ადამ მიცკევიჩის ქუჩა N11

info@oktravel.ge

FORBES-TOP 10 ქვეყანა ტურიზმის ყველაზე დიდი წილით ეკონომიკაში

ტურისტებს ყველაზე მეტად ზღვის სანაპიროები იზიდავთ. ამას ადასტურებს იმ ქვეყნების სტატისტიკა, რომლებსაც დასვენებისთვის კეთილმოწყობილი და ბუნებრივად ხელსაყრელი საზღვაო ან საოკეანო სანაპიროები აქვთ. ტურიზმზე ყველაზე მეტად მცირე კუნძულოვანი ქვეყნებია დამოკიდებული, რაც მათი ეკონომიკების სიმცირით, კლიმატით და ძალიან კარგი ზღვის სანაპიროებით არის განპირობებული. 

ტურიზმზე დამოკიდებული ტოპ-10 ქვეყნიდან მხოლოდ ერთი ქვეყანა - ბელიზი არ არის კუნძულოვანი სახელმწიფო. ტურიზმის წილად მიჩნეულია ტურიზმის დარგის კონტრიბუცია ქვეყნის მთლიან შიდა პროდუქტში (მშპ) და არა ტურისტების მიერ დახარჯული თანხის თანაფარდობა მშპ-თან. მაგალითად, 2018 წელს ტურიზმის სექტორის წილი საქართველოს მშპ-ში 7.6% იყო, როცა უცხოელი ტურისტებისგან მიღებული შემოსავალი საქართველოს მშპ-ის მიმართ 20%-მდე იყო. 

10. მალტა 

მოსახლეობა: 467ათასი 

მშპ: $14.5 მილიარდი 

ტერიტორია: 316 კმ2 

მალტის ეკონომიკაში ტურიზმის წილი 14.08%-ია, რაც დაახლოებით 2 მილიარდ დოლარს უდრის. 2017 წელს მალტაში 2.3 მილიონმა უცხოელმა იმოგზაურა, რაც ადგილობრივ მოსახლეობაზე თითქმის 5-ჯერ მეტია. 

მალტა პატარა კუნძულია ხმელთაშუა ზღვაში, იტალიასთან ახლოს. ერთ მოსახლეზე საშუალო წლიური შემოსავალი 46 000 (PPP) დოლარია. მალტა 1964 წლიდან არის დამოუკიდებელი სახელმწიფო, 2004 წლიდან კი - ევროკავშირის წევრი. გარდა იმისა, რომ მალტის თითქმის მთლიანი სანაპირო საზღვაო კურორტია, ის მდიდარია ისტორიული ძეგლებით. მას ქვეყანა-მუზეუმადაც კი მოიხსენიებენ. მთელი წლის განმავლობაში ტემპერატურა საშუალოდ 12-31 გრადუსს შორის მერყეობს, ზღვის სეზონი 6 თვეს გრძელდება. 

9. ფიჯი 

მოსახლეობა: 890ათასი 

მშპ: $5.1 მილიარდი 

ტერიტორია: 18 274 კმ2 

ფიჯის ეკონომიკაში ტურიზმის წილი 14.09%-ია, რაც დაახლოებით 720 მილიონ დოლარს უდრის. 2017 წელს ფიჯიში 843 ათასმა უცხოელმა იმოგზაურა, რაც თითქმის ადგილობრივი მოსახლეობის რაოდენობის ტოლია. 

ფიჯი არქიპელაგზე განლაგებული კუნძულოვანი სახელმწიფოა წყნარი ოკეანის სამხრეთ-დასავლეთით. ფიჯი ღარიბი ქვეყანაა, ერთ მოსახლეზე საშუალო წლიური შემოსავალი 10 000 (PPP) დოლარია. ფიჯი 1970 წლიდან დამოუკიდებელი სახელმწიფოა, მანამდე დიდი ბრიტანეთის კოლონია იყო. ფიჯიში ტურისტებს ძირითადად ოკეანის საოცარი სანაპირო იზიდავს, თეთრი ქვიშით, პალმებითა და ძალიან სუფთა წყლით. 
 

ასევე საინტერესოა ტროპიკული ტყეები და სოფლები მრგვალი ქოხებით, დღესასწაულები და ტრადიციები. ფიჯიში ტროპიკული კლიმატია, ყველაზე ცივ პერიოდშიც კი ტემპერატურა საშუალოდ 22 გრადუსია, თუმცა ხშირია წვიმები. 

8. ბელიზი 

მოსახლეობა: 396 ათასი 

მშპ: $1.9 მილიარდი 

ტერიტორია: 22 966 კმ2 

ბელიზის ეკონომიკაში ტურიზმის წილი 15%-ია, რაც დაახლოებით 285 მილიონ დოლარს უდრის. 2017 წელს ბელიზში 427 ათასმა უცხოელმა იმოგზაურა, რაც ადგილობრივი მოსახლეობის რაოდენობაზე 8%-ით მეტია. 

ბელიზი კარიბის ზღვის ნაპირას, მექსიკის სამხრეთით მდებარეობს. ერთ მოსახლეზე საშუალო წლიური შემოსავალი 8 500 (PPP) დოლარია. ბელიზი ღარიბი ქვეყანაა, ის 1981 წლიდან არის დამოუკიდებელი სახელმწიფო, მანამდე დიდი ბრიტანეთის კოლონია იყო. ვერ ვიტყვით, რომ ბელიზში ბევრი ტურისტი ჩადის, მის ეკონომიკაში ტურიზმის მაღალი წილი ეკონომიკის მცირე ზომით და სხვა დარგების განუვითარებლობით არის განპირობებული. ტურისტებს ძირითადად ზღვის სანაპირო, მაიას ტომის უძველესი ტაძრები და ცნობილი „ცისფერი ხვრელი“ იზიდავთ. ბელიზში საშუალო ტემპერატურა მთელი წლის განმავლობაში 24-28 გრადუსს შორის მერყეობს. 

7. სენტ-ლუსია 

მოსახლეობა: 177 ათასი 

მშპ: $1.9 მილიარდი 

ტერიტორია: 617 კმ2 

სენტ-ლუსიას ეკონომიკაში ტურიზმის წილი 15.6%-ია, რაც დაახლოებით 300 მილიონ დოლარს უდრის. 2017 წელს სენტ-ლუსიაში 386 ათასმა უცხოელმა იმოგზაურა, რაც ადგილობრივ მოსახლეობაზე თითქმის 2.2-ჯერ მეტია. 

სენტ-ლუსია კარიბის ზღვაში მდებარეობს. ერთ მოსახლეზე საშუალო წლიური შემოსავალი 14 400 (PPP) დოლარია. ბელიზი 1979 წლიდან არის დამოუკიდებელი სახელმწიფო, მანამდე დიდი ბრიტანეთის კოლონია იყო. ოფიციალური ენა ინგლისურია. სენტ-ლუსია ვულკანური წარმოშობის, მაღალმთიანი რელიეფის მქონე ქვეყანაა. 

ტურისტებს იზიდავს ზღვის სანაპირო, მთები, ჩანჩქერები და ბოტანიკური ბაღები. მთელი წლის განმავლობაში ტემპერატურა 23-31 გრადუსს შორის მერყეობს, თუმცა დეკემბერი-მაისია ტურისტებისთვის ხელსაყრელი, რადგან დანარჩენ პერიოდში ხშირად წვიმს. 

6. კაბო-ვერდე 

მოსახლეობა: 553ათასი 

მშპ: $2 მილიარდი 

ტერიტორია: 4 033 კმ2 

კაბო-ვერდეს ეკონომიკაში ტურიზმის წილი 17.7%-ია, რაც დაახლოებით 350 მილიონ დოლარს უდრის.. 2017 წელს კაბო-ვერდეში 668 ათასმა უცხოელმა იმოგზაურა, რაც ადგილობრივი მოსახლეობაზე თითქმის 21%-ით მეტია. 

კაბო-ვერდე ატლანტის ოკეანეში, აფრიკის დასავლეთ სანაპიროდან 570 კმ-ში მდებარეობს. ქვეყანა ვულკანური წარმოშობის 10 კუნძულს მოიცავს. ერთ მოსახლეზე საშუალო წლიური შემოსავალი 7 300 (PPP) დოლარია. კაბო-ვერდე 1975 წლიდან არის დამოუკიდებელი სახელმწიფო, მანამდე პორტუგალიის კოლონია იყო. ოფიციალური ენა პორტუგალიურია. ტურისტებს საზღვაო კურორტები იზიდავთ. მთელი წელი ზღვის სეზონია, ტემპერატურა 20-40 გრადუსს შორის მერყეობს. 

5. ვანუატუ 

მოსახლეობა: 285 ათასი 

მშპ: $0.9 მილიარდი 

ტერიტორია: 12 189 კმ2 

ვანუატუს ეკონომიკაში ტურიზმის წილი 18.2%-ია, რაც დაახლოებით 165 მილიონ დოლარს უდრის. 2017 წელს ვანუატუში 109 ათასმა უცხოელმა იმოგზაურა, რაც ადგილობრივ მოსახლეობაზე ნაკლებია. 

ვანუატუ წყნარ ოკეანეში მდებარეობს, ავსტრალიის კონტინენტიდან 3 600 კმ-ითაა დაშორებული. ქვეყანა 83 კუნძულს მოიცავს. ერთ მოსახლეზე საშუალო წლიური შემოსავალი 2 900 (PPP) დოლარია, ღარიბი ქვეყანაა. ვანუატუ 1980 წლიდან არის დამოუკიდებელი სახელმწიფო, მანამდე ინგლისისა და საფრანგეთის კოლონია იყო. 

ტურისტებს საზღვაო კურორტები იზიდავთ. ზღვის სეზონი 9 თვეს გრძელდება. ვანუატუში ძირითადად ავსტრალიიდან და ახალი ზელანდიიდან ჩადიან. პოპულარული ადგილია ქორწინების ცერემონიების აღნიშვნისთვის. 

4. ბაჰამა 

მოსახლეობა: 377 ათასი 

მშპ: $12.8 მილიარდი 

ტერიტორია: 13 878 კმ2 

ბაჰამის ეკონომიკაში ტურიზმის წილი 19.2%-ია, რაც დაახლოებით 2.5 მილიარდ დოლარს უდრის. 2017 წელს ბაჰამის კუნძულებზე 1.4 მილიონმა უცხოელმა იმოგზაურა, რაც ადგილობრივ მოსახლეობაზე 3.8-ჯერ მეტია. 

ბაჰამა კარიბის ზღვაში მდებარეობს, კუბასთან ახლოს, ჩრდილოეთით. ქვეყანა 700-ზე მეტი დიდი და მცირე კუნძულისგან შედგება. ერთ მოსახლეზე საშუალო წლიური შემოსავალი 33 500 (PPP) დოლარია, მდიდარი ქვეყანაა. ბაჰამა 1973 წლიდან არის დამოუკიდებელი სახელმწიფო, მანამდე დიდი ბრიტანეთის კოლონია იყო. ოფიციალური ენა ინგლისურია. 
 

ის მსოფლიოში ერთ-ერთ საუკეთესო საზღვაო კურორტად ითვლება თეთრი ქვიშისა და ძალიან სუფთა წყლის გამო. ტემპერატურა მთელი წელი 17-32 გრადუსს შორის მერყეობს. 

3. სეიშელი 

მოსახლეობა: 95 ათასი 

მშპ: $1.6 მილიარდი 

ტერიტორია: 459 კმ2 

სეიშელის ეკონომიკაში ტურიზმის წილი 25.7%-ია, რაც დაახლოებით 412 მილიონ დოლარს უდრის. 2017 წელს სეიშელის კუნძულებზე 350 ათასმა უცხოელმა იმოგზაურა, რაც ადგილობრივ მოსახლეობაზე 3.7-ჯერ მეტია. 

სეიშელი ინდოეთის ოკეანეში მდებარეობს, კუნძულ მადაგასკარის ჩრდილოეთით. ქვეყანა 100-ზე მეტი მცირე კუნძულისგან შედგება, საიდანაც 33-ია დასახლებული. ერთ მოსახლეზე საშუალო წლიური შემოსავალი 30 500 (PPP) დოლარია, მდიდარი ქვეყანაა. სეიშელი 1976 წლიდან არის დამოუკიდებელი სახელმწიფო, მანამდე დიდი ბრიტანეთის კოლონია იყო. ოფიციალური ენები ფრანგული და ინგლისურია. 

შეიძლება ითქვას, რომ სეიშელის კუნძულებზე სულ ზაფხულია, ტემპერატურა 24-30 გრადუსს შორის მერყეობს. სეიშელის სანაპიროებზე ყველაფერია, რაც იდეალურ საზღვაო ტურიზმს სჭირდება. 

2. ბრიტანეთის ვირჯინის კუნძულები 

მოსახლეობა: 32 ათასი 

მშპ: $1 მილიარდი 

ტერიტორია: 153 კმ2 

ბრიტანეთის ვირჯინის კუნძულების ეკონომიკაში ტურიზმის წილი 33%-ია, რაც დაახლოებით 330 მილიონ დოლარს უდრის. 2017 წელს ვირჯინის კუნძულებზე 335 ათასმა უცხოელმა იმოგზაურა, რაც ადგილობრივ მოსახლეობაზე 3.7-ჯერ მეტია. 

ვირჯინის კუნძულები კარიბის ზღვაში მდებარეობს, პუერტო-რიკოსთან ახლოს. ქვეყანა 50-ზე მეტი მცირე კუნძულისგან შედგება. ერთ მოსახლეზე საშუალო წლიური შემოსავალი 34 000 (PPP) დოლარია, მდიდარი ქვეყანაა. ბრიტანეთის ვირჯინის კუნძულები დიდი ბრიტანეთის ტერიტორიაა, თითქმის სრული ადგილობრივი ავტონომიით. ვირჯინის კუნძულებზეც სულ ზაფხულია, ტემპერატურა 20-36 გრადუსს შორის მერყეობს. აქაც ყველაფერია, რაც იდეალურ საზღვაო კურორტს სჭირდება, თუმცა ხასიათდება ხშირი წვიმებით. 

1. მალდივები 

მოსახლეობა: 366 ათასი 

მშპ: $5.3 მილიარდი 

ტერიტორია: 298 კმ2 

მალდივების ეკონომიკაში ტურიზმის წილი 39%-ია, რაც დაახლოებით 2 მილიარდ დოლარს უდრის. 2017 წელს მალდივის კუნძულებზე 1.4 მილიონმა უცხოელმა იმოგზაურა, რაც ადგილობრივ მოსახლეობაზე 3.8-ჯერ მეტია. 

მალდივის კუნძულები ინდოეთის ოკეანეში, ინდოსტანის ნახევაკუნძულის სამხრეთით მდებარეობს. მალდივების არქიპელაგი 1 192 მცირე კუნძულისგან შედგება, საიდანაც 220-ია დასახლებული. ერთ მოსახლეზე საშუალო წლიური შემოსავალი 22 000 (PPP) დოლარია, მდიდარი ქვეყანაა. მალდივები 1965 წლიდან არის დამოუკიდებელი სახელმწიფო, მანამდე დიდი ბრიტანეთის კოლონია იყო. 

ტემპერატურა მთელი წლის განმავლობაში 25-32 გრადუსს შორის მერყეობს. აქ ყოველთვის საზღვაო სეზონია, თუმცა დასვენება ძვირი ჯდება. მაგალითად, არის სასტუმროები, სადაც ერთი დღე-ღამის გატარება 35-40 ათასი დოლარი ღირს.

ვრცლად ნახვა
2019 წლის მეორე კვარტალში საქართველოდან საზღვარგარეთ ვიზიტების უმრავლესობა თურქეთსა და აზერბაიჯანში

საქსტატი 2019 წელის II კვარტლის გამყვანი ტურიზმის სტატისტიკას აქვეყნებს, რომლის თანახმადაც, საქართველოს რეზიდენტების საზღვარგარეთ ვიზიტების უმრავლესობა განხორციელდა თურქეთსა და აზერბაიჯანში, შესაბამისად, 255.3 ათასი და 117.9 ათასი ვიზიტი.

უფრო კონკრეტულად, თურქეთზე საქართველოს რეზიდენტების მიერ საზღვარგარეთ განხორციელებული ვიზიტების 44.3% მოდის, აზერბაიჯანზე - 20.4%, სომხეთზე - 10.9%, რუსეთის ფედერაციაზე - 7.5%, უკრაინაზე - 1.6%, ხოლო ევროკავშირის ქვეყნებზე - 10.3%.

საქსტატის ინფორმაციით, 2019 წლის II კვარტალში განხორციელებული ვიზიტებისას გაწეულმა ხარჯებმა 617.5 მილიონი ლარი შეადგინა, ვიზიტზე საშუალო ხარჯი კი 1 100.7 ლარს გაუტოლდა.

საქსტატის მონაცემებით, 2019 წლის II კვარტალში საქართველოს ტერიტორიიდან დაფიქსირდა საქართველოს რეზიდენტი მოგზაურების 1 780.1 ათასი გასვლა საზღვარგარეთ, რომლის უდიდესი ნაწილი, 45.3 პროცენტი, განხორციელდა 31-50 წლის მოგზაურების მიერ. აღნიშნული რაოდენობიდან საქართველოს რეზიდენტი ვიზიტორების მიერ საზღვარგარეთ განხორციელებული ვიზიტების რაოდენობამ 561 ათასი შეადგინა.

საქსტატის ანგარიშის თანახმად, 2019 წლის II კვარტალში საზღვარგარეთ საქართველოს რეზიდენტი ვიზიტორების რაოდენობამ 417.1 ათასი შეადგინა. საქართველოს რეზიდენტი ვიზიტორების მიერ საზღვარგარეთ განხორციელდა 325.6 ათასი ტურისტული და 235.4 ათასი ექსკურსიული ტიპის ვიზიტი. აღსანიშნავია, რომ საქართველოს რეზიდენტი ვიზიტორების 60.3 პროცენტი მხოლოდ ტურისტები იყვნენ. მხოლოდ ექსკურსანტების წილმა 34.6 პროცენტი შეადგინა, ხოლო ვიზიტორების 5.1 პროცენტი იყო როგორც ტურისტი, ასევე ექსკურსანტი.

2019 წლის II კვარტალში ყველაზე მეტი ვიზიტი, 37.3 პროცენტი, განხორციელდა მეგობრების/ ნათესავების მონახულების მიზნით. 2019 წლის II კვარტალში განხორციელებული ვიზიტებისას გათეული ღამეების საშუალო რაოდენობამ 3.8 ღამე შეადგინა. განხორციელებული ვიზიტების 94.9 პროცენტი წარმოადგენდა განმეორებითი ხასიათის ვიზიტს.

ვრცლად ნახვა
ვაკანსია Oktravel-ში

- ტურისტული სააგენტო „Ok Travel“ აცხადებს ვაკანსიას ტურ-ოპერატორის თანამდებობაზე.
  ძირითადი ფუნქციები:

- ტურპაკეტების შექმნა, გაყიდვა, ტურის მომზადება, დაგეგმვა და ორგანიზება; 
-  ტურის მიმდინარეობის კონტროლი;
-  სამოგზაურო დოკუმენტაციის, ტურის პროგრამის მომზადება, მომსახურე გუნდისათვის  
-  სერვის მომწოდებლების შერჩევა, მომწოდებლებთან ურთიერთობის დამყარება, ფასის შეთანხმება, კონტრაქტის გაფორმება, მათგან მომსახურებისპაკეტის სრულყოფილი აღწერილობის მიღება.
-  ტურისტული პროდუქტის შექმნა მსოფლიოს ქვეყნების მიმართულებით და მათი რეალიზება
-  online დაჯავშნის სისსტემებში მუშაობა
-  ავიაბილეთების სისტემაში მუშაობა
-  სასტუმროების დაჯავშნის სისტემაში მუშაობა

-  საკვალიფიკაციო მოთხოვნები:
-  სრული უმაღლესი განათლება (სასურველია) ტურიზმის განხრით;
-  მინიმუმ 1 წლიანი სამუშაო გამოცდილება ტურიზმის სფეროში;
-  ინგლისური და რუსული ენების სრულყოფილად ცოდნა;
-  საოფისე პროგრამების მაღალ დონეზე ცოდნა.

-  უნარები:
-  ორგანიზებულობა;
-  პასუხისმგებლობის მაღალი გრძნობა;
-  დეტალებზე ორიენტირებულობა;
-  გუნდურად მუშაობის უნარი;
-  ვერბალური და წერილობითი კომუნიკაციის უნარი.

-  გამოსაცდელი ვადა 1 თვე
-  ანაზღაურება ინდივიდუალურად, შეთანხმებით, გამოცდილების შესაბამისად;
-  დაინტერესებულმა პირებმა რეზიუმე გადმოგზავნეთ ელ. ფოსტაზე: 
-  info@oktravel.ge
-  სათაურში მიუთითეთ ვაკანსიის სახელწოდება.

ვრცლად ნახვა
ვილნიუსიდან ბათუმში პირველი ჩარტერი ჩამოფრინდა

ვილნიუსიდან ბათუმის მიმართულებით პირველი ჩარტერული რეისი შესრულდა.

ლიეტუვას დედაქალაქიდან ჩამოფრენილ პირველ მგზავრებს ბათუმის აეროპორტში აჭარის ტურიზმის დეპარტამენტის თავმჯდომარე თინათინ ზოიძე დახვდა. მგზავრებისთვის აეროპორტში ფოლკლორ შოუ და ქართული ღვინის დეგუსტაცია გაიმართა.

ჩარტერული რეისით ბათუმს 180 ტურისტი ესტუმრა, რომელთა 95% ბათუმსა და ქობულეთში გეგმავს დასვენებას. ფრენებს ავიაკომპანია GetJet Airlines ასრულებს და ის სექტემბრის ბოლომდე, ყოველ ორშაბათს განხორციელდება. 2020 წლისთვის იგეგმება ფრენების სიხშირის გაზრდაც. ვილნიუსი-ბათუმის ჩარტერები შემდეგი წლისთვის ზაფხულის ტურისტული სეზონის განმავლობაში შესრულდება. ის, ტალინი-ბათუმის ჩარტერული ფრენების მსგავსად, ტურისტული კომპანია „აჭარა ტური“-სა და Tez Tour-ის ორგანიზებით ხორციელდება.

„ჩვენთვის მნიშვნელოვანია, რომ ტალინის შემდეგ ბათუმში ჩარტერები უკვე დაიწყო ვილნიუსიდანაც. ამ შემთხვევაში ფრენები გაგრძელდება სექტემბრის ბოლომდე, თუმცა სასიხარულოა, რომ კომპანია გეგმავს ფრენების გაზრდას. შემდეგი წლისთვის, უკვე მთელი ზაფხულის ტურისტულის სეზონის განმავლობაში გვექნება ჩარტერული რეისები ლიეტუვას დედაქალაქიდან. ესტონეთისა და ლატვიის მსგავსად, ლიეტუვა ჩვენთვის საინტერესო ტურისტული ბაზარია, სადაც აჭარის ტურისტული პროდუქტების რეკლამირებას აქტიურად ვანხორციელებთ. შესაბამისად, რაც მეტი ფრენა გვექნება ევროპიდან ბათუმისა და ზოგადად, საქართველოს მიმართულებით, მით უფრო მეტი ევროპელი ტურისტი ესტუმრება ჩვენს ქვეყანას,“ - განაცხადა აჭარის ტურიზმის დეპარტამენტის თავმჯდომარე თინათინ ზოიძემ.

ვრცლად ნახვა
საუდის არაბეთში ძვირადღირებული ეკო-მეგობრული კურორტი შენდება

საუდის არაბეთში ტურიზმის სფეროს მიმართ ინტერესი იზრდება. საუდის არაბეთის პრინცი მუჰამედ ბინ სალმანი ახალ სასტუმროებსა და მიმზიდველ წერტილებში მილიარდობით თანხას ხარჯავს, რათა საუდის არაბეთი რეგიონის კიდევ ერთი მიმზიდველი და ძვირადღირებული ტურისტული მიმართულება გახდეს.

როგორც გამოცემა Euronews-ი წერს, პრინცმა გადაწყვიტა, რომ ეს ყველაფერი ეკო-მეგობრული მასალებით განხორციელდეს. ეკო-მეგობრული მასალების გამოყენების ვალდებულება ექნებათ როგორც უდაბნოს საზღვრებთან არსებულ კერძო მესაკუთრეებს, ისე მეგა პროექტებს, რომლებიც მასშტაბური მშენებლობების განხორციელებას გულისხმობს.

Euronews-მა კითხვით მიმართა HKS Architects, რომელიც მთელ ამ პროცესზეა პასუხისმგებელი, რომელმა კომპანიამ გაიმარჯვა ტენდერში, რომელიც მომავალ წელს, წითელი ზღვის სანაპიროზე ნული გამონაბოლქვის მქონე დასასვენებელი სივრცის მშენებლობას გულისხმობს, ასევე, მათი გუნდი როგორ, რა მეთოდებით იზრუნებს გარემოს დაცვაზე.

ფირმა ცდილობს, გარემოს დაცვაზე მაქსიმალურად იზრუნოს. მშენებლობის პროცესში უზრუნველყოფილი იქნება, რომ ნახშირბადი გარემოში არ გავრცელდეს. ამ პროექტზე კი კომპანია Amaala იმუშავებს.

Amaala სანაპიროზე, 12 კილომეტრის სიგრძესა და ჯედიდან ჩრდილოეთით, 800 კილომეტრში, სამ დასასვენებელ სივრცეს ააშენებს. ორი კომპლექსის დიზაინი და ქალაქის გენერალური გეგმა HKS-ს ეკუთვნის. აღნიშნული გენერალური გეგმა გასულ წელს გახდა ცნობილი და ის როგორც მფრინავების დასაჯდომ ადგილებს, ისე იახტისთვისა და მყვინთავებისთვის განკუთვნილ ტერიტორიებს ითვალისწინებს.

Euronews დეტალურად გვიამბობს იმ პროექტის შესახებ, რომლის განხორციელებასაც საუდის არაბეთი გეგმავს. მათი ინფორმაციით, წითელ ზღვაში, ეგვიპტის მხარეს მასობრივი ტურიზმის გამო რიფებს არასასიამოვნოდ ეპყრობოდნენ. ახალ პროექტში კი მათი დაცვა და კონსერვაცია გათვალისწინებულია. პროექტის ავტორების თქმით, დაიცავენ მარჯნის რიფებს, კუებსა და სხვა წყლის ცხოველებს, რათა საკუთარ სახლებში მშვიდად იცხოვრონ.

გამოცემის ინფორმაციით, პროექტის თანახმად, Amaala-ს 3 სივრცეს განსხვავებული ფუნქცია და ხასიათი ექნება. პირველი ჯანმრთელობაზე, კეთილდღეობასა და სპორტზე იქნება ორიენტირებული, ამიტომ ის მოიცავს კვლევით ინსტიტუტს, სამედიცინო და დასასვენებელ ცენტრებს. მეორე კომპლექსი ხელოვნებისა და კულტურის ცენტრი იქნება და ვიზუალით, სოფელს დაემსგავსება. ის მოიცავს მუზეუმებს და უმასპინძლებს მსოფლიო მასშტაბის კულტურულ ღონისძიებებს.

მესამე მიმართულებაც მეორე კულტურული ჰაბი იქნება, რომელიც რივიერას სტილის დასვენებას მოიცავს.

დასასვენებელი კომპლექსის მშენებლობის კიდევ ერთი მნიშვნელოვანი ასპექტი - მზის ენერგიის გამოყენებაა. კომპანია Amaala გეგმავს, რომ სისტემა მზის ენერგიაზე ააწყოს.

არქიტექტორები იმედოვნებენ, რომ ელექტრობის საჭიროებას მინიმუმამდე შეამცირებენ ქვეყანაში, სადაც ზამთარშიც კი ტემპერატურა 20 გრადუსზე ქვემოთ იშვიათად ჩამოდის.

გეგმის დიზაინერები და პრინცი მუჰამენ ბინ სალმანი იმედოვნებენ, რომ ეს ტურისტული მიმართულება თავისი ეკო-მეგობრულობის გამოც ძალიან მიმზიდველი იქნება.

ახალი ტურისტული მიმართულება ახალ აეროპორტს საჭიროებს. აეროპორტიდან კი სტუმრებს მხოლოდ ელექტრომობილებით გადაადგილება შეეძლებათ, რათა გარემოში გაზების გამოფრქვევას ხელი შეუშალონ.

ვრცლად ნახვა
რამდენს და რაში ხარჯავენ ქართველი ტურისტები უცხოეთში

საქართველოს მოქალაქეები უცხოეთში ვიზიტისას ყველაზე მეტ თანხას საყიდლებზე ხარჯავენ. სტატისტიკის ეროვნული სამსახურის მონაცემებით, 2019 წლის მეორე კვარტალში ერთმა ტურისტმა უცხოეთში საყიდლებზე საშუალოდ 368 ლარი დახარჯა, რაც მთლიანი ხარჯის 33,4%-ს შეადგენს.

მეორე ადგილზეა - საკვები და სასმელი, ამ შემთხვევაში ერთი ტურისტი 315 ლარს ხარჯავს. 207,8 ლარს ხარჯავენ განთავსებაში. საქსტატის ცნობით, 207,8 ლარს ხარჯავენ ქართველი ტურისტები განთავსებაში; გასართობ, გამაჯანსაღებელ, კულტურულ და სპორტულ ღონისძიებებში 86,6 ლარის; ადგილობრივ ტრანსპორტში 51,4 ლარს; სხვა ხარჯების მოცულობა 71,2 ლარს შეადგენს.

ამასთან, საქსტატის ცნობით, 2019 წლის მე-2 კვარტალში განხორციელებული ვიზიტებისას გაწეულმა ხარჯებმა 617.5 მილიონი ლარი შეადგინა, ვიზიტზე საშუალო ხარჯი კი 1 100.7 ლარს გაუტოლდა.

ამასთან, 2019 წლის მე-2 კვარტალში საქართველოს ტერიტორიიდან დაფიქსირდა საქართველოს რეზიდენტი მოგზაურების 1 780.1 ათასი გასვლა საზღვარგარეთ, რომლის უდიდესი ნაწილი, 45.3 პროცენტი, განხორციელდა 31-50 წლის მოგზაურების მიერ. აღნიშნული რაოდენობიდან საქართველოს რეზიდენტი ვიზიტორების მიერ საზღვარგარეთ განხორციელებული ვიზიტების რაოდენობამ 561 ათასი შეადგინა.

2019 წლის მე-2 კვარტალში ყველაზე მეტი ვიზიტი, 37.3 პროცენტი, განხორციელდა მეგობრების/ ნათესავების მონახულების მიზნით. 2019 წლის II კვარტალში განხორციელებული ვიზიტებისას გათეული ღამეების საშუალო რაოდენობამ 3.8 ღამე შეადგინა. განხორციელებული ვიზიტების 94.9 პროცენტი წარმოადგენდა განმეორებითი ხასიათის ვიზიტს.

საქართველოს რეზიდენტების საზღვარგარეთ ვიზიტების უმრავლესობა განხორციელდა თურქეთსა და აზერბაიჯანში, შესაბამისად, 255.3 ათასი და 117.9 ათასი ვიზიტი. უფრო კონკრეტულად, თურქეთზე საქართველოს რეზიდენტების მიერ საზღვარგარეთ განხორციელებული ვიზიტების 44.3% მოდის, აზერბაიჯანზე - 20.4%, სომხეთზე - 10.9%, რუსეთის ფედერაციაზე - 7.5%, უკრაინაზე - 1.6%, ხოლო ევროკავშირის ქვეყნებზე - 10.3%.

ვრცლად ნახვა
ბოლონია, კიოლნი -WIZZ AIR-ის 2 ახალი მიმართულება ქუთაისის აეროპორტიდან

იტალიის ქალაქი ბოლონია და გერმანიის ქალაქი კიოლნი ორი ახალი მიმართულებაა, სადაც ფრენები ქუთაისის დავით აღმაშენებლის სახელობის აეროპორტიდან ავიაკომპანია Wizzair-ის მიერ შესრულდება. 

საქართველოს აეროპორტების გაერთიანების ინფორმაციით, ბოლონიის მიმართულებით ფრენები 2019 წლის ნოემბრიდან კვირაში ორი სიხშირით, სამშაბათსა და შაბათს შესრულდება, ხოლო კიოლნის მიმართულებით ქუთაისის საერთაშორისო აეროპორტიდან რეისები 2020 წლის 1-ლი ივლისიდან დაიწყება. 

ბილეთების შეძენა ორივე მიმართულებით 23 აგვისტოდან იქნება შესაძლებელი. 

ამასთან, უწყების ინფორმაციით, Wizz Air უკვე დაანონსებულ ქუთაისი-ნიცას მიმართულებულებით ფრენებს 2020 დეკემბრის ნაცვლად, 2019 წლის 12 დეკემბრიდან დაიწყებს. ფრენები კვირაში ორი სიხშირით, ხუთშაბათსა და კვირას შესრულდება. ავიაკომპანია მილანის მიმართულებით სიხშირეებსაც ზრდის და რეისები ქუთაისიდან კვირაში 4 ჯერ შესრულდება (ორშაბათი, ოთხშაბათი, ხუთშაბათი, პარასკევი). 

შეგახსენებთ, რომ 10 სექტემბრიდან ქუთაისის საერთაშორისო აეროპორტში Wizz Air-ის მესამე ბაზირებული ხომალდი განთავსდება, რომელიც ფრენების ევროპის 6 ახალი მიმართულებით: ბრიუსელში, კოპენჰაგენში, ბაზელში, ეინდჰოვენში, ტალინსა და ბარიში შეასრულებს.

ვრცლად ნახვა
საქართველოში „რაინეარი“ შემოდის-ფრენები ქუთაისის და თბილისის აეროპორტიდან შესრულდება

ქართულ მხარესა და ირლანდიურ დაბალბიუჯეტიან ავიაკომპანია „რაინეარს" შორის ურთიერთთანამშრომლობის შესახებ ხელშეკრულება გაფორმდება. 

  ეკონომიკის სამინისტროდან ცობით, დღეს, 14.00 საათზე, საქართველოს მთავრობის ადმინისტრაციაში ქართულ მხარესა და ირლანდიურ დაბალბიუჯეტიან ავიაკომპანია „რაინეარს" შორის ურთიერთთანამშრომლობის შესახებ ხელშეკრულება გაფორმდება. 

ხელშეკრულებას ხელს მოაწერენ ეკონომიკისა და მდგრადი განვითარების სამინისტროს ,,საქართველოს აეროპორტების გაერთიანების" დირექტორი გიორგი ჩოგოვაძე და Ryanair-ის კომერციული დირექტორი დევიდ ო' ბრაიენი. 

ხელმოწერას ეკონომიკისა და მდგრადი განვითარების მინისტრი, ნათია თურნავა დაესწრება. 

„მსოფლიოს ერთ-ერთი უმსხვილესი და ცნობილი დაბალბიუჯეტური ავიაკომპანია საქართველოდან პირდაპირ ავიარეისებს ევროპის მიმართულებით როგორც ქუთაისის, ისეთი თბილისის საერთაშორისო აეროპორტიდან შეასრულებს“, - ნათქვამია გავრცელებულ ინფორმაციაში. 

ვრცლად ნახვა
RYANAIR-ი ფრენების რაოდენობას ამცირებს

მიუხედავად ცხელი და ტურისტულად დატვირთული ზაფხულისა, ირლანდიური ავიაკომპანია Ryanair-ი რეისების რაოდენობას ამცირებს, მიზეზად კი, ტექნიკური ხარვეზი სახელდება, რომლის თანახმადაც, თვითმფრინავი Boeing 737 MAX შესაკეთებელია;

ავიამწარმოებელი ვადებში ვერ ეტევა და აგვიანებს მოწოდებას, შესაბამისად, ავიაკომპანია მგზავრთნაკადს ვეღარ უმკლავდება და მივიდა იმ გადაწყვეტილებამდე, რომ ფრენები დროებით შეამციროს. 

როგორც „რაინეარის“ წარმომადგენლები აცხადებენ, ფრენები აღდგება აუცილებლად, თუმცა მხოლოდ 2020 წლიდან; ამ გადაწყვეტილებას კი, მოჰყვება თავად პერსონალის შემცირებაც და ასევე ავიაკომპანია სხვადასხვა აეროპორტში ოპერირებაზეც უარს იტყვის. 

ამის შესახებ Ryanair-ის დირექტორმა მაიკლ ო ლირიმ „ტვიტერის“ საშუალებით განაცხადა. 

“ჩვენ მომდევნო ხუთი წლის განმავლობაში ავიაპარკს 135 უნიკალური დიზაინის მქონე თვითმფრინავს შევმატებთ და მსგავსი ტექნიკური პრობლემა აღარ განმეორდება, თუმცა დროებით ასეთი გადაწყვეტილება მივიღეთ და „რაინეარი“ ამცირებს ფრენებს“, - აღნიშნა დაბალბიუჯეტიანი ავიაკომპანიის გენერალურმა დირექტორმა. 

ინფორმაციისთვის: ლაინერით - Boeing 737 MAX -ით ფრენა ჯერ კიდევ შეზღუდულია მსოფლიოში იმ ორი კატასტროფის შემდეგ, რომლებიც ინდონეზიასა და ეთიოპიაში მოხდა და რომლის შედეგადაც ჯამში, 346 ადამიანი დაიღუპა. დღევანდელი მდგომარეობით კი, ავიალაინერის ხუთი ტექნიკური პრობლემა და დეფექტი გამოიკვეთა, რომლის შეკეთებაზეც მუშაობენ პროფესიონალები და სავარაუდოდ, სექტემბერში ფრენისთვის მზად იქნება.

ვრცლად ნახვა
საკრუიზო ბუმი ვენაში და ტურისტებით შეწუხებული ადგილობრივები

ვიზიტორები, რომლებიც ვენაში საკრუიზო ხომალდებით ჩადიან, ქალაქში ცოტა ხანს რჩებიან, გადიან ცენტრში, ხმაურობენ, ანაგვიანებენ ქუჩებს და ფულსაც არ ხარჯავენ - ეს ის კლიშეა, რომელიც ავსტრიის დედაქალაქის მცხოვრებლებს ვენაში ხომალდით შესული უცხოელი ტურისტების მიმართ აქვთ. 

დიდ სამგზავრო გემებს ვენაში სულ უფრო და უფრო აკრიტიკებენ; ხმაურიან დამსვენებლებს ადგილობრივები პერმანენტულად უჩივიან, თუმცა რეალობა საკმაოდ განსხვავებულია. 

როგორც ავსტრიის ტურიზმის განყოფილება ირწმუნება, ვენა ამ სეგმენტისგაან დიდ სარგებელს იღებს, ქალაქის ეკონომიკა გემებით შემოსული ტურისტებისგან საკმაოდ კარგ შემოსავალს იღებს.


როგორც ცნობილია, ავსტრიის დედაქალაქში საზღვაო ტრანსპორტით ყოველწლიურად, დაახლოებით, 350,000 ადამიანი ჩადის და მათი რიცხვი წლიდან წლამდე იზრდება.

ვრცლად ნახვა
WIZZ AIR-მა 12 ახალი მიმართულების დაწყება გადაავადა - მიზეზებს კომპანია განმარტავს

Wizz Air-ი 12 ახალ მიმართულებას 2020 წლიდან დაამატებს.

აღნიშნულთან დაკავშირებით კომპანია განცხადებას ავრცელებს, რომელშიც ფრენების დაწყების გადადების მიზეზებია განმარტებული:

"Wizz Air- მა რამდენიმე ხნის წინ ქუთაისის ბაზაზე ორი ახალი Airbus A320 ავიახომალდისა და თორმეტი ახალი მიმართულების დამატება დააანონსა ფრანკფურტ ჰანში, ჰამბურგში, ჰერაკლიონში, კარლსრუე /ბადენ ბადენში, ნეაპოლში, ნიცაში, ნიურნბერგში, პიზაში, პოზნანში, სტოკჰოლმში, ტურკუსა და ვენეციაში. 

ავიაკომპანიისთვის ავიახომალდების მიწოდების ქსელში მოულოდნელმა შეფერხებამ რამდენიმე სხვადასხვა ქვეყნიდან, მათ შორის, საქართველოდან დანიშნულ ახალ ავიარეისებზე მოახდინა გავლენა.

2019 წლის ივნისში დაანონსებული მე-4 და მე-5 ბაზირებული ავიახომალდები აეროპორტს 2020 წლის ივლისიდან და დეკემბრიდან მოემსახურება, შესაბამისად, თორმეტი ახალი მარშრუტის ამოქმედებაც შედარებით გვიან მოხდება. 

მგზავრებს, რომლებმაც საჰაერო ხომალდების განაწილებამდე უკვე შეიძინეს ბილეთები რომელიმე ზემოთ ხსენებული თორმეტი მიმართულებით, ეცნობებათ ცვლილებების შესახებ. მგზავრებს შეეთავაზებათ ბილეთის ცვლილება (აირჩიონ იგივე მარშრუტი, მაგრამ მოგვიანებით ან რომელიმე სხვა მიმართულება), ბილეთში გადახდილი თანხის 100% დაბრუნება ან ბილეთის საფასურის 120%-ის დაბრუნება მგზავრის WIZZ ანგარიშზე. 

ავიაკომპანია Wizz Air-ი გულწრფელად უხდის ბოდიშს დაზარალებულ მგზავრებს აღნიშნული ფაქტით შექმნილი უხერხულობის გამო. 

მნიშვნელოვანი ინფორმაცია იმ მგზავრებისთვის, რომლებმაც დაჯავშნეს ბილეთები ონლაინ ტურისტული სააგენტოების მეშვეობით და არა wizzair.com-ით: მგზავრები, მსგავს შემთხვევაში უნდა დაუკავშირდნენ თავიანთ პარტნიორ სააგენტოს. მგზავრები, რომლებიც დარეკავენ საქართველოდან გრაფიკის შეცვლასთან დაკავშირებით, უნდა დაუკავშირდნენ Wizz Air-ის სერვის ცენტრს ნომერზე: +995 706 777 037. სხვა ქვეყნებიდან ზარების შემთხვევაში ნომრების გასაგებად კი უნდა ეწვიონ ბმულს: 

https://wizzair.com/ka-ge/information-and-services/travel-information/special-assistance#/  ", - ნათქვამია განცხადებაში.

ცნობისთვის: Wizz Air-მა ქუთაისის საერთაშორისო აეროპორტიდან ოპერირება 2012 წელს დაიწყო.

ვრცლად ნახვა
ვენეციაში დიდი ტურისტული ხომალდები ვეღარ შევლენ

ვენეცია დიდ საკრუიზო გემებს კრძალავს.  სექტემბრიდან არხების ქალაქში ტურისტული ხომალდები ვეღარ შევლენ. გადაწყვეტილება იტალიის ტრანსპორტის მინისტრმა გაახმაურა.  

დანინო ტონინელის ცნობით, ისტორიული ქალაქის ცენტრის ნაცვლად, გემებისთვის ფუსინასა და ლომბარდიაში პორტები მოეწყობა, სწორედ მანდ მოხდება მათი შესვლაც.
 

შეგახსენებთ, რომ ვენეციაში ცოტა ხნის წინ პლებისციტი ჩატარდა. ვენეციელების 99%-მა ხმა მისცა ტურისტული ხომალდების ქალაქის პორტში შესვლის აკრძალვას.


მანამდე კი, Unesco-მ იტალიის მთავრობას, გემების აკრძალვის შესახებ არაერთხელ მოუწოდა, კულუტურლი მემკვიდრეობის ძეგლთა დაცვის ორგანიზაციაში აცხადებდნენ, რომ მასობრივად დიდი ხომალდები ვენეციის ისტორიულ ნაწილს საფრთხეს უქმნის.
 

აღსანიშნავია ისიც, რომ 2016 წლის მონაცემებით, სახომალდო ტურიზმმა ვენეციის ბიუჯეტს 5,6 მლრდ ვერო მოუტანა.

ვრცლად ნახვა
2019 წლის 7 თვეში საქართველოს აეროპორტებში მგზავრთნაკადი 12%-ით გაიზარდა

საქართველოს ეროპორტების გაერთიანებამ აეროპორტების მგზავრთნაკადის სტატისტიკა გამოაქვეყნა, საიდანაც ირკვევა, რომ ივლისში ქართული აეროპორტები ჯამში, 571,848 მგზავრს მოემსახურნენ, რაც 2018 წლის ანალოგიურ პერიოდთან შედარებით 7.3%-ით ნაკლებია.

მათი შეფასებით, შემცირება 2019 წლის 8 ივლისიდან რუსეთის მიმართულებით პირდაპირი ავიამიმოსვლის შეჩერებამ გამოიწვია. 

დოკუმენტის მიხედვით, ავიასანქციების შედეგი ყველაზე ნაკლებად ქუთაისის აეროპორტზე აისახა, შესაბამისად, ერთადერთი საერთაშორისო აეროპორტი, რომლის ნაკადიც გაიზარდა, სწორედ ქუთაისი იყო. 

ქუთაისის საერთაშორისო აეროპორტი 85,738 მგზავრი, ზრდა - 14%;

თბილისის აეროპორტი - 384,632 მგზავრი, კლება 10%;

ბათუმის საერთაშორისო აეროპორტი - 100,432 მგზავრი, კლება - 9.7%;

ცნობისთვის: 2019 წლის პირველი ორი კვარტლის მონაცემებით, საქართველოში დაფიქსირდა მგზავრთნაკადის ზრდის მნიშვნელოვანი დინამიკა. 2019 წლის პირველი 6 თვის მონაცემებით (იანვარი-ივნისი), საქართველოს ხუთივე აეროპორტი ჯამში 2,486,780 მგზავრს მოემსახურა, რაც 18%-ით აღემატება წინა წლის ანალოგიურ პერიოდს - 2018 წელს 2,103,126 მგზავრი. 

რაც შეეხება, 2019 წლის იანვარ-ივლისის ჯამური სტატისტიკას, აეროპორტების გაერთიანების ინფორმაციით, 7 თვის მონაცემებით, საქართველოს აეროპორტებში მგზავრთნაკადის ზრდის ტემპი 18%-დან 12%-მდე შემცირდა - საქართველოს აეროპორტები ჯამში - 3,058,473 მგზავრს მოემსახურა, რაც 12% აღემატება წინა წლის ანალოგიურ პერიოდს (2018 წელი 2,719,931 მგზავრი).

ვრცლად ნახვა
Wizz Air-ი 6 ახალი ევროპული მიმართულებით ფრენებს სექტემბრიდან იწყებს

ტალინის, ბარის, კოპენჰაგენის, ეინდჰოვენის, ბაზელის და ბრიუსელის შემდეგ, WIZZ Air ქუთაისის საერთაშორისო აეროპორტიდან პირდაპირი ფრენები ევროპის კიდევ 10 ქალაქში დაიწყება. როგორც ქუთაისის საერთაშორისო აეროპორტში „ბიზნესპრესნიუსს“ განუცხადეს, ახალი მიმართულებები ეტაპობრივად, 2020 წლის ზაფხულამდე დაემატება. ახალ მიმართულებებს შორის იქნება - ჰამბურგი, ნიცა, ფრანკპურტი, ვენეცია, ჰერაკლიონი და ა.შ.

ცნობისათვის, WIZZ Air-მა ქუთაისის ექვსი ახალი მიმართულებით ფრენების დაწყებას აგვისტოში გეგმავდა. თუმცა საოპერაციო შეფერხების გამო ფრენები 10 სექტემბრამდე გადაიდო. ქუთაისის საერთაშორისო აეროპორტის ინფორმაციით, რეგულარული ფრენები ეინდჰოვენის (ჰოლანდია), ტალინის (ესტონეთი), ბრიუსელის (ბელგია), კოპენჰაგენის (დანია), ბარის (იტალია) და ბაზელის (შვეიცარია) მიმართულებით კვირაში რამდენჯერმე შესრულდება. უკვე 2020 წლის ზაფხულამდე კი პირდაპირი ფრენები ევროპის კიდევ რამდენიმე ქალაქში დაიწყება, მათ შორის, კალსროეში, ნეაპოლში, პიზასა და ვენეციაში.

ცნობისათვის, WIZZ Air-მა ქუთაისის საერთაშორისო აეროპორტიდან ოპერირება 2012 წელს დაიწყო. 7-წლიანი მოღვაწეობის შემდეგ, უკვე 2019 წლის 10 სექტემბრიდან ქუთაისის საერთაშორისო აეროპორტიდან ფრენებს WIZZ Air დამატებით 6 მიმართულებით განახორციელებს. საერთო ჯამში, იმ პერიოდიდან ავიაკომპანია მგზავრებს 27 ავიამიმართულებას შესთავაზებს 18 ქვეყნის მასშტაბით.

2019 წლის ივნისის მონაცემებით, ქუთაისის აეროპორტი 77 003 მგზავრს მოემსახურა, რაც 21% -ით მეტია შარშანდელ ანალოგიურ პერიოდთან შედარებით, 2018 წლის ივნისში აეროპორტით 63 679 მგზავრმა ისარგებლა. რაც შეეხება რეისების რაოდენობას, წელს ივნისში 247 ავიარეისი განხორციელდა, რაც 7%-ით მეტია წინა წლის ანალოგიურ პერიოდთან შედარებით (231 ავიარეისი).

რაც შეეხება იანვარ-ივნისის მონაცემებს, ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს ინფორმაციით, ქუთაისის საერთაშორისო აეროპორტში მგზავრთნაკადი 55.40%-ით გაიზარდა. სულ გადაყვანილ იქნა 364 834 მგზავრი - 130 060 მგზავრით მეტი, ვიდრე 2018 წლის ანალოგიურ პერიოდში. მთლიანად კი 2019 წლის პირველის ექვსი თვის განმავლობაში, საქართველოს აეროპორტები ჯამში 2 489 823 მგზავრს მოემსახურა.

ვრცლად ნახვა
ქუთაისიდან ავიარეისები 12 ახალი მიმართულებით ინიშნება

Wizz Air ევროპის 12 ახალი მიმართულებით პირდაპირ ავიარეისებს ამატებს.

ფრანკფურტი (გერმანია), ჰამბურგი (გერმანია), ბადენ-ბადენი (გერმანია), ვენეცია (იტალია), ნეაპოლი (იტალია),ნიცა (საფრანგეთი), პიზა (იტალია), სტოკჰოლმი (შვედეთი), ნიურნბერგი (გერმანია), პოზნანი (პოლონეთი), ჰერაკლიონი (საბერძნეთი, კუნძული კრეტა), ტურკუ (ფინეთი) – 12 ახალი ევროპული ავიამიმართულება ქუთაისის საერთაშორისო აეროპორტიდან

ქუთაისის დავით აღმაშენებლის საერთაშორისო აეროპორტში ოპერირებას Wizz Air მეოთხე და მეხუთე ბაზირებულ AIRBUS A 320 ტიპის თანამედროვე საჰაერო ხომალდებს ამატებს. მეოთხე ბაზირებული ბორტი 2019 წლის ბოლოდან რეგულარულ ფრენებს ევროკავშირის ქვეყნების 7 მიმართულებით: პოზნანი, ჰამბურგი, ნეაპოლი, ვენეცია, პიზა, ფრანკფურტი და ბადენ-ბადენში შეასრულებს. ხოლო 2020 წლის ზაფხულიდან ქუთაისის საერთაშორისო აეროპორტს მეხუთე ბაზირებული საჰაერო ხომალდით კიდევ ევროპის 5 ახალი მიმართულება: სტოკჰოლმი, ნიურნბერგი, ტურკუ, ნიცა, ჰერაკლიონი დაემატება. საქართველოდან დღემდე არ სრულდება ფინეთსა და შვედეთში პირდაპირი რეგულარული საჰაერო მიმოსვლა.

შეთანხმებას ხელი მოაწერეს ეკონომიკისა და მდგრადი განვითარების სამინისტროს “საქართველოს აეროპორტების გაერთიანების” დირექტორმა გიორგი ჩოგოვაძემ და უნგრული დაბალბიუჯეტიან ავიაკომპანია Wizz Air -ის ლოგისტიკის დირექტორმა, ანდრაშ სებოკმა.

ეკონომიკისა და მდგრადი განვითარების სამინისტროს და Wizz Air-ს შორის რამდენიმეთვიანი მოლაპარაკებებისა და რამდენიმეწლიანი წარმატებული თანამშრომლობის შედეგად, ქუთაისის საერთაშორისო აეროპორტში მესამე ბაზირებული საჰაერო ხომალდის დაანონსებიდან უპრეცედენტოდ მოკლე ვადაში – 4 თვეში, Wizz Air ქუთაისში მეოთხე და მეხუთე თვითმფრინავსა და 12 ახალ ევროპულ მიმართულებას ამატებს. 2020 წლის ზაფხულისთვის ქუთაისის საერთაშორისო აეროპორტიდან პირდაპირი რეგულარული რეისები ევროკავშირის უკვე 19 ქვეყნის 39 მიმართულებით იქნება შესაძლებელი.

ავიაკომპანია Wizz Air-მა ქუთაისის საეთაშორისო აეროპორტიდან ოპერირება 2012 წელს დაიწყო. 2016 წლის სექტემბერში ქუთაისის საერთაშორისო აეროპორტში გაიხსნა ავიაკომპანია Wizz Air-ის პირველი ბაზა რეგიონში. 2017 წლის მაისში ქუთაისის საერთაშორისო აეროპორტს Wizz Air-ს მეორე ბაზირებული საჰაერო ხომალდი და ევროპის 5 ყველაზე მოთხოვნადი მიმართულება დაემატა. 2018 წელს Wizz Air-მა ქუთაისის საერთაშორისო აეროპორტის მგზავრთნაკადის 95 % გადაიყვანა ( 587,643 მგზავრი) და საქართველოს ავიაციის ისტორიაში პირველად, Wizz Air ბაზრის ლიდერი გახდა.

ვრცლად ნახვა