ვმუშაობთ იმაზე, რომ რაც შეიძლება დროულად დაიწყოს ფრენები ამერიკისა და საქართველოს შორის, - ამის შესახებ პრემიერ-მინისტრმა მამუკა ბახტაძემ მთავრობის სხდომის დაწყებამდე გამართულ ბრიფინგზე განაცხადა.

პრემიერის თქმით, ძალიან მნიშვნელოვანია, აშშ-სა და საქართველოს შორის დაიწყოს პირდაპირი ავიარეისები, რაც დაგვეხმარება, რომ ერთი ორად გაიზარდოს ის ეკონომიკური პოტენციალი, რაც არსებობს ორ ქვეყანას შორის ეკონომიკური თანამშრომლობის თვალსაზრისით.

„ჩვენ ვცდილობთ აშშ-სთან განვავითაროთ ეკონომიკური თანამშრომლობა, გავხადოთ იგი კიდევ უფრო ღრმა. აშშ-სა და საქართველოს შორის ურთიერთობები არასდროს ყოფილა ასეთ მაღალ დონეზე და ვფიქრობ, რომ ძალიან მნიშვნელოვანია, ჩვენს ქვეყნებს შორის დაიწყოს პირდაპირი ავიარეისები, შესაბამისად, ეკონომიკის სამინისტრო მუშაობს ეკონომიკურ კვლევაზე, რომელიც რამდენიმე კვირაში დასრულდება. ეს დაგვეხმარება ჩვენ, რომ მოვიძიოთ შესაბამისი კომპანია, რომ რაც შეიძლება დროულად დაიწყოს ფრენები ამერიკისა და საქართველოს შორის. პირდაპირი ავიარეისები დაგვეხმარება, რომ ერთი ორად გავზარდოთ ის ეკონომიკური პოტენციალი, რაც არსებობს ორ ქვეყანას შორის ეკონომიკური თანამშრომლობის თვალსაზრისით," - განაცხადა მამუკა ბახტაძემ.

საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტომ უკრაინულ დაბალბიუჯეტიან ავიაკომპანია SkyUp Airlines-ს და „აზერბაიჯანის ავიახაზების” (“AZAL”) სტრუქტურის ქვეშ დაფუძნებულ დაბალბიუჯეტიან ავიაკომპანია „Buta Airways”-ს ზაფხულის სანავიგაციო სეზონზე ბათუმის მიმართულებით ოპერირების ნებართვები მიანიჭა.

კიევი-ბათუმი-კიევის საჰაერო ხაზზე უკრაინული SkyUp Airlines რეგულარულ რეისებს 25 მაისიდან შეასრულებს. ფრენები კვირაში 10 სიხშირით, Boeing B737-800 ტიპის საჰაერო ხომალდებით განხორციელდება. 2018 წლის ანალოგიურ პერიოდში, ავიაკომპანია ბათუმის მიმართულებით ჩარტერულ რეისებს ასრულებდა.

აზერბაიჯანული ავიაკომპანია Buta Airways ბაქო-ბათუმი-ბაქოს საჰაერო ხაზზე რეგულარულ რეისებს 14 ივნისიდან 13 სექტემბრამდე განახორციელებს. რეისები კვირაში 2 სიხშირით, ყოველ პარასკევს და კვირას, Embraer E190, Airbus A319 და A320 ტიპის საჰაერო ხომალდებით შესრულდება.

დაბალბიუჯეტიანი ავიაკომპანია Wizz Air, რომელიც ქუთაისის საერთაშორისო აეროპორტში ბაზირებს, 2019 წლის ზაფხულის სანავიგაციო სეზონის განმავლობაში რეგულარულ საჰაერო მიმოსვლას 8 ახალი მიმართულებით დაიწყებს. ინფორმაციას სამოქალაქო ავიაციის სააგენტო ავრცელებს. 

უნგრული ავიაკომპანია რეგულარულ რეისებს ქუთაისიდან გდანსკის, ბარის, ეინდჰოვენის, კოპენჰაგენის, ბაზელის, ტალინის, ბრიუსელის და კრაკოვის მიმართულებით, შემდეგი განრიგით შეასრულებს: 

• ქუთაისი - გდანსკი - ქუთაისი - 31 მარტიდან, კვირაში 2 სიხშირით, ყოველ სამშაბათს და შაბათს; 
• ქუთაისი - ბარი - ქუთაისი - 1 აგვისტოდან, კვირაში 2 სიხშირით, ყოველ ხუთშაბათს და კვირას; 
• ქუთაისი - ეინდჰოვენი - ქუთაისი - 1 აგვისტოდან, კვირაში 3 სიხშირით, ყოველ სამშაბათს, ხუთშაბათს და შაბათს; 
• ქუთაისი - კოპენჰაგენი - ქუთაისი - 2 აგვისტოდან, კვირაში 2 სიხშირით, ყოველ ორშაბათს და პარასკევს; 
• ქუთაისი - ბაზელი - ქუთაისი - 2 აგვისტოდან, კვირაში 2 სიხშირით, ყოველ ორშაბათს და პარასკევს; 
• ქუთაისი - ტალინი - ქუთაისი - 4 აგვისტოდან, კვირაში 2 სიხშირით, ყოველ ოთხშაბათს და კვირას; 
• ქუთაისი - ბრიუსელი - ქუთაისი - 4 აგვისტოდან, კვირაში 2 სიხშირით, ყოველ ოთხშაბათს და კვირას; 
• ქუთაისი - კრაკოვი - ქუთაისი - 4 აგვისტოდან, კვირაში 2 სიხშირით, ყოველ ოთხშაბათს და კვირას; 

ფრენები Airbus A320 და A321 ტიპის საჰაერო ხომალდებით განხორციელდება. 

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ, ავიაკომპანია Wizz Air-ს აღნიშნულ საჰაერო ხაზებზე რეგულარული საჰაერო მიმოსვლის განხორციელების ნებართვა 2019 წლის 26 მარტს მიენიჭა. 

Wizz Air საქართველოს საავიაციო ბაზარზე 2012 წელს შემოვიდა და 2018 წლის მდგომარეობით, რეგულარული რეისებით გადაყვანილ მგზავრთა რაოდენობის პროცენტული წილით, ბაზარზე ლიდერი ავიაკომპანიაა (12%). 

ქართული ავიაკომპანია “Myway Airlines” თბილისსა და ჟუკოვსკის აეროპორტებს შორის რეგულარულ რეისებს განახორციელებს. 

ფრენები 2019 წლის 26 აპრილიდან ზაფხულის სანავიგაციო სეზონის ბოლომდე შესრულდება. 

პირდაპირი ფრენები თავდაპირველად კვირაში 3 სიხშირით (სამშაბათი, პარასკევი და კვირა) განხორციელდება, ხოლო 1 ივლისიდან 9 სექტემბრამდე, ავიაკომპანია დაამატებს კიდევ ერთ სიხშირეს (ორშაბათი) და რეგულარულ რეისებს კვირაში 4 სიხშირით შეასრულებს. ფრენები Boeing B737-800 ტიპის საჰაერო ხომალდებით განხორციელდება. 

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ “Myway Airlines”-ს თბილისი-ჟუკოვსკი-თბილისის საჰაერო ხაზზე რეგულარული საჰაერო მიმოსვლის განხორციელების ნებართვა 2019 წლის 21 მარტს მიენიჭა. 

ავიაკომპანია “Myway Airlines”-მა საჰაერო ხომალდის ექსპლუატანტის სერტიფიკატი 2018 წლის იანვარში აიღო, ხოლო რეგულარული საავიაციო მიმოსვლა ამავე წლის ივნისიდან დაიწყო. "Myway Airlines"-ის საკუთრებაში ორი ერთეული Boeing B 737-8AL იმყოფება და ამ ეტაპზე რეგულარულ რეისებს თბილისი-თელ-ავივი-თბილისის მიმართულებით ახორციელებს.

2019 წლის ზაფხულის სანავიგაციო სეზონის განმავლობაში, ქართული ავიაკომპანია Georgian Airways ევროპულ მიმართულებებზე რეგულარულ რეისებს გაზრდილი სიხშირით შეასრულებს.

ამის შესახებ ინფორმაციას სამოქალაქო ავიაციის სააგენტო ავრცელებს.

ფრენის სიხშირის მომატება თბილისი - ამსტერდამი - თბილისის, თბილისი - ვენა - თბილისის, თბილისი - ბოლონია - თბილისის, თბილისი - ბარსელონა - თბილისის, თბილისი - ბრიუსელი - თბილისისა და თბილისი - პრაღა - თბილისის საჰაერო ხაზებს შეეხებათ.

რეგულარული რეისები თითოეული მიმართულებით, კვირაში 3 სიხშირით განხორციელდება. გასული წლის ანალოგიურ პერიოდში ავიაკომპანია აღნიშნულ საჰაერო ხაზებზე კვირაში 2 სიხშირით ოპერირებდა.

ამასთან, ავიაკომპანია Georgian Airways განაახლებს რეგულარულ რეისებს ბათუმიდან მოსკოვის მიმართულებით და ფრენებს 7 ივნისიდან 26 ოქტომბრამდე კვირაში 1 სიხშირით (პარასკევი) შეასრულებს.

ფრენები Boeing B737, Embraer E190 და E195 ტიპის საჰაერო ხომალდებით განხორციელდება.

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ Georgian Airways-ს ზემოთ აღნიშნულ საჰაერო ხაზებზე რეგულარული საჰაერო მიმოსვლის განხორციელების ნებართვა 2019 წლის 21 მარტს მიენიჭა.

2019 წლის მსოფლიოში ყველაზე უსაფრთხო ავიაკომპანიების რეიტინგის პირველ ადგილზე კვლავ ავსტრალიური Qantas-ი გავიდა.

უსაფრთხო ავიაკომპანიების რეიტინგს ყოველწლიურად პორტალი Airlineratings.com-ი აქვეყნებს.

AirlineRatings-მა მსოფლიოს 405 ავიახაზის მონაცემები გაანალიზა და 20 საუკეთესო კომპანია გამოავლინა. რეიტინგის შედგენისას პორტალი სხვადასხვა კრიტერიუმს ითვალისწინებს, მათ შორისაა, ავიაციის ასაკი, საავიაციო შემთხვევების სტატისტიკა, ასევე კომპანიის მომგებიანობა და ა.შ.

ყველაზე უსაფრთხო ავიაკომპანიების რეიტინგში Qantas-ის შემდეგ მეორე პოზიციაზეა Air New Zealand-ი, ხოლო მესამეზე – Alaska Airlines გავიდა.

ყველაზე უსაფრთხო 20 ავიაკომპანია:

Qantas

Air New Zealand

Alaska Airlines

All Nippon Airways

American Airlines

Austrian Airlines

British Airways

Cathay Pacific Airways

Emirates

EVA Air

Finnair

Hawaiian Airlines

KLM

Lufthansa

Qatar

Scandinavian Airline System

Singapore Airlines

Swiss United Airlines

Virgin Atlantic and Australia

ქალაქების ღირებულების ბარომეტრმა ევროპის ყველაზე იაფი ქალაქების სია შეადგინა უქმეების გასატარებლად. thisisinsider.com-ის ინფორმაციით, კვლევა 48 ქალაქის მონაცემებს აერთიანებს.

რეიტინგის შედგენისას რამდენიმე ცვლადი მონაცემი გამოიყენეს, მათ შორის სამჯერადი კვების და ორი ბოთლი ღვინის ღირებულება, ნომრის ფასი სამვარსკვლავიან სასტუმროში ქალაქის ცენტრში, ლუდისა და ყავის ფასი და ჭიქა ღვინის ღირებულება.

აღსანიშნავია, რომ ფასების დასადგენად კვლევის ავტორებმა ტურისტული კომპანიები და Hotels.com-ი გამოიყენეს. ამასთან, ფასები მოცემულია ორ პირზე ორი ღამის განმავლობაში.

12 ყველაზე იაფი ევროპული ქალაქის ჩამონათვალი უქმეების გასატარებლად, ასე გამოიყურება:

ვილნიუსი - $191.73 (£147.35)

ბელგრადი - $197.23 (£151.57)

ვარშავა - $208.65 (£160.35)

სტამბოლი - $217.08 (£166.83)

ბუქარესტი - $218.27 (£167.74)

პორტო - $224.59 (£172.60)

რიგა - $232.40 (£178.60)

ბრატისლავა - $236.85 (£182.02)

მოსკოვი - $243.16 (£186.87)

პრაღა - $247.48 (£190.19)

ბუდაპეშტი - $254.52 (£195.60)

ათენი - $256.51 (£197.13)

წყარო: bpn.ge

სტამბოლის ახალი მასშტაბური აეროპორტი ჯერ სრულად ამოქმედებული არ არის. მისი სრულად დატვირთვა აპრილიდან უნდა მოხდეს. ათათურქის აეროპორტიდან აღჭურვილობის გადატანა ახალ აეროპორტში 5-დან 7- აპრილამდეა დაგეგმილი, რის შემდეგაც ათათურქის აეროპორტი დაიხურება. 

ათათურქიდან გადასვლა გულისხმობს 1800 თანამშრომლის გადაყვანასა და დაახლოებით, 47 ათასი ტონა აღჭურვილობის გადაზიდვას. სტამბოლის მეგა აეროპორტის მმართველი 25 წლის განმავლობაში კონსორციუმი IGA იქნება. სტამბოლის ახალ აეროპორტში ჯერ მხოლოდ Turkish Airlines ოპერირებს. სწორედ ამ ავიაკომპანიაზე მოვა აეროპორტის მგზავრთნაკადის 80%. 

მეგა აეროპორტს განვითარების პირველ ფაზაში წელიწადში 90 მილიონი მგზავრის გატარება შეეძლება. ყველა ფაზის განვითარების შემდეგ კი, აეროპორტი 150 მილიონ მგზავრს გაატარებს. 

პროექტის ღირებულება 12 მილიარდი დოლარია. 

ახალ აეროპორტს ოპერირება ნაწილობრივ უკვე დაწყებული აქვს. bm.ge-ის ჯგუფი სტამბოლის საერთაშორისო აერპორტიდან სტამბოლი-თბილისის ავიარეისით გამოფრინდა. გთავაზობთ, ფოტორეპორტაჟს სტამბოლის საერთშორისო აეროპორტიდან. 

საუდის არაბეთის სამეფოს დაბალბიუჯეტიანი ავიაკომპანია „Flynas", რომელიც საქართველოს საავიაციო ბაზარზე გასულ წელს შემოვიდა, რიადი-ბათუმი-რიადის მიმართულებით იწყებს ოპერირებას. 

რეგულარული რეისები 2019 წლის 2 ივნისიდან 31 აგვისტომდე, კვირაში 3 სიხშირით, ყოველ ოთხშაბათს, პარასკევსა და კვირას განხორციელდება. ფრენები Airbus A319 და A320 ტიპის საჰაერო ხომალდებით შესრულდება. 

საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ, „Flynas"-ს რიადი-ბათუმი-რიადის საჰაერო ხაზზე რეგულარული საჰაერო მიმოსვლის განხორციელების ნებართვა 2019 წლის 11 მარტს მიენიჭა. ახალი მიმართულების გარდა, საუდის არაბეთის დაბალბიუჯეტიანი ავიაკომპანია ზაფხულის სეზონზე, რეისებს დამამი-თბილისი-დამამი, ჯედა-თბილისი-ჯედა და რიადი-თბილისი-რიადის საჰაერო ხაზებზე შეასრულებს.

ეკონომიკისა და მდგრადი განვითარების სამინისტროს "საქართველოს აეროპორტების გაერთიანება" ქუთაისის საერთაშორისო აეროპორტიდან დატვირთვის მიხედვით, 2019 წლის თებერვლის მოთხოვნადი მიმართულებების ხუთეულს აქვეყნებს. 

რეიტინგის მოთხოვნად მიმართულებებს შორის კვლავ ვენა ლიდერობს. მეორე ადგილზე რომია, მესამე ადგილზე კი - პრაღა. 

"საქართველოს აეროპორტების გაერთიანების" მონაცემებით, ქუთაისის საერთაშორისო აეროპორტიდან 2019 წლის თებერვლის ყველაზე მოთხოვნადი მიმართულებების TOP-5 ასეთია: 

1.ვენა 
2. რომი 
3. პრაღა 
4. ათენი 
5. მემინგენი 

ქუთაისის საერთაშორისო აეროპორტი 2018 წლის ჯამში 617,342 მგზავრს მოემსახურა, რაც წინა წლის ანალოგიურ პერიოდთან შედარებით 52,5 % მეტია. 

ქუთაისის აეროპორტის მგზავრთნაკადის 95% ავიაკომპანია „ვიზეარმა“ გადაიყვანა (587,643 მგზავრი), რითაც საქართველოს ავიაბაზრის ლიდერი პირველად გახდა. 

მგზავრთნაკადის ზრდით, ევროპის აეროპორტებში ქუთაისი ლიდერობს. ევროპის აეროპორტთა საერთაშორისო საბჭოს – ACI EUROPE-ს მონაცემებით, 2018 წელს ქუთაისი 52.5%-ით მეტ მგზავრს მოემსახურა, რაც საუკეთესო მაჩვენებელია იმ აეროპორტებს შორის, რომელთა მგზავრთნაკადი 5 მილიონზე ნაკლებია. 

1 აგვისტოდან ქუთაისის დავით აღმაშენებლის საერთაშორისო აეროპორტში ოპერირებას Wizz air-ის მესამე ბაზირებული, AIRBUS A 320 ტიპის თანამედროვე საჰაერო ხომალდი დაიწყებს და რეგულარულ ფრენებს ბაზელის, კოპენჰაგენის, ბრიუსელის, ტალინის, ეინდჰოვენის და ბარის მიმართულებით შეასრულებს. 

ავიაკომპანია Myway Airlines რუსეთის მიმართულებით ფრენებს იწყებს. 

როგორც bm.ge-ის კომპანიის კომერციული დირექტორმა იგორ აფციაურმა განუცხადა, ფრენები 26 აპრილიდან კვირაში სამჯერ შესრულდება, თუმცა მიმდინარე წლის ივლისში სიხშირეების რაოდენობა გაიზრდება და ფრენები საქართველოდან ყოველ სამშაბათს, ოთხშაბათს, პარასკევსა და კვირას განხორციელდება.

“თებერვლის ბოლოს მივიღეთ ნებართვა. ერთი წელი ამას ველოდებით. 26 აპრილიდან დავიწყებთ ფრენებს, თბილისი-ჟუკოვსკი-თბილისის საჰაერო ხაზზე“, - აცხადებს აფციაური. 

მისივე თქმით, ფასები რუსეთის მიმართულებით 150 ევროდან დაიწყება, რაც შეეხება ევროპის მიმართულებას, კომპანია ნებართვებს მიმდინარე კვირის ბოლომდე ელოდება. 

შეგახსენებთ: ავიაკომპანია Myway Airlines ამ დროისთვის ფრენებს მხოლოდ თბილისი-თელ ავივი-თბილისის მიმართულებაზე ასრულებს.

თბილისისა და ბათუმის საერთაშორისო აეროპორტების მმართველი კომპანია "ტავ ჯორჯია" ავიაკომპანია Georgian Airways-ს ბრალდებებს პასუხობს და სპეციალურ განცხადებას ავრცელებს.

როგორც „ტავ ჯორჯიას“ განცხადებაშია, Georgian Airways-ს “ტავ ჯორჯიას” მიმართ გააჩნია დავალიანება, რაც დღევანდელი მონაცემებით 9 მილიონ ლარს აღემატება. ოპერატორი კომპანიის მიერ შეთავაზებული გადახდის გრაფიკის დაწესების მიუხედავად, ავიაკომპანია უარს ამბობს ფინანსური ვალდებულებების შესრულებაზე.

ამასთან, „ტავის“ იმ შემთხვევაში თუ ავიაკომპანია Georgian Airways ნაკისრ ფინანსურ ვალდებულებას არ შეასრულებს, „ტავ ჯორჯია“ იძულებული გახდება შეუზღუდოს ავიაკომპანიას აეროპორტის სერვისების და ინფრასტრუქტურის გამოყენების შესაძლებლობა.

„ტავ ჯორჯიას“ მიერ, Georgian Airways-ისთვის გაგზავნილი წინასწარი შეტყობინებებისა და არაერთი გაფრთხილების მიუხედავად ავიაკომპანია უარს ამბობს დაიცვას თავისი მგზავრების ინტერესები და შეასრულოს ნაკისრი ფინანსური ვალდებულებები. აქვე უნდა აღინიშნოს, რომ ტავ ჯორჯიასა და Georgian Airways-ს შორის არსებული ურთიერთთანამშრომლობა უკვე 14 წელს ითვლის. ამ წლების განმავლობაში ავიაკომპანია სარგებლობდა ყველა იმ პრივილეგიით და შეღავათებით, რასაც აეროპორტების ოპერატორი კომპანია საქართველოში ბაზირებული, ეროვნული გადამზიდავი კომპანიის ხელშეწყობისთვის ახორციელებდა. კერძოდ:

1. Georgian Airways - აქვს ექსკლუზიური უფლება თავად გაუწიოს სახმელეთო მომსახურება საკუთარ საჰაერო ხომალდებსა და მგზავრებს, რაც საგრძნობლად ამცირებს მათ საწარმოო ხარჯებს;

2. Georgian Airways - 2005 წლიდან სარგებლობს 50%დან - 80%-მდე ფასდაკლებით ტავ ჯორჯიას მიერ გაწეულ ყველა იმ მოთხოვნად სერვისზე, რაც აუცილებელია რეისის შესასრულებლად (ბოლო სამი თვეა ავიაკომპანია მხარეებს შორის შეთანხმებული პირობების მიხედვით მხოლოდ მისთვის გაწეული მომსახურების ღირებულის 50% იხდის);

3. 2015 წლიდან Georgian Airways სარგებლობს ტავ ჯორჯიას მიერ ექსკლუზიურად მისთვის შედგენილი გადახდის სპეციალური გრაფიკით, რაც ზამთრის სანავიგაციო პერიოდში გაწეული მომსახურების ღირებულების 50%-ის გადახდას ზაფხულის განმავლობაში გულისხმობს;

4. Georgian Airways – ამ ეტაპზე არის ერთადერთი, თბილისში ბაზირებული ეროვნული ავიაკომპანია, რომელსაც ტავ ჯორჯიამ მგზავრთა მოსაკრებელი 24 USD-დან 19 USD-მდე შეუმცირა. (აღნიშნული შეღავათით ისარგებლებს თბილისში ბაზირებული ნებისმიერი ეროვნული ავიაკომპანია, რომლის მიერ გადაყვანილი მგზავრთა რაოდენობა 50 000 აღემატება);

5. Georgian Airways - 2017 წლიდან სარგებლობს საჰაერო ხომალდების აფრენა-დაფრენის სპეციალური ტარიფით, რაც აღნიშნულ სერვისზე 30%-იან ფასდაკლებას გულისხმობს. ტავ ჯორჯიას მიერ შემუშავებული ამ სპეციალური ტარიფით სარგებლობენ თბილისში ბაზირებული ავიაკომპანიები;

6. Georgian Airways 2010 - წლიდან სარგებლობს ტავ ჯორჯიას მიერ ადგილობრივ რეისებზე შემუშავებული სპეციალური ტარიფით. აღნიშნული შეღავათი ავიაკომპანიას საშუალებას აძლევს საგრძნობლად შეამციროს ხარჯები.

ამ ყველაფრის ფონზე Georgian Airways ქსენოფობიური განცხადებებით, უსაფუძვლოდ ახდენს ტავ ჯორჯიას დისკრედიტაციას და კვლავ აგრძელებს საზოგადოების დეზინფორმაციას.

თბილისისა და ბათუმის საერთაშორისო აეროპორტების ოპერატორი კომპანია ტავ ჯორჯია უკვე 14 წელზე მეტია, ქვეყანაში განხორციელებული ინვესტიციებით, ინფრასტრუქტურული პროექტებით, მოზიდული ავიაკომპანიების რაოდენობითა და მგზავრებისთვის ახალი მიმართულებების შეთავაზებით, ქართული საავიაციო ბაზრის განვითარებაში მნიშვნელოვან როლს ასრულებს,“-აღნიშნულია განცხადებაში.

შეგახსენებთ, რომ რამდენიმე დღის წინ განცხადება გაავრცელა ავიაკომპანია „ჯორჯიან ეარვეისმა", რომლის თანახმადაც, თურქული კომპანია "ტავ ურბან ჯორჯია" ავიაკომპანიას თბილისის საერთაშორისო აეროპორტიდან ფრენების განხორციელების საშუალებას არ აძლევს და ითხოვს არარეალური ვალების დაფარვას, რისი ერთადერთი მიზანიც ავიაკომპანიის და მისი მგზავრების გაძარცვაა.

„ისეთი გადასახადები, როგორიც "ტავ ურბან ჯორჯიას" აქვს დაწესებული, არ არსებობს ევროპის თითქმის არცერთ აეროპორტში. "ჯორჯიან ეარვეისის" ხელმძღვანელობა თვლის რომ "ტავ ურბან ჯორჯიას" მმართველობის პირობებში, შეუძლებელია ქართული ავიაციის ფუნქციონირება და შემდგომი განვითარება.

"ტავ ურბან ჯორჯიას" წელიწადში სუფთა მოგების სახით 400 მილიონ ლარზე მეტი გააქვს საქართველოდან, სანაცვლოდ კი თბილისში, რეგიონში ყველაზე ცუდი აეროპორტი გვაქვს, ხოლო ბათუმის აეროპორტში გაუსაძლისი პირობებია. "ტავ ურბან ჯორჯია" უარს ამბობს მოსაკრებლის შემცირებაზე, ქართული ავიაცია კი სულ უფრო და უფრო ზარალდება.

"ტავ ურბან ჯორჯიას" ტაქსის ფასებიც კი კაბალური აქვს. მაგალითად, თუ თბილისის აეროპორტში ჩამოსული მგზავრი მოინდომებს თბილისის ცენტრამდე ტაქსით წასვლას, მოუწევს ისარგებლოს "ტავის" ტაქსით, რაც სულ მცირე 45 ლარი დაუჯდება. (აეროპორტის ტერიტორიაზე სხვა ტაქსის დგომის/დალოდების უფლებას არ აძლევენ),“-აღნიშნული იყო ავიაკომპანიის განცხადებაში.

Turkish Airlines-ი ათათურქის აეროპორტში ფრენებს 5-6 აპრილის გასაყარზე, ადგილობრივი დროით ღამის 2 საათზე შეწყვეტს და იმავე დღის 14:00 საათიდან, ოპერირებას უახლეს, სტამბოლის გიგანტურ აეროპორტში დაიწყებს.

სტამბოლის ახალი აეროპორტი ოფიციალურად 29 ოქტომბერს გაიხსნა. მისი გახსნა, თურქეთის რესპუბლიკის დაარსებიდან 95 წლის იუბილეს დაემთხვა. თუმცა მშენებლობა ჯერ დასრულებული არ არის. სრულად დაკომპლექტების შემდეგ, აეროპორტს სულ ექვსი ასაფრენი ზოლი ექნება და წლიურად 150 მილიონი მგზავრის მომსახურებას შეძლებს.

ახალი აეროპორტი 100-ზე მეტი ავიახაზის და 300-ზე მეტი მიმართულების მომსახურებას შეძლებს. ათათურქის სახელობის აეროპორტი, რომელიც შარშან 68 მილიონ მგზავრს მოემსახურა, სხვა საჭიროებებს მოემსახურება და სათადარიგო აეროპორტის რანგში იმუშავებს. მასზევე იგეგმება ბაზრობების გამართვა.

Turkish Airlines-ი 1933 წელს დაარსდა და თავიდან მხოლოდ 5 თვითმფრინავით ოპერირებდა. ამჟამად კი მის ფლოტში 330-ზე მეტი თვითმფრინავია, რომელთა შორის, სამგზავროს გარდა, სატვირთო თვითმფრინავებიც შედის. კომპანია 124 ქვეყანაში, 306 მიმართულებით დაფრინავს. შარშან „თურქიშ ეარლაინზი“ 75.2 მილიონ მგზავრს მოემსახურა და მისი რეისებისას, ადგილების 82 პროცენტი შევსებული იყო.

თუ მოგზაურობა თქვენი საყვარელი ჰობია, სხვადასხვა ქვეყანაში მოგზაურობისას, აუცილებლად გადაიხდიდით ტურისტულ გადასახადს, რომელსაც სავარაუდოდ, აქამდე ვერ შეამჩნევდით. ტურისტული გადასახადი ხშირად გაერთიანებულია თვითმფრინავის ბილეთის ან სასტუმროს გადასახადთან. ზოგიერთ ქვეყანაში, მაგალითად იაპონიაში ტურისტულ გადასახადს ქვეყნის დატოვებისას იხდით.

ტურისტული გადასახადი განსხვავდება ვიზისა თუ ნებისმიერი სხვა გადასახადისგან, რომელიც აუცილებელია მოგზაურობისას.

Travel Weekly-ის მიხედვით, ტანზანიაში 2016 წელს 18%-იანი დამატებითი ღირებულების გადასახადის აკრეფა სხვადასხვა გზით დაიწყეს. ტურისტები, რომლების ტანზანიას ესტუმრებოდნენ და მიწისზედა ტრანსპორტით თუ წყლის სხვადასხვა გასართობი ტრანსპორტით ისარგებლებდნენ, მათ გადასახადი ემატებოდათ.

სავარაუდოდ, მოგზაურობისას მომავალში თქვენ უფრო მეტ ქვეყანაში შეხვდებით ტურისტულ გადასახადს. როგორც ამბობენ ეს გადასახადი „ტურისტების გადატვირთულობასთან“ - over-tourism-თან ბრძოლაა, რომელიც უკვე ევროპულ ქალაქებს აწუხებს. ტურისტების მოსაკრებლით შემოსული თანხა, როგორც ამბობენ, ინფრასტრუქტურის განახლებას უნდა მოხმარდეს.

გთავაზობთ ქვეყნებს, სადაც ტურისტად სტუმრობისას გადასახადის გადახდა მოგიწევთ:

ბჰუტანი

„ინსაიდერის“ მიხედვით, ბჰუტანში მოგზაურობას თუ გადაწყვეტთ, აუცილებლად უნდა გაითვალისწინოთ, რომ ტურისტებისთვის დღიური ტურისტული მოსაკრებელი 200-250 დოლარია. ასევე უნდა იცოდეთ, რომ გადასახადი დამოკიდებულია იმაზე, წლის განმავლობაში რამდენჯერ სტუმრობთ ქვეყანას. ეს გადასახადი ფარავს თქვენს მოსაკრებელს საკვებზე, ტრანსპორტსა და საცხოვრებელზე, ასევე ტურისტულ ადგილებში შესასვლელ მოსაკრებელს.

იაპონია

2019 წლის დასაწყისიდან იაპონიაში ტურისტული გადასახადი დააწესეს. 1000 იენის (9,25$) გადახდა, ტურისტებს ქვეყნის დატოვებისას მოუწევთ. როგორც ამბობენ, ტურისტული გადასახადებით შემოსული თანხა 2020 წლისთვის, ტოკიოში ზაფხულის ოლიმპიადისთვის ინფრასტრუქტურის მოწესრიგებას მოხმარდება. იაპონიის ეროვნული ტურისტული ორგანიზაციის წარმომადგენელთა განცხადებით, ტურისტული გადასახადი სტუმრებისთვის უფრო კარგი გარემოს შექმნას და მათ უსაფრთხოებასაც მოხმარდება.

საფრანგეთი

საფრანგეთში ტურისტული გადასახადი დამოკიდებულია იმაზე, თუ ქვეყნის რომელ ქალაქში წახვალთ სამოგზაუროდ.

გერმანია

„ინსაიდერის“ მიხედვით, გერმანიაში არის „კულტურული მოსაკრებელი“, რომელსაც kulturförderabgabe-ს ეძახიან და მოსაკრებელი, რომელიც 1 ღამით სასტუმროში დარჩენისას გემატებათ. ამ და სხვა გადასახადის გადახდა მოგიწევთ მაშინ, თუ გადაწყვიტეთ, რომ ფრანკპურტს, ჰამბურგს ან ბერლინს ესტუმროთ. ასევე საყურადღებოა, რომ „დამატებითი ღირებულების გადასახადი“ (VAT) ერთ პერსონაზე 5 ევროა, ან სასტუმროს თანხის 5%.

იტალია

ევროპის სხვა ცნობილი ქვეყნების მსგავსად, ტურისტული გადასახადი იტალიაშიც არის. გადასახადი დამოკიდებულია იმაზე, თუ რომელ ქალაქს ესტუმრებით. მაგალითად რომში, ერთი ღამის გადასახადი 3-დან 7 ევრომდე აღწევს და ეს, რა თქმა უნდა, სასტუმროზეა დამოკიდებული.

2018 წლის დასასრულს, ვენეციაში შესვლისას გადასახადი 10 ევროს აღწევდა. ერთ-ერთმა ადგილობრივმა მცხოვრებმა CNN-თან ინტერვიუში განაცხადა: „ვენეცია დაიპყრეს ტურისტებმა, ამიტომ ჩვენ აუცილებლად უნდა შევამციროთ ტურისტული ექსკურსიები“.

ესპანეთი

ესპანეთში ტურისტული გადასახადი მაშინ, როცა წლის განმავლობაში ესპანეთს ყველაზე მეტი ტურისტი სტუმრობს, დღეში ერთ პერსონაზე 4 ევრომდე აღწევს, ბარსელონაში კი 2,50 ევროა.

„ინსაიდერის“ მიხედვით, ტურისტული მოსაკრებელის გადახდა მოგიწევთსაბერძნეთში, შვეიცარიაში, ბელგიაში, ავსტრიაში, რუმინეთში, სლოვაკეთში, ხორვატიაში, პორტუგალიასა და ჰოლანდიაში.

წყარო: bpn.ge