეს ფული, რომელსაც ჩვენ ვიხდით, მიდის უცხოური კომპანიების დაფინანსებაზე", - განაცხადა ბოკერიამ.

"აირზენას" გენერალური დირექტორი ამ ყველაფერს ნონსენსად აფასებს.

ვრცლად ნახვა
12 სანაპირო წლის 12 თვისთვის

მსოფლიოში მრავალი სხვადასხვა ტიპის დასასვენებელი ადგილი არსებობს. თუ თქვენ იმ ადამიანებს მიეკუთვნებით, ვისთვისაც სანაპიროზე დასვენებას არაფერი შეედრება, სწორ ადგილას მოხვდით. ამ სტატიაში 12 სანაპირო შევკრიბეთ, წლის ყოველი თვისთვის.

1. იანვარი — ყურე სან-ხუან-დელი, ნიკარაგუა

ნიკარაგუა, შესაძლოა, სამოგზაურო დანიშნულების ადგილად ხშირად არ შეგხვედრიათ, თუმცა სულ ტყუილად. წლის დასაწყისში ნიკარაგუაში იდეალური პირობებია იმისთვის, რომ სანაპიროზე წამოწვეთ, განიტვირთოთ და მზის აბაზანები მიიღოთ.

 

2. თებერვალი, – ქვემო კალიფორნია, მექსიკა

კორტესის ზღვა უნიკალური და მდიდარი ეკოსისტემით გამოირჩევა. გარშემო არსებული ყველა კუნძული იუნესკოს მსოფლიო მემკვიდრეობის ძეგლადაა აღიარებული. კუნძულების დედოფლად კი ესპირიტუ-სანტო მოიხსენიება, აქ ზღვა უკიდეგანოდ ფირუზისფერია. სანაპიროზე გასვლისას ქათქათა ქვიშას, მოვარდისფრო ვულკანურ ქვებს, ყვითელ პეპლებსა და უძველეს, ენდემური სახეობის უცნაურ მცენარეებს შეხვდებით.

 

3. მარტი — კერალა, ინდოეთი

კოვალამს სამხეთის სამოთხედ და ინდოეთის საუკეთესო სანაპიროდ ხშირად მოიხსენიებენ ხოლმე. ის სავსეა ქოქოსი სპალმებით, ფერადი ნავებითა და სარელაქსაციო ცენტრებით, რომელთა დახმარებითაც თქვენი არდადეგები დაუვიწყარი გახდება.

 

4. აპრილი — თეთრი კუნძული, ფილიპინები

კამიგუინი განთქმულია თეთრი ქათქათა ქვიშითა და გარშემო არსებული ორი დიდი ვულკანით. აქვეა ბოჰოლის ზღვაც, რომელიც მასში ჩაძირული სასაფლაოთია ცნობილი. 1871 წელს ვულკანის ამოფრქვევის შედეგად ადგილობრივი სასაფალაო წყლის ქვეშ 6 მეტრის სიღრმეზე მოექცა.

 

5. მაისი — ილჰა გრანდე, ბრაზილია

რიო-დე-ჟანეიროდან სამ საათში პატარა კუნძულს, ილჰა გრანდეს შეხვდებით, სადაც ულამაზესი სანაპირო, ლოპეს-მენდესი მდებარეობს. იქ მისასვლელად კი პატარა თავგადასავლის გადალახვა მოგიწევთ, უნდა გაიაროთ ბრაზილიის ატლანტიკური ტყე, რომელშიც შეხვდებით პეპლებს, ტროპიკულ ყვავილებს, მაიმუნებს და ჩანჩქერებს. ეს კუნძული 1502 წელს აღმოაჩინეს, მის კონსერვაციაზე კი აქტიურად ზრუნავენ. ამის შედეგად, სამანქანო გზა კუნძულის მხოლოდ ერთ მთავარ სოფელში არსებობს.

6. ივნისი — ქუინსლენდი, ავსტრალია

უაიტჰევენის სანაპირო პატარა, ველურ კუნძულზე მდებარეობს, რომელიც დიდი ბარიერული რიფის ნაწილია. კუნძულზე არსებული ქვიშის 99,89% სუფთა კვარცია, წყალში კი 1 500 სხვადასხვა ტიპის ფერადი თევზი ბინადრობს, მოშორებით კი, ოკეანეში, შესაძლოა, ვეშაპებიც დაინახოთ.

 

7. ივლისი — ოქსვიჩის ყურე, დიდი ბრიტანეთი

დიდი ბრიტანეთის ყველაზე ლამაზი სანაპიროს სანახავად უელსში მოგიწევთ მოხვედრა. ოქსვიჩი იდეალური ადგილია ცურვისა და ოკეანესთან სეირნობისთვის. გარდა ამისა, შეგიძლიათ იქ არსებული ეროვნული პარკითაც დატკბეთ, სადაც 600-ზე მეტი სხვადასხვა სახეობის ყვავილოვან მცენარეს შეხვდებით.

 

8. აგვისტო — გულუდოს სანაპირო, მოზამბიკი

ეს, შესაძლოა, აფრიკაში ყველაზე ლამაზი სანაპირო იყოს. როდესაც ამ სანაპიროზე იმყოფები, თვალწინ ინდოეთის ოკეანეა, უკან კი აფრიკის ველური ბუჩქნარი. ახლომდებარე გორიდან მზის ჩასვლის ფონზე სპილოების სილუეტების ყურებაცაა შესაძლებელი. ეგზოტიკური მოგზაურობისთვის ეს საუცხოო ადგილია.

 

9. სექტემბერი — მიკონოსი, საბერძნეთი

მიკონოსი უკვე ძალიან დიდი ხანია ერთ-ერთ ყველაზე პოპულარულ ტურისტულ ადგილად ითვლება. ამის მიზეზი კი მარტივია. სანაპირო, რომელსაც Super Paradise ეწოდება ქალაქიდან 7 კილომეტრიაა დაშორებული და აქ ყველაფერს იპოვი, რაც გართობისთვის გჭირდება.

 

10. ოქტომბერი — ეილათი, ისრაელი

ეს ის ადგილია, სადაც უგემრიელესი კერძები, გამორჩეული სტუმართმოყვარეობა და საუცხოო სასტუმროები დაგხვდებათ. წითელი ზღვა განსაკუთრებით უყვართ მყვინთავებს. სანაპიროს მოყვარულებს კი შეუძლიათ ქვიშაზე წამოწვნენ და პეტრას მთის ხედებით დატკბნენ.

 

11. ნოემბერი — უან ფუტ აილენდი, კუკის კუნძულები

კუკის კუნძულები წყნარ ოკეანეში მდებარეობს, გარშემო კი თეთრი ქვიშა, პალმის ხეები და თვალმიუწვდენელი ოკეანეა. ერთი ბოთლი შამპანიური, პიკნიკის მაგიდა და ჰამაკი, მეტი ალბათ არც არაფერია საჭირო.

 

12. დეკემბერი — კულებრა, პუერტო-რიკო

კუნძული, რომელსაც სამ საუკუნეზე მეტი მეკობრეები თავშესაფრად იყენებდნენ, პუერტო-რიკოდან 27 კილომეტრითაა დაშორებული. თეთრი ქვიშის სანაპირო, რომელიც ჯუნგლების სიმწვანეშია ჩაფლული, 2 კილომეტრი გრძელდება. ეს კარიბის ზღვის ერთ-ერთი ყველაზე კამკამა და სუფთა ადგილია.

 

წყარო: On.ge

 

ვრცლად ნახვა
სტამბოლის აეროპორტში ჭკვიანი საძილე კაფსულები გამოჩნდა

მათთვის, ვისაც აეროპორტში ძილი უჭირდათ და ამას სკამზე ვერ ახერხებდნენ – სასიამოვნო სიახლეა. სპეციალური სათავსო, სადაც ბარგის შენახვას შეძლებთ, სხვადასხვა მოწყობილობის დამუხტვის საშუალებები და რაც მთავარია, კონფორტული ძილის შესაძლებლობა – ამ ყველაფერს საძილე კაფსულა მოიცავს, რომელიც სტამბოლის ახალ აეროპორტში დააამონტაჟეს.

აეროპორტ „სტამბოლში“ განთავსებული საძილე კაფსულები, სახელწოდებით İGA Sleepod-ი, რამდენიმე დღეში მგზავრებში საკმაოდ მოთხოვნადი გახდა. მგზავრს 1 საათით İGA Sleepod-ის დაქირავება 9 ევრო დაუჯდება. აღსანიშნავია, რომ კაფსულაში ძილის ყველა მსურველი ერთჯერადი თეთრეულის ნაკრებით ისარგებლებს.

როგორც უკვე გითხარით, მგზავრი მოსვენების გარდა, კაფსულაში სხვადასხვა მოწყობილობის დამუხტვას და საკუთარი ნივთების შენახვასაც შეძლებს.

შეგახსენებთ, თურქეთში რესპუბლიკის გამოცხადებიდან 95 წლისთავზე, 2018 წლის 29 ოქტომბერს მსოფლიოში ყველაზე დიდი 200 მილიონ მგზავრზე გათვლილი აეროპორტი „სტამბოლი“ გაიხსნა. სტამბოლის ახალმა აეროპორტმა ათა თურქის აეროპორტი ჩაანაცვლა.

ახალი აეროპორტი ტექნიკური მონაცემებით მართლაც შთამბეჭდავია:

  • ბიუჯეტი $12 მლრდ

  • 6 ასაფრენ-დასაფრენი ბილიკი

  • 42 კმ-იანი საბარგო სისტემა

  • 53 000 კვადრატული მეტრი duty free ზონა

  • 500 თვითმფრინავზე გათვლილი ანგარი

  • 70 000 ავტომობილზე გათვლილი ავტოსადგომი

  • ჯამური ფართობი 76 000 000 კვადრატული მეტრი

 

ვრცლად ნახვა
რა უნდა გაითვალისწინოთ, თუკი დამწყები მოგზაური ხართ?

თუ სამოგზაუროდ პირველად მიდიხარ (ან პირველად მიდიხარ მარტო), შეიძლება აღტაცებასთან ერთად აფორიაქებაც იგრძნო და თან გსდევდეს განცდა, რომ რაღაც გავიწყდება.

იმისთვის, რომ სანერვიულო მოგაკლდეს და მოგზაურობით დატკბე, ჩამოვწერეთ რამდენიმე პუნქტი, რომელზეც იქამდე უნდა იზრუნო, სანამ გამგზავრების თარიღი მოახლოვდება.

1. საბუთები

მოაგროვე ყველა საჭირო საბუთი — ბილეთები, სასტუმროს ჯავშანი, ბანკის ამონაწერი, დაზღვევა — ამობეჭდე და ზურგჩანთაში საიმედო ადგილას შეინახე. მესაზღვრეების განწყობას წინასწარ ვერ გამოიცნობ, თუმცა თუ მათ მოვალეობის შესრულებას მოწესრიგებული საბუთებით გაუმარტივებ, კეთილგანწყობას დაიმსახურებ.

გაითვალისწინე, რომ საქმის გამარტივების მიზნით დოკუმენტების ციფრული ვერსია შეიძლება გამოგადგეს. ამიტომ გადაუღე ყველა საბუთს სურათი და შეინახე ისინი მობილურში.

2. ამინდი

ამინდი ერთ-ერთი ის მთავარი პუნქტია, რომელზეც გამგზავრებამდე უნდა იფიქრო. სწორედ ამის მიხედვით უნდა შეარჩიო რას ჩაიცვამ მოგზაურობის დღეებში და ბარგიც შესაბამისი სამოსით უნდა გაავსო. ჰაერის ტემპერატურა წინასწარ AccuWeather-ზე ან The Weather Channel-ზე შეგიძლია შეამოწმო.

3. წელის ჩანთა

ნივთი, რომელიც აუცილებლად დაგჭირდება მოგზაურობისას, წელის ჩანთაა. პირველ რიგში იმიტომ, რომ ბევრად სწრაფად მოძებნადია იქ მოთავსებული საფულე, პასპორტი, ბილეთი თუ სხვა ყოველდღიური ნივთები. მეორე მიზეზი, რაც მის აუცილებლობაში დაგარწმუნებთ, უსაფრთხოებაა — ზურგჩანთიდან შეიძლება ნივთები ისე ამოგაცალონ, რომ ამას ვერც მიხვდე, წელის ჩანთა კი სხეულის იმ მხარეს გაქვს მოთავსებული, სადაც თვალებია. ასე რომ მისი მოფრთხილებაც ბევრად უფრო მარტივია.

4. ინტერნეტი

უცხოეთში როუმინგი და ინტერნეტის სარგებლობა ქართული პროვაიდერით არც ისე იაფი დაგიჯდება, ამიტომ ამ პუნქტზეც წინასწარ უნდა იფიქრო და აუცილებელ ხარჯებში შეიტანო. თუ გამგზავრებამდე შეიძენ შენთვის საჭირო პაკეტს, უცხო ქალაქის ქუჩებში ვაიფაის დასაჭერად უმიზნო სიარული ნაკლებად მოგიწევს.

5. გუგლის რუკა

Google Map-ს ასეთი ფუნქცია აქვს — შეგიძლია წინასწარ მონიშნო ადგილები, რომლის ნახვაც უცხო ადგილას გსურს და ამ ადგილების რუკა მობილურში ჩამოტვირთო, შემდეგ კი ინტერნეტის გარეშეც გამოიყენო. ასე რომ, თუ რუკისთვის მეგაბაიტების დახარჯვა არ გსურს, შეგიძლია ეს რჩევა გამოიყენო. მეორე ვარიანტი ისაა, რომ ქუჩაში ნამდვილი ტურისტივით მოიქცე, ადგილობრივები გაიცნო და სასურველ ადგილამდე კითხვა-კითხვით მიაგნო. გააჩნია რამდენი დრო გაქვს და შედის თუ არა ახალი მეგობრების შეძენა შენს სამოგზაურო გეგმაში.

6. მობილურის მეხსიერება

მოგზაურების უმრავლესობისთვის წარმოუდგენელია ახალი ადგილის გაცნობა სურათების გადაღების გარეშე. თუ ყველა ნაბიჯის აღმოჩენების გადაღებას და ფეისბუქსა და ინსტაგრამზე მეგობრებისთვის გაზიარებას აპირებ, არ დაგავიწყდეს რომ მობილურის გადავსებული მეხსიერებით პრობლემები შეგექმნება.

7. ბარგი

სანამ ბარგს ჩაალაგებ, აუცილებლად გაეცანი აეროპორტის პოლიტიკას ბარგის წონისა და ზომის მიხედვით, თორემ საყვარელი ფეხსაცმლის დატოვება ან ფულის დამატება შეიძლება დაგჭირდეს.

8. ჯავშანი

თუ სახლში ან ჰოსტელში მიდიხარ, დაჯავშნისას ბინის პატრონს წინასწარ უნდა გაესაუბრო და თავი გააცნო. დადებითი კომუნიკაციის შემთხვევაში, შეიძლება უკან გამომგზავრების დღეს ბარგის ბინაში შენახვაზეც კი დაითანხმო.

9. ბარგის ჩაბარება

თუ ქალაქში დილით უნდა ჩაფრინდე და სახლში მისვლაში დროის დახარჯვა ან ქალაქის ჩემოდნით მოვლა არ გინდა, წინასწარ მოიძიე ბარგის ჩაბარების პუნქტები, შეარჩიე ყველაზე მოსახერხებელი ადგილი და მოგზაურობის პირველ დღეს იქეთ გაეშურე. იგივე სერვისი წამოსვლის დღესაც შეგიძლია გამოიყენო, თუ ბინის პატრონს ბარგის დღის ბოლომდე შენახვაზე ვერ დაითანხმებ.

10. შემოწმება

გადავწყვიტეთ ყველაზე მნიშვნელოვანი პუნქტი ბოლოსთვის შემოგვენახა. აუცილებლად წინასწარ გაეცანი აეროპორტში გასავლელ პროცედურებს და არც ერთი წამით დაუშვა, რომ აეროპორტში "ცოტა დაგვიანება მოსულა". გელოდება რეგისტრაცია, ბარგის ჩაბარება, უსაფრთხოების კონტროლის გავლა და ა.შ. იდეალურ შემთხვევაში აეროპორტში სამი საათით ადრე უნდა მიხვიდე, თუმცა აეროპორტების რეკომენდაცია მინიმუმ ორი საათია.

ვრცლად ნახვა
10 ადგილი, რომლის მონახულებაც 2020-ის გეგმაში უნდა ჩაწეროთ

უკვე მოფიქრებული გაქვთ, სად უნდა იმოგზაუროთ 2020 წელს? მსოფლიო ძალიან მრავალფეროვანი და ამოუწურავია, თუმცა, ჩვენ შეგირჩევთ იმ განსაკუტრებულ ადგილებს, რომლებიც აუცილებლად უნდა მოინახულოდ მომავალ წელს.  ახლავე შეგიძლიათ დაიწყოთ მზადება მოგზაურობისათვის.

ეს ის ადგილებია, რომლებიც, ჩვენი აზრით, ბევრად მეტად უნდა იყოს დაფასებული მოგზაურების მიერ.

 

1. მიავანა, მადაგასკარი

თუ ანიმაცია მადაგასკარი ნანახი გაქვთ, ალბათ, გარკვეული წარმოდგენა უკვე შექმნილი გაქვთ ამ კუნძულზე, თუმცა არ გეგონოთ, რომ ჯუნგლების და გარეული ცხოველების ლუკმად გიმეტებთ. ქალაქი მიავანა სავსეა კეთილმოწყობილი სასტუმროებით, ხოლო თუ მეფე ჯულიანის ფანებს გული გწყდებათ, შეგიძლიათ, რომ გული წყალქვეშა ტურებს გადააყოლოთ.

2. სტრასბურგი, საფრანგეთი

საფრანგეთის ეს ქალაქი ავტორიტეტულ სასამართლოსთან ასოცირდება, მაგრამ თუ სასამართლოს დარბაზი თქვენში აღტაცებას არ იწვევს, უნდა იცოდეთ, რომ სტრასბურგი სავსეა ულამაზესი ქუჩებით და პატარა ფერადი სახლებით. ერთ-ერთი მოგზაურის თქმით, სტრასბურგი დისნეის ზღაპარს უფრო ჰგავს, ვიდრე ნამდვილ ქალაქს, მაგრამ როგორი ლამაზიც არ უნდა იყოს სურათები, მაინც ჯობია, რომ საკუთარი თვალით ნახოთ.

3. ქემი, ფინეთი

 

ავრორას, იგივე ჩრდილოეთის ციალის დანახვა მხოლოდ რამდენიმე ქვეყანაშია შესაძლებელი. ფინეთის პატარა ქალაქი ქემი სწორედ ასეთ ადგილებს მიეკუთვნება. ჩრდილოეთის ცილის დანახვა მხოლოდ მარტის ბოლოს არის შესაძლებელი, მაგრამ ვიზალიბერალიზაციის გამო, ნებისმიერ დროს შეგიძლიათ ბილეთის ყიდვა და ფინეთში გამგზავრება.

4. ვენეცია, იტალია

 

 

ვენეცია აუცილებლად უნდა ნახოთ, სანამ ბოლომდე გაუჩინარდებოდეს წყალში. მის მოსანახულებლად მრავალი მიზეზი არსებობს, თუმცა, ქალაქის მთავარი მოვლენა თებერვლის კარნავლია, რა დროსაც მილიონი ადამიანი ქუჩაში ნიღბებით გამოდის და ზეიმობს. კარნავალი იმდენად მნიშვნელოვანი მოვლენაა, რომ ჩრდილოეთ იტალიაში მცხოვრებ ბავშვებს სწავლა ოთხი დღით უწყდებათ.

5. ბერლინი, გერმანია

ბერლინი არა მხოლოდ კლუბების, არამედ მუზეუმების ქალაქიცაა. თანამედროვე ხელოვნების მუზეუმით დაწყებული, ჰოლოკოსტის მემორიალით დამთავრებული, ქალაქი უამრავ ისტორიულ მონუმენტს უყრის თავს. თუ ზაფხულში წახვალთ, შეგიძლიათ რომელიმე ტბის გვერდით მწვანე ბალახზე წამოწვეთ და დაფიქრდეთ იმაზე, რა კარგი რამაა ევროპა!

 

 

6. კლუჟ-ნაპოკა, რუმინეთი

 

თუ რუმინეთი თქვენთვის მხოლოდ გრაფ დრაკულასთან ასოცირდება, ესე იგი, კიდევ ბევრი რამ გაქვთ აღმოსაჩენი: ტრანსილვანიის დასავლეთით მდებარე პატარა ქალაქი კლუჟ-ნაპოკა ტყის პირასაა გაშენებული, რომელიც რუმინეთის ბერუდის სამკუთხედადაა ცნობილი. ლეგენდის თანახმად, ამ ტყეში პარალელური განზომილების კარი იმალება. სიმართლეა ეს თუ მითი? არავინ იცის, რადგან პარალელური განზომილებიდან ჯერ არავინ დაბრუნებულა.

7. ბილუნდი, დანია

 

 

ლეგოლენდად ცნობილი პარკი ბილუნდში მდებარეობს. კოპენჰაგენიდან რამდენიმე საათით დაშორებული ქალაქი ლეგოს დაბადების ადგილად ითვლება. პარკში ყველაფერი ლეგოსგანაა აშენებული, სახლებიც კი, ხოლო თუ დღის ბოლოს ლეგოების ყურება ძალიან დაგღლით, შეგიძლიათ სკანდინავიის უდიდეს პარკს, ლალანდიას წყლის პარკს ესტუმროთ.

8. სფლითი, ხორვატია

 

ვისაც მ. ნაით შამელანის ფილმი აქვს ნანახი, შეიძლება სახელის გამო წასვლა გადაიფიქროს, მაგრამ არ შეგეშინდეთ. ეს ქალაქი ფსიქოლოგიური თრილერისთვის იდეალური ლოკაცია სულაც არაა. სფლითი კონტინენტის ერთ-ერთი ყველაზე ძველი დასახლებაა და მის მთავარ ღირსშესანიშნაობას 305 წელს რომის იმპერატორ დიოკლეტიანესათვის აშენებული სასახლე წარმოადგენს.

9. იუკასარვი, შვედეთი

შვედეთის ერთ-ერთ ყველაზე ცივ ადგილას სასტუმრო დგას, რომელიც მთლიანად ყინულისგანაა აშენებული: საწოლი, სასტუმროს ნომრები, მისაღები ყველაფერი ყინულშია გამოკვეთილი. შემოსასვლელში ასევე ყინულის სკულპტურები დგას. ეს ისეთი გამოცდილებაა, რომელიც არასდროს დაგავიწყდებათ, თუმცა მცივანებისათვის ეს ადგილი ნამდვილად არაა განკუთვნილი.

10. ბრატისლავა, სლოვაკეთი

 

 

ალბათ, ყველას გახსოვთ "ევროტური" სადაც სკოტი და მისი მეგობრები ბრატისლავაში სულ შემთხვევით მოხვდებიან. ისიც გემახსოვრებათ, რომ ხუთვარსკვლავიანი სასტუმროს დასაქირავებლად მარტო დოლარი და ოცდაშვიდი ცენტი ჭირდებათ. შეიძლება თქვენ ოდნავ მეტი ფულის წაღება დაგჭირდეთ, მაგრამ უძველესი მოზაიკით მოხატული ციხესიმაგრეების დასათვალიერებლად ნამდვილად ღირს. ბრატისლაველები ძალიან გაბრაზებულები არიან ამ ფილმზე, ასე რომ, ხუმრობები ამ თემასთან დაკავშირებით სჯობს ხმამაღლა არ თქვათ.

ვრცლად ნახვა
ბანგკოკის მიმართულებით პირდაპირი ჩარტერული რეისები დაინიშნა

ტაილანდური ავიაკომპანია Thai AirAsia X საქართველოს მიმართულებით პირდაპირი ჩარტერული რეისების შესრულებას იწყებს.

ბანგკოკი-თბილისი-ბანგკოკის საჰაერო ხაზზე ფრენები 2019-2020 წლების ზამთრის სანავიგაციო სეზონის განმავლობაში, კერძოდ 25, 27-28, 29 დეკემბერს და პირველ, 2 და 6 იანვარს (ექვსი ფრენა) განხორციელდება.

პირდაპირი ჩარტერული რეისები Airbus A330 ტიპის საჰაერო ხომალდებით შესრულდება და საქართველოში ტურისტების ჩამოყვანაზე იქნება ორიენტირებული.

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ, ტაილანდურ ავიაკომპანიას ჩარტერული საჰაერო მიმოსვლის განხორციელების ნებართვა თავდაპირველად ორ რეისზე მიენიჭა (21 ოქტომბერი). დამატებითი განაცხადის საფუძველზე კი, ოთხი რეისის შესრულებისთვის აუცილებელი ნებართვა 27 ნოემბერს გაიცა.

 

 

ვრცლად ნახვა
ევროკავშირის ქვეყნებში გამგზავრებისას საქართველოს მოქალაქეები „გაფრენის წინა შემოწმებას გაივლიან

ერთ-ერთი საკითხი, რომელიც მალე დადგება დღის წესრიგში, იქნება გაფრენის წინა შემოწმების პროცედურა, რაც გვჯერა, რომ არის მნიშვნელოვანი ნაწილი სისტემის სტაბილურობისთვის, - ამის შესახებ საქართველოში ევროკავშირის ელჩმა კარლ ჰარცელმა კონფერენციის დაწყებამდე განაცხადა, რომელიც თავისუფალ სავიზო რეჟიმსა და მიგრაციის საკითხებს მიეძღვნა.

„ჩვენ ვეძებთ გზებსა და საშუალებებს, რათა დავეხმაროთ საქართველოს სასაზღვრო პოლიტიკაში იმისთვის, რომ ის უფრო ეფექტური გახდეს და გაძლიერდეს ახალი კანონმდებლობა. ეს მნიშვნელოვანია იმისთვის, რათა მინიმუმამდე დავიდეს დარღვევების რაოდენობა, უზრუნველვყოთ სრული ლეგალურობა ყველა პარამეტრით, იყოს გასაგები და მუშა. უნდა გავაგრძელოთ კვლევა და არსებული ტრენდი უნდა შევცალოთ. მინდა ხაზგასმით ვთქვა, რომ ეს ეხება ევროკავშირისა და საქართველოს ურთიერთობას და ძალიან მნიშვნელოვანი იქნება, რომ ყველა პოლიტიკურმა მხარემ და ყველა აქტორმა საქართველოში ეს სერიოზულად მიიღოს“, - განაცხადა საქართველოში ევროკავშირის ელჩმა.

კარლ ჰარცელმა თავშესაფრის მაძიებლებთან დაკავშირებულ პრობლემებზეც ისაუბრა და აღნიშნა, რომ ევროპის ქვეყნებში სულ უფრო ცოტა საქართველოს მოქალაქე შეძლებს თავშესაფრის მიღებას.

„უკვე მრავალია თვეა პრობლემები გავაქვს დაუსაბუთებელ თავშესაფრის მაძიებლებთან. თავშესაფრის სისტემა მოწყობილია, რათა დაიცვას ადამიანები, რომლებიც გამოექცნენ ომს, კონფლიქტს ან დევნას. აქედან გამომდინარე, საქართველოს მოქალაქეების მხოლოდ ძალიან მცირე რაოდენობა მიიღებს თავშესაფარს. თუმცა ეს მნიშვნელოვან ზეწოლას ახდენს სისტემაზე და დაკავშირებულია სხვა სახის პრობლემებთან. ზოგჯერ ამას აქვს კრიმინალური ბუნება, ზოგჯერ ეს ეხება სამედიცინო სისტემის გამოყენებას ანუ არსებულ წესებთან თანხმობაში არ მოდის. ხაზგასმით უნდა აღვნიშნო, რომ ჩვენი თანამშრომლობა საქართველოს ხელისუფლებასთან წარმატებული იყო, ჩვენ ვხედავთ ძალისხმევას, ამბიციას, რათა ეს პრობლემები მოგვარდეს. ბევრი ეს პრობლემა თავისი ბუნებით საკმაოდ ჩახლართულია და ჩვენ ერთად ვიმუშავებთ, რათა ვიპოვოთ ეფექტური გამოსავალი. ვხედავთ, რომ გვყავს ძლიერი პარტნიორი საქართველოში“, - განაცხადა კარლ ჰარცელმა.

მან იმ უპირატესობებზეც გაამახვილა ყურადღება, რომელიც ვიზალიბერალიზაციას აქვს საქართველოსთვის და ევროპისთვისაც.

„საქართველოს 500 ათასმა მოქალაქემ უკვე გამოიყენა თავისუფალი სავიზო რეჟიმით მინიჭებული შესაძლებლობა. ეს ძალიან კარგია, რადგან ადამიანებს აკავშირებს, ხელს უწყობს მოგზაურობას ორივე მიმართულებით, ეს კარგია ადამიანების კონტაქტისთვის, ბიზნეს კონტაქტებისთვის“, - განაცხადა საქართველოში ევროკავშირის ელჩმა.

 

ვრცლად ნახვა
დიდი „გადაფრენა“ თბილი ქვეყნებისაკენ,oktravel-თან ერთად!

სიცივისგან თავის დაღწევის სხვადასხვა ხერხი არსებობს: შეგიძლია ჩაიცვა თბილად, მიუჯდე ბუხარს/გამათბობელს, დალიო ცხელი, ბალახების და დეკის ჩაი,  ან აირჩიო ყველაზე ოპტიმალური ვარიანტი და თავად მიხვიდე სითბოსთან.  თუ თქვენც თბილ ქვეყნებში „გადაფრენა“ გირჩევნიათ, ერთად შევარჩიოთ სასურველი მიმართულება.

 

ეგვიპტე, შარმ ელ შეიხი

ცივ სეზონზე ცხელი ეგვიპტე ყველასათის სასურველი მიმართულებაა, მისი კურორტები, როგორებიცაა, ჰურგადა და შარმ-ელ-შეიხი ტურისტებისათვის მიმზიდველ ადილს წარმოადგენს. ოქროსფერი ქვიშა, ლურჯი ზღვა, მცხუნვარე მზე, ეგზოტიკური გარემო და თანამედროვე სტანდარტების მომსახურება, ეს იმ უპირატესობათა ჩამონათვალია, რომლებიც ეგვიპტურ „ტურნეს“ სასიამოვნო და წარუშლელ მოგონებად დატოვებენ თქვენს მეხსიერებაში. ქალაქი მე-20 საუკუნის დასაწყისში დაარსდა, ის თავდაპირველად მეთევზეების პატარა სოფელი იყო, მაგრამ 1980-იანი წლებიდან ქალაქი გაფართოვდა, ამაში წვლილი ეგვიპტელ და უცხოელ ინვესტორებს მიუძღვით, დღეს ჰურგადა წითელი ზღვის ერთ-ერთი მთავარი კურორტია. სასტუმროები უზრუნველყოფენ საზღვაო აქტივობებს, როგორებიცაა, სერფინგი, წყალქვეშ ყვინთვა და სხვ. ზაფხულის თვეებში ჰაერის ტემპერატურა 40 გრადუს ცელსიუსს აღწევს, ამიტომ ტურისტების უმრავლესობა ჰურგადას ზამთრის სეზონზე ირჩევს და შობა-ახალი წლის დასვენებას იქ ატარებს.

 

 

 

 

დუბაი

ყველასათვის საოცნებო დუბაი ნებისმიერ სეზონზე ტურისტებისათვის სასურველი ადგილია, ის სპარსეთის ყურის სამხრეთ-აღმოსავლეთ სანაპიროზე მდებარეობს. დიდი ხანი არაა, რაც დუბაიმ მსოფლიოს ყურადღება მიიქცია ბევრი ინოვაციური პროექტით – დიდი კონსტრუქციებითა თუ სხვადასხვა სპორტული ღონისძიებებით. ეს ქალაქი გახდა სიმბოლური თავისი ცათამბჯენებითა და მაღალსართულიანი შენობებით, განსაკუთრებით მსოფლიოში ყველაზე მაღლი შენობით – ბურჯ-ხალიფათი. დუბაი დამსვენებლებს უამრავ სანახაობას და აქტივობას ჰპირდება, თქვენ შეგიძლიათ გაერთოთ როგორც პლაჟზე, ასევე რაც არ უნდა გასაკვირი იყოს, დაკავდეთ თხილამურებზე სრიალით. დუბაი, ასევე,  ცნობილია თავისი სავაჭრო ცენტრებით და ჰოლდინგებით.

 

 

 

დუბაი

ტროპიკული კუნძული შრი-ლანკა  ცნობილია თავისი ეგზოტიკური სანახაობებით და უნიკალური ლანდშაფტით. მას სტრატეგიული პოზიცია უჭირავს ინდოეთის ოკეანეში. შრი-ლანკაში მოგზაურობისას, თქვენ შეგიძლიათ ეზიაროთ კუნძულის ეგზოტიკურ სანახაობებს, როგორებიცაა, მაგალითად, სპილოებით გასეირნება, ბრინჯის აღების პროცესი, მისტიკური და უძველესი ადგილების მონახულება, ძველი საღმრთო სკულპტურების ნახვა. ამასთან ერთად, თქვენ შეგიძლიათ ისიამოვნოთ შრი-ლანკას ულამაზესი სანაპიროებით, ფირუზისფერი ზღვით, თანამედროვე სტანდარტების სასტუმროების მომსახურებით და დააგემოვნოთ ადგილობრივი ტრადიციული სამზარეულო.

 

 

 

თუ თქვენ სიცივემ შეგაწუხათ და სითბოს ნატრობთ ნუ დაელოდებით მას, თუ სითბო არ მოდის თქვენთან, თავად მიდით სითბოსთან, დროა მოიწყოთ საკუთარი დიდი „გადაფრენა“ თბილი ქვეყნებისაკენ, ამაში Oktravel.ge დაგეხმარებათ.

ვრცლად ნახვა
სად უნდა იმოგზაუროთ ახალ წელს?!

ბუდაპეშტიუნგრეთი

ლამაზი, გემრიელი, ახლო, იაფი. კიდევ რაიმე სხვა მიზეზი გჭირდებათ, რომ ახალ წელს სწორედ უნგრეთის დედაქალაქში შეხვდეთ?

ქუთაისიდან ბუდაპეშტის მიმართულებით ავიაბილეთის ღირებულება 90 ლარიდან იწყება. განთავსება და გართობაც აქ გაცილებით უფრო იაფია, ვიდრე ევროპის სხვა დედაქალაქებში. მაგრამ ეს სულაც არ ნიშნავს, რომ ბუდაპეშტი ზეიმობის მასშტაბით სხვა ქალაქებს ჩამოუვარდება. ქალაქი ჩაფლულია საახალწლო დეკორაციებსა და შუქებში, ცენტრალურ ქუჩებზე მდებარე ბაზრობებზე გლინტვეინის, შოკოლადისა და ტკბილეულობის არომატი ტრიალებს, მოედნებზე სადღესასწაულო კონცერტები იმართება… მოკლედ, ნამდვილი ზღაპარია!

სად უნდა აღნიშნოთ ახალი წელი ბუდაპეშტში

სამახსოვრო ახალი წლის ღამის გასატარებლად ბუდაპეშტი რამდენიმე ვარიანტს გთავაზობთ. ყველაზე ნათელი და მხიარული, რა თქმა უნდა, ქალაქის ცენტრშია, გმირთა მოედანზე ეფექტური ფეიერვერკით, შამპანურით, სიმღერებითა და ცეკვებით.

ახალ წელს ასევე შეგიძლიათ შეხვდეთ საკრუიზო გემზე და ამასთანავე სადღესასწაულო ბუდაპეშტით დატკბეთ. უბრალოდ წარმოიდგინეთ: თქვენ ახლო ადამიანების გარემოცვაში იმყოფებით, გიმასპინძლდებიან ღვინით, უგემრიელესი ვახშმით, გვერდით მორთული გემები დაცურავენ, შუაღამისას სანუკვარ სურვილს ჩაიფიქრებთ და ქალაქის პანორამით დატკბებით.

თუ ეს სცენარი თქვენთვის ძალიან მშვიდია, რესტორანში აღსანიშნავად გაემართეთ. იქ ნამდვილად ბევრ გასართობს იპოვით. ადგილი წინასწარ დაჯავშნეთ, ღირებულება ერთ პერსონაზე 100 ევროდან იწყება.

  • დღესასწაულების შემდეგ შეგიძლიათ სეჩენის ეწვიოთ – ევროპის უდიდეს თერმულ კომპლექსს. საბანაოები, აბანოები, აუზები, რომელთაგან ერთ- ერთი ღია ცის ქვეშ მდებარეობს, სწორედ ის არის, რაც ენერგიის აღსადგენად გესაჭიროებათ.
  • თუ ბავშვებთან ერთად ისვენებთ, ეწვიეთ ქალაქის ცენტრში მდებარე საციგურაო მოედანს, ცირკს ან ზოოპარკს. პატარა ტურისტები ამას ნამდვილად დააფასებენ.

 

ბერლინი, გერმანია

ახალი წელი ბერლინში ნამდვილად არ იქნება მოსაწყენი! მთავარია სწორ განწყობაზე იყოთ და თქვენთვის ძვირფას ადამიანებთან ერთად პოტსდამერ პლატცზე მდებარე „ზამთრის სამყაროში“ წახვიდეთ. ეს არის ნამდვილი ზამთრის სამეფო – საციგურაო მოედნით, ყინულებისა და თოვლის სასრიალოებით, ბავარიული კერლინგით, კარუსელებით, ალპური რესტორნებით, სადღესასწაულო კერძებითა და გართობით.

ხოლო თუ სპორტი გიყვართ, ნამდვილად დააფასებთ საახალწლო საკარნავალო გარბენს ბერლინში. საქმე იმაშია, რომ ზეიმის დაწყებამდე ადგილობრივები მოსამზადებელ ვარჯიშს ამჯობინებენ. 31 დეკემბერს საშობაო ნიღბებსა და კოსტიუმებში გამოწყობილი ათასობით ადამიანი დარბის ქალაქის ქუჩებში და ქმნის განწყობას საკუთარი თავისა და სხვებისთვის. ამ ღონისძიებას შეგიძლიათ არა მხოლოდ თვალყური ადევნოთ, არამედ თავადაც მიიღოთ მონაწილეობა.

რა უნდა გავაკეთოთ საახალწლო ღამეს ბერლინში

ახალ წელს ბერლინში სამართლიანად უწოდებენ „წლის წვეულებას”, რადგან ძნელად თუ იხილავთ სადმე ისეთ მასშტაბურ მოქმედებას, როგორიც ბრანდერბურგის კარიბჭესთან ხდება. აქ ათობით ათასი კი არა, დაახლოებით მილიონი ადამიანი იკრიბება – უბრალოდ წარმოიდგინეთ! მთელი ღამე სალუტი და ფეიერვერკი არ წყდება, სტუმრების განწყობაზე მსოფლიოში ცნობილი ბენდები და დიჯეები ზრუნავენ, გლინტვეინის, შამპანურისა და ლუდის მდინარეები მოედინება. მასშტაბური აღნიშვნა კი მხოლოდ დილით სრულდება.

დიახ, საახალწლო წვეულებები ბერლინში განთქმულია თავისი მასშტაბით. მაგალითად, Silvester Club Berlin, Spreepalais Alexanderplatz, Haus Ungarn, სტუმრებს გასართობად რამდენიმე სართულს სთავაზობს და თითოეულ სართულს თავისი მუსიკალური მიმართულება და ქალაქის ცენტრის შესანიშნავი ხედი აქვს. გართობა ახალი წლის დადგომამდე რამდენიმე საათით ადრე იწყება, შესასვლელი ბილეთის ფასი – 80 ევროდან.

  • თუ ახალი წლის აღსანიშნავად ბავშვებთან ერთად ჩამოხვედით, აუცილებლად ეწვიეთ გერმანიის ერთ-ერთ ყველაზე ცნობილ სადღესასწაულო სპექტაკლს – „მაკნატუნა“. წარმოდგენები იმართება დღესასწაულამდე და დღესასწაულის შემდეგ ერთი კვირის განმავლობაში, ბილეთების ღირებულება – 40 ევროდან.
  • ზამთრის ბერლინი – სამოთხეა შოპინგის მოყვარულთათვის. გარდა იმისა, რომ მთელ ქალაქში ათობით ბაზრობა და საშობაო ბაზარია მიმოფანტული, ყველა სავაჭრო ცენტრი, ჰიპერმარკეტი და აუთლეტი ხსნის ზამთრის გაყიდვების სეზონს შთამბეჭდავი ფასდაკლებებით.

 

მადრიდიესპანეთი

მადრიდში ზამთრის მთავარი დღესასწაული შობაა, მაგრამ ესპანელები არ არიან დაჩვეული წვეულებების გამოტოვებას, ამიტომ ისინი ახალ წელსაც დიდი ზეიმით აღნიშნავენ.

დღესასწაულზე ქალაქი ბრწყინავს ფერადი შუქებით, ყველგან ტრადიციული ესპანური ტკბილეული და ცქრიალა ღვინოა. სხვათა შორის, თუ ჩვენ ახალი წლის ღამეს ჩვეულებრივ შამპანურს ვსვამთ და სურვილს ჩავუთქვამთ, ესპანეთში საათის თითო დარტყმაზე თითო ყურძნის მარცვალს მიირთმევენ – სულ 12 ცალს, რათა მომავალი წლის ყველა თვე ბედნიერი იყოს. თუ ყურძნის ყველა მარცვლის შეჭმას მოასწრებთ, თქვენი სანუკვარი სურვილი ახდება. სხვათა შორის, დღესასწაულებზე წარმატების ყურძენი უკვე 12 ცალიან შეფუთვაში იყიდება.

სად წავიდეთ ახალ წელს მადრიდში

მადრიდის მთავარი ნაძვის ხეები განთავსებულია მოედნებზე პუერტა-დელ-სოლი, რედ-დე-სან-ლუისიკოლონი (ჰენოვას ქუჩის კვეთაზე), კალიაოს მოედანზე, სან-ხუან-დე-ლა-კრუსზე, ესპანეთის მოედანსა და ფუენკარალის ქუჩაზე.

სადღესასწაულო ბაზრობები ჩვეულებრივ მუშაობს მოედნებზე პლასა-დე-ხასინტო-ბენავენტე და სანტა-კრუსი. მოედნებზე კოლონი და სიბელესი კი – საციგურაო მოედნები.

  • ახალი წლის შემდეგ მადრიდში ძალიან გულუხვი ზამთრის გაყიდვები იწყება. ასე რომ, თუ შოპინგის მოყვარული ბრძანდებით, აქ უნდა ჩამოხვიდეთ.
  • რაც შეეხება ამინდს დეკემბერში – დღის განმავლობაში ჰაერის ტემპერატურა დაახლოებით +10°С, ღამით კი შეიძლება -2°С-მდე დაეცეს.

 

ბარსელონაესპანეთი

საახალწლო არდადეგები ბარსელონაში – ნათელი შოუებისა და მოვლენების მორევია. აუცილებლად ეწვიეთ ქალაქის ბაზრობებს საკათედრო ტაძართან ან საგრადა ფამილიასთან, დააგემოვნეთ სადღესასწაულო ტკბილეული, სასმელი, შეიძინეთ სუვენირები და საჩუქრები ახლობელი ადამიანებისთვის.

სად უნდა აღნიშნოთ ახალი წელი ბარსელონაში

ნათელი ემოციები გსურთ? არ გამოტოვოთ საახალწლო შოუ მონჟუიკის მთაზე, მომღერალ შადრევნებთან. აქ წყალი, მუსიკა, სინათლე და ფერადი ფეიერვერკი ერთ შთამბეჭდავ მოქმედებად იქცევა. და იგი ზუსტად ახალი წლის დადგომამდე იწყება, როდესაც გარშემო ათასობით ესპანელი მხიარულად ულოცავს მეგობრებსა და ნათესავებს.

ახალი წლის ღამეს შეგიძლიათ შეხვდეთ კატალონიის მოედანზეც, სადაც ასევე მასშტაბური ზეიმი იმართება. და ზუსტად შუაღამისას, როდესაც საათის ისრები 12-ს ჩამოჰკრავს, აგბარის კოშკზე (თანამედროვე ცათამბრჯენზე) ეფექტური სინათლის შოუ პროეცირდება.

მეორე დღეს ექსტრემალები სან-სებასტიანის პლაჟზე მიდიან, სადაც ტრადიციულად იმართება ახალი წლის „პირველი ბანაობა“. ყოველი წლის 1 იანვარს, 12:00 საათზე, ბარსელონას მაცხოვრებლები ზღვაში პირველ შეცურვას ახორციელებენ. წყლის ტემპერატურა +12-14°C ფარგლებშია, მაგრამ გაბედული ადამიანებისთვვის – შესანიშნავი საბაბია აქტიური ღამის შემდეგ ძალა მოიკრიბონ.

  • ახალი წელი, რა თქმა უნდა, ლამაზი და მხიარულია, მაგრამ თქვენ უნდა იხილოთ, თუ რა ხდება ბარსელონაში 5 იანვარს, სამი მეფის ტრადიციულ დღეს. საღამოს, ქალაქის ცენტრალურ ნაწილში წარმოუდგენელი საკარნავალო მსვლელობა იმართება, რომელშიც მონაწილე ასობით მსახიობი, მოცეკვავე, მუსიკოსი, აკრობატი გაგაოცებთ თავიანთი კოსტიუმებით და ყველა სტუმარსა და მაყურებელს ტონობით ტკბილეულით უმასპინძლდებიან.
  • ბარსელონაში საახალწლო პერიოდში, ჩვეულებრივ, უფრო თბილა, ვიდრე ევროპის ბევრ სხვა ქალაქში. ტემპერატურა ჩვეულებრივ +10-14°C ფარგლებშია.

 

ვენა, ავსტრია

ვენა წელიწადის ნებისმიერ დროს კარგია, მაგრამ სადღესასწაულო შუქების ფონზე განსაკუთრებით მყუდროა. ეწვიეთ მას და თავად დარწმუნდით.

სად უნდა აღნიშნოთ ახალი წელი ვენაში

31 დეკემბრის საღამოს ათასობით ადამიანი იკრიბება რატუშასთან, ისევე როგორც სხვა ცენტრალურ მოედნებსა და ქუჩებში. ისინი მოდიან ოჯახებთან, მეგობრებთან ერთად, უსმენენ ადგილობრივი შემსრულებლების კონცერტებს, ცეკვავენ, თბებიან, ბენგალის ცეცხლს ანთებენ და საახალწლო კაშკაშა ფეიერვერკს ელოდებიან.

ვენაში ახალ წელს ასევე შეგიძლიათ შეხვდეთ რატუშაში, ისტორიულ მუზეუმში, ფერსტელის სასახლეში და ქალაქის ბევრ სხვა ღირსშესანიშნავ ადგილზე. რა თქმა უნდა, რესტორნები და ღამის კლუბებიც მიესალმებიან სტუმრებს.

ახალი წლის აღნიშვნა ვენაში ასევე შესაძლებელია „მოძრაობაში“. მაგალითად, საიმპერატორო ექსპრესის „ლუქს“ ვაგონში, რომელიც ზუსტად შუაღამისას დუნაიზე გადაჭიმულ ხიდზე ჩერდება, რათა ყველა მგზავრმა სალუტი იხილოს. სხვები აღნიშვნას დუნაიზე საკრუიზო გემზე ამჯობინებენ და მთელი ღამე სადღესასწაულოდ მორთული ვენით ტკბებიან.

საახალწლო დღესასწაულებზე კლასიკის მოყვარულებმა აუცილებლად უნდა ეწვიონ ვენის ოპერას. ტრადიციულად 31 დეკემბრის საღამოს, იოჰან შტრაუსის განთქმულ „ღამურას“ დგამენ სახალხო და სახელმწიფო ოპერის სახლებში, ასევე კლასიკური მუსიკის კონცერტები იმართება ქალაქის სხვა თეატრებსა და ფილარმონიებში. ამ სიამოვნების ფასი 250 ევროდან იწყება, ბილეთები წინასწარ უნდა შეიძინოთ.

  • ვენაში საახალწლოდ გასამგზავრებლად მომზადებისას, აუცილებლად ჩაალაგეთ თბილი ტანსაცმელი. მაღალი ტენიანობისა და ძლიერი ქარის გამო +1°C ტემპერატურაც მინუსად იგრძნობა.

 

მილანი, იტალია

საახალწლო dolce vita-სთვის გირჩევთ გაემგზავროთ მილანში – მოდის მსოფლიო დედაქალაქში. დეკემბრის ბოლოს ქალაქში ზამთრის ფასდაკლებები იწყება ადგილობრივ მაღაზიებსა და სავაჭრო ცენტრებში. ასე რომ, შეგიძლიათ საჩუქრები მოიმარაგოთ. თუ შოპინგით საერთოდ არ ხართ დაინტერესებული, გაისეირნეთ გალერეაში Galleria Vittorio Emanuele II: საოცარი არქიტექტურა, საახალწლო გირლანდები და ორიგინალურად გაფორმებული ვიტრინები სადღესასწაულო განწყობას შეგიქმნით.

სად უნდა აღნიშნოთ ახალი წელი მილანში

როგორც წესი, ხალხი იკრიბება მოედნებზე პიაცა Piazza Duomo, Piazza Castello და Piazza del Cannone. ამასთან, მათგან რომელიმე ერთზე არჩევანის გაკეთება აუცილებელი არ არის. სამივე მოედანი ერთმანეთისგან 15-20 წუთის სავალ მანძილზეა, ასე რომ, სურვილისამებრ შეგიძლიათ ერთი ადგილიდან მეორეზე გადახვიდეთ. Piazza Duomo-ზე მთავარი წვეულება 20.00 საათზე იწყება.

ტემპერამენტიანმა იტალიელებმა იციან, თუ როგორ უნდა აღნიშნონ სულითა და გულით, ამიტომ ახალ წელს გასართობ პროგრამას და სადღესასწაულო მენიუს დაწესებულებათა უმრავლესობა სთავაზობს, არჩევანი თქვენს უპირატოსებებზეა დამოკიდებული.

სხვათა შორის, იტალიაში მიღებულია ახალი წლის ღამეს ქუჩაში ყველას გაცნობა: ადგილობრივები თვლიან, რომ ეს მომავალ წელს მათ წარმატებას მოუტანს.

  • დეკემბერში მილანში ამინდი საკმაოდ ცვალებადია. დღესასწაულებზე შესაძლოა მოხვდეთ თოვლში, წვიმაში ან წვიმიან თოვლში. ზოგადად, ცა თავისი შესაძლებლობების მთელი სპექტრის დემონსტრაციას ახდენს. დღისით ჰაერის ტემპერატურა დაახლოებით +5…+7°С, ღამით შესაძლებელია ყინვა.

 

პარიზი, საფრანგეთი

რთული მისახვედრი არ არის, რომ პარიზის მასობრივი ზეიმობის ეპიცენტრი ეიფელის კოშკთან და ელისეს მინდვრებზე მდებარეობს. ჩვეულებრივ აქ ფართომასშტაბიანი აღნიშვნა და სინათლის შოუ იმართება. მაგრამ თუ მეინსტრიმი თქვენთვის არ არის შესაფერისი, მონმარტზე გაემგზავრეთ. იქიდან ქალაქის თავზე გამართული ფეიერვერკების შესანიშნავი ხედი იშლება და გაცილებით ნაკლები ხალხია, ვიდრე ცენტრში. კიდევ ერთი ალტერნატივა მათთვის, ვინც უპირატესობას outdoor-აღნიშვნას ანიჭებს – მარსის ველია. რომანტიკის მოყვარულთათვის შესანიშნავი გადაწყვეტილებაა კრუიზი სენაზე, მაგრამ იგი წინასწარ უნდა დაჯავშნოთ.

თუ სრული ბედნიერებისთვის აუცილებლად უნდა იცეკვოთ, პარიზის კლუბები თქვენს განკარგულებაშია. გამოცდილი ადამიანები გირჩევთ ყურადღება მიაქციონ Wanderlust და RexClub.

ზოგადად, ისიამოვნეთ ქალაქის ჯადოსნური ატმოსფეროთი, არ აჩქარდეთ, დატკბით ყოველი წამით და გჯეროდეთ სასწაულების.

  • თოვლზე იმედებს ნუ დაამყარებთ. ზამთარში პარიზი იშვიათად ანებივრებს ნამდვილი თოვით. ხშირად საახალწლო დღეები თბილი და მზიანია, მაგრამ საღამოს ტემპერატურა შესაძლებელია ნულამდეც დაეცეს.

 

 როვანიემი, ფინეთი

 

ახალი წელი ფინეთში, რა თქმა უნდა, შესანიშნავი იდეაა, რადგან ზამთრის დასვენება ჰელსინკში შეიძლება შეათავსოთ ზღაპრულ ლაპლანდიაში ვიზიტთან (ჰელსინკიდან როვანიემამდე 825 კმ, აქ შეგიძლიათ მოხვდეთ მატარებლით, მანქანით ან თვითმფრინავით).

სად წავიდეთ საახალწლო დღესასწაულებზე ჰელსინკში

პირველ რიგში ეწვიეთ საშობაო ქუჩას (Aleksanterinkatu, Aleksi) – ქალაქის ერთ-ერთ ყველაზე ატმოსფერულ ადგილს, რომელიც იპყრობს თავისი განათებით, სადღესასწაულო ვიტრინებითა და ძველი საშობაო ტრამვაით. გასართობად და წასახემსებლად მიბრძანდით „შობის სამყაროში“ (Joulumaailma მოედანი) – ეს ჰელსინკის შუაგულში მდებარე დიდი ბაზრობაა. თუ ციგურებით სრიალი გსურთ, თქვენ გელით ყინულის პარკი (მოედანზე რკინიგზის სადგურის მახლობლად) – იქვე მდებარე მყუდრო კაფეებით.

თუ რესტორნები სევდას გგვრით, ღამის კლუბებს ეწვიეთ. შესასვლელი ბილეთის ღირებულებაა – 60-80 ევროდან.

და, რა თქმა უნდა, აუცილებლად ეწვიეთ ჯადოსნურ ლაპლანდიას – ეს არის მთელი გასართობი პარკი, სადაც უამრავი სახელოსნოა: ელფების სკოლა, თაფლაკვერების საცხობი, კალიგრაფიის სკოლა. აქ საკუთარი რკინიგზაც კი აქვთ, ასევე ყინულის გალერეა მოჯადოებელი ქანდაკებებით, სანტა-კლაუსის ფოსტა და, რა თქმა უნდა, მისი კაბინეტი, სადაც ბავშვებს პირდაპირ შეუძლიათ გაანდონ სანტას თავიანთი სურვილები. უამრავ დადებით ემოციას ირმების ფერმის მონახულებითაც მიიღებთ, სადაც შეგიძლიათ გამოკვებოთ ცხოველები და დათოვლილ ტყეებში ირმებით შეკაზმული მარხილით გაისეირნოთ.

  • ზამთარში ამ მხარეს ტემპერატურა -50°C-მდე ეცემა, მაგრამ ეს ხელს არ უშლის ათასობით ტურისტს დატკბეს არდადეგებით სანტა-კლაუსის სამშობლოში.

 

ფუკეტი, ტაილანდი

უკვე დიდი ხანია ტაილანდმა ზამთრის პერიოდში დასვენებისთვის მსოფლიოს ერთ-ერთი ყველაზე მომგებიანი ადგილის დიდება მოიპოვა, ხოლო ფუკეტი საუკეთესოა ტაილანდის კურორტებს შორის. აქ ისვენებენ ოჯახები ბავშვებით, ახალგაზრდების კომპანიები და ეგზოტიკის ან ყველა სახის წყლის სპორტის სახეობის მოყვარულები.

ასევე წაიკითხეთ: პირადი გამოცდილება: როგორ გავიცნოთ ტაილანდი 5 დღის განმავლობაში?

როგორ აღვნიშნოთ ახალი წელი ფუკეტში

ფუკეტი საახალწლოდ ნათელი ემოციებითაა დატვირთული. ბევრი სასტუმრო აწყობს სადღესასწაულო ვახშამს წარმოდგენებით, ტაილანდური ცეკვებით, ცოცხალი მუსიკითა და ფეიერვერკებით. გასართობი პროგრამა, ჩვეულებრივ, 21:00 საათზე იწყება და პირველი საათისკენ მთავრდება, შემდეგ სტუმრები ნომრებში ბრუნდებიან ან წვეულებას პლაჟზე აგრძელებენ.

ფუკეტის სასტუმროებში საახალწლო ვახშამი ხშირად სავალდებულოა და ფასში შედის. ნებისმიერ შემთხვევაში, შეგიძლიათ შედარებით იაფი სასტუმრო შეარჩიოთ ვახშმის გარეშე ან ბინა დაჯავშნოთ.

ახალი წელი ტაილანდურ რესტორანში ასევე გულითადი იქნება. თუ მდიდრულ ზეიმს გეგმავთ, ზღვის სანაპიროზე მდებარე რომელიმე რესტორანი შეარჩიეთ: Baan Rim Pa ან Acqua კალიმის პლაჟზე, KEE Sky Lounge პატონგზე, On the Rock კარონზე, Boathouse Wine & Grill, Foto Hotel ან Mom Tri’s Kitchen კატზე, საიდანაც სადღესასწაული ფეიერვერკი ჩანს. გახსოვდეთ, რომ მაგიდა წინასწარ უნდა დაჯავშნოთ.

ახალი წელი პლაჟზე

ფუკეტში ახალი წლის აღნიშვნის ყველაზე მარტივი და ამავდროულად ეგზოტიკური ვარიანტია – აიღოთ პლედი, ხილი, შამპანური, შოკოლადი და პლაჟზე წახვიდეთ. მაგრამ გაითვალისწინოთ, რომ დაბნელემდე უნდა გამოხვიდეთ სასტუმროდან, რათა საცობები აიცილოთ თავიდან (ბევრს მოსწონს დღესასწაულის წყალთან გატარების სცენარი). ტურისტები ხშირად უპირატესობას კარონ ბიჩს ანიჭებენ. ახალ წელს აქ ღია სცენა ეწყობა მუსიკოსებისა და მოცეკვავეებისთვის. ჩვეულებრივ, კონცერტი 20.00 საათზე იწყება და დაახლოებით ღამის 2 საათზე მთავრდება.

ახალი წლის აღნიშვნა ასევე შეგიძლიათ პატონგის პლაჟზე. ტაილანდელი შემსრულებლები და საცეკვაო კოლექტივები Bangla Road-ის ღია სცენაზე გამოდიან, სანაპიროდან ცაში მანათობელი ფრანები დაფრინავს და შუაღამისას მთელი სანაპირო ფეიერვერკითაა განათებული.

  • ფანტასტიკური სილამაზე გარანტირებულია და ამინდიც ნამდვილად არ დაგაღალატებთ. საახალწლო დღესასწაულებზე ჰაერის ტემპერატურა +30°C-ზე მაღალია.

 

ბალი, ინდონეზია

მზად ვარ შეგედავოთ, რომ არასდროს დაგვავიწყდებათ ახალი წელი ბალის საკურორტო ქალაქ ქუთაში. ეს სამოთხეა მათთვის, ვისაც სურს დატკბეს ინდოეთის ოკეანით და ოცნებობს ბოლოს და ბოლოს ისწავლოს სერფინგი. თანაბარი, ფართო სანაპირო და მშვიდი დაბალი ტალღები სწორედ ის არის, რაც სჭირდება მათ, ვისაც ყოველთვის სურდა, მაგრამ ეშინოდა ტალღების დაპყრობა.

როგორ აღვნიშნოთ ახალი წელი ბალიზე

ადგილობრივები ბალიზე ახალ წელს მარტის ბოლოს – აპრილის დასაწყისში აღნიშნავენ. ამიტომ, 1 იანვარი მათთვის დიდი დღესასწაული არ არის. მაგრამ ტურისტებისთვის ისინი ძალიან ცდილობენ. ძვირადღირებულ სასტუმროებში, ჩვეულებრივ, გალა-ვახშამს აწყობენ დრეს-კოდითა და მოწვეული ვარსკვლავებით. ბიუჯეტურ სასტუმროებში დამსვენებლებს უმეტეს შემთხვევაში გულუხვი შვედური მაგიდა ელოდებათ. სასტუმროებში დაახლოებით პირველ საათამდე ზეიმობენ, შემდეგ ნომრებში მიდიან, ან გართობას პლაჟზე თუ ღამის კლუბში განაგრძობენ.

31 დეკემბერს, ქუთაში მოძრაობასაც კი კეტავენ, რათა დამსვენებლებს შეეძლოთ გართობა, მილოცვების გაცვლა და ნებისმიერი წერტილიდან ფეიერვერკით ტკბობა.

დეკემბრის ბოლოს ბალიზე ამინდი ცხელი და წვიმიანია, მაგრამ წვიმები ხშირად ხანმოკლეა და ღამით მოდის. დღისით ჰაერის ტემპერატურა +29°С-მდე თბება, ხოლო წყალი – +26°С-მდე. მოკლედ, შესანიშნავია.

ვრცლად ნახვა
ევროპის 3 ქალაქი, სადაც იანვარში უნდა იმოგზაუროთ

სად უნდა ვიმოგზაუროთ იანვარში იაფად?

თუკი მოგზაურობა გიყვართ, მაშინ მნიშვნელობა არ აქვს, წელიწადის რომელი დროა, რადგან დედამიწაზე ყოველთვის მოიძებნება ადგილები, სადაც შეგიძლიათ გაემგზავროთ და დატკბეთ მოგზაურობით.

Oktravel გირჩევთ რამდენიმე მიმართულებას სადაც იანვარში ძალიან იაფად შეგიძლიათ დასვენება. როგორც კომპანიის ოპერატორები ამბობენ, იანვარში რამდენიმე იაფი მიმართულებაა - ესენია, ვენა, პრაღა და ბუდაპეშტი; 

 

იხილეთ ფოტოები და ნახეთ, როგორ გამოიყურება თითოეული ქალაქი იანვრის თვეში: 

 

ვენა:

Image result for Vienna in january

 

Image result for Vienna in january

 

Image result for Vienna in january 

 

პრაღა:

Image result for Prague in january

 

Related image

 

Related image

 

ბუდაპეშტი:

 

Image result for Budapest in january

 

Related image

ვრცლად ნახვა
10 საუკეთესო ქალაქი ახალი წლის შესახვედრად

ახალი წელი უამრავი ადამიანისთვის ერთ-ერთი ყველაზე მნიშვნელოვანი დღესასწაულია. ამიტომ ზოგიერთი ჩვენგანი მის დადგომამდე რამდენიმე კვირით ადრეც კი იწყებს მზადებას.

იმისათვის, რომ დამდეგი ახალი წელი განსაკუთრებული აღმოჩნდეს, გამოცემა СNN გთავაზობთ 10 საუკეთესო ადგილს ახალი წლის დღესასწაულის შესახვედრად:

სიდნეი, ავსტრალია

ახალი წლის სიდნეიში გატარება ერთ-ერთი საუკეთესო არჩევანია. ახალი წლის დადგომის დროს ქალაქში მსოფლიოში ერთ-ერთ ყველაზე ლამაზ ფოიერვერკების შოუს უშვებენ. თანაც ახალი წელი ავსტრალიაში ზაფხულში დგება და შესაბამისად, სტუმრებს ავსტრალიის სანაპიროებზე დასვენების საშუალებაც აქვთ.


ჰონგ-კონგი, ჩინეთი

ახალი წლის დადგომამდე რამდენიმე საათით ადრე ჰონგ-კონგელთა უმეტესობა ქალაქის ცენტრალურ ნაწილში მეგობრებთან და ოჯახის წევრებთან ერთად იკრიბება. ამ დროს მთელი ქალაქის მასშტაბით იმართება სხვადასხვა კონცერტები, შოუები და მუსიკალური შეჯიბრებები.

 



ბანგკოკი, ტაილანდი

თუ გსურთ ახალ წელს აქტიურ, ხალხმრავალ და ხმაურიან გარემოში შეხვდეთ, მაშინ ბანგკოკს აუცილებლად უნდა ეწვიოთ. ქალაქს განსაკუთრებით ღამის ცხოვრება გამოარჩევს, სადაც ახალი წლის დადგომას უამრავი ახალგაზრდა აღნიშნავს.

 



დუბაი, არაბთა გაერთიანებული საამიროები

დღეისათვის დუბაი გახდა ერთ-ერთი ყველაზე მულტიფუქცნიური ქალაქი, სადაც ნებისმიერი ინტერესის მქონე ადამიანი შეძლებს გასართობის მოძებნას. ახალი წლის არდადეგების დროს მთელი მსოფლიოდან აქ უამრავი ადამინი ჩამოდის.

 

მოსკოვი, რუსეთი

მოსკოვი სიის ყველაზე „ცივი“, თუმცა, ამავდროულად საინტერესო არჩევანია. ახალი წლის დადგომასთან ერთად მოსახლეობა წითელ მოედანზე იკრიბება, სადაც შთამბეჭდავი ფოიერვერკების შოუ იმართება.

 

 

კეიპ-თაუნი, სამხრეთ აფრიკის რესპუბლიკა

კეიპ-თაუნი აფრიკის კონტინენტის ერთ-ერთი ყველზე ლამაზი ქალაქია. აქ უამრავი რესტორანი და კაფეა, სადაც უგემრიელესი საკვების გასინჯვას შეძლებთ. ახალი წლის დროს ქალაქში ათობით ფესტივალი იმართება.

 

 

ლონდონი, გაერთიანებული სამეფო

ლონდონი ახალი წლის შესახვედრად ერთ-ერთი საუკეთესო არჩევანია. აქ თქვენ მდინარე თემზაზე ნავით გასეირნებასა და ლონდონის ხედების დათვალიერებას შეძლებთ. ადგილობრივების დიდი ნაწილი ამ დროს პაბებში იკრიბება. ამასთანავე, შესაძლოა, სამეფო ოჯახის წევრებიც იხილოთ.

 

 

რიო-დე-ჟანეირო, ბრაზილია

თუ გსურთ ახალი წელი აქტიურად გაატაროთ, მაშინ რიო-დე-ჟანეიროს უნდა ეწვიოთ. ამ დროს ქალაქში 2 მილიონამდე ადამიანი იმყოფება, რომლებიც კარნავალში მონაწილეობენ. ამასთანავე, თქვენ შეგიძლიათ ცნობილ კოპაკაბანას პლაჟზე დაისვენოთ.

 

 

ნიუ-იორკი, აშშ

ნიუ-იორკი ახალი წლის შესახვედრად ამერიკელთა ყველაზე ცნობილ თავშეყრის ადგილს წარმოადგენს. ისინი თაიმს სქვერზე იკრიბებიან და ახალი წლის დადგომამდე დარჩენილ დროს უკან ერთად ითვლიან.

 

ლას-ვეგასი, აშშ

თუ ღამის ცხოვრება და აზარტული თამაშები გიყვართ, მაშინ ახალი წელი აუცილებლად ლას-ვეგასში უნდა გაატაროთ, სადაც უამრავ გასართობს ნახავთ. წელიწადის ამ დროს აქ ძალიან ბევრი ადამიანი ჩამოდის მთელი მსოფლიოდან, ამიტომ სჯობს სასტუმრო რამდენიმე კვირით ადრე დაჯავშნოთ.

 

ვრცლად ნახვა