ადამ მიცკევიჩის ქუჩა N11

info@oktravel.ge

THRILLIST-მა საქართველო ევროპის საუკეთესო სამზარეულოს მქონე ქვეყნებს შორის დაასახელა

ამერიკულმა ონლაინ-ჟურნალმა thrillist.com-მა ევროპის კონტინენტის 48 ქვეყანა მათი სამზარეულოების მიხედვით დააჯგუფა. საუკეთესო სამზარეულოს მქონე ქვეყნად ვებ-გვერდმა იტალია დაასახელა, მეოთხე ადგილი კი საქართველოს მიაკუთვნა. 
ქვეყნების პირველი ხუთეული ასე გამოიყურება - იტალია, საფრანგეთი, ესპანეთი, საქართველო და გერმანია. 

საქართველოს შესახებ ვებ-გვერდი წერს: 

“საქართველო ევროპის, ახლო აღმოსავლეთისა და აზიის გზაგასაყარზე მდებარეობს. ქართული სამზარეულოს გამორჩეული თავისებურებაა მრავალფეროვანი  სუნელების კომბინაცია, რომელსაც სხვაგან ვერსად ნახავთ. ქართული სამზარეულო გამოირჩევა მკვეთრი, მაგრამ დაბალანსებული გემოებით.” 

ვებ-გვერდის შეფასებით, ქართული სამზარეულოს კულმინაციას ხაჭაპური წარმოადგენს. ასევე გამორჩეული კერძებია ხინკალი, ჩახოხბილი, ტყემალი, ჩაქაფული, კუჭმაჭი და სხვა.

ვრცლად ნახვა
იანვარში ტურისტული ვიზიტების რაოდენობა 5.9 %-ით გაიზარდა

2019 წლის იანვარში საქართველოში ტურისტული ვიზიტების რაოდენობამ 305,939 შეადგინა, რაც 17,061-ით მეტია 2018 წლის იანვრის მაჩვენებელზე (ზრდა 5.9%). ამის შესახებ ინფორმაცია ეკონომიკისა და მდგრადი განვითარების სამინისტროს ტურიზმის ეროვნულ ადმინისტრაციას შინაგან საქმეთა სამინისტრომ მიაწოდა.

მათივე ცნობით, იანვარში საერთაშორისო ვიზიტების რაოდენობა მნიშვნელოვნად გაიზარდა ევროკავშირის ქვეყნებიდან. კერძოდ, პოლონეთი 130.5%, ჩეხეთი 96%, ესპანეთი 65.1%, ლატვია 63.5%, გერმანია 46.6%, ლიეტუვა 40.8% და სხვა. ამასთან, განსაკუთრებული ზრდა დაფიქსირდა შემდეგი ქვეყნებიდან: უზბეკეთი 217.1%, ისრაელი 132.1%, ყირგიზეთი 112%, ჩინეთი 72.8%, საუდის არაბეთი 72.7% და სხვა.

რაც შეეხება ქვეყანაში უცხოური ტურიზმიდან შემოსავალს, 3,2 მილიარდ დოლარს შეადგენს (ზრდა 18.4%), რაც 498 მილიონით მეტია წინა წლის ანალოგიურ მაჩვენებელზე.

ამასთან, 2018 წლის I-III კვარტლის მდგომარეობით, საქართველოში უცხოური ტურიზმიდან შემოსავალი 2,571 მილიონ დოლარს (ზრდა 20.5%) შეადგენს, რაც 437 მილიონით მეტია წინა წლის ანალოგიურ მაჩვენებელზე.

ტურიზმის ეროვნული სააგენტოს ცნობით, 2017 წლის ჯამური მონაცემებით, შემოსავალი უცხოური ტურიზმიდან საქართველოში შეადგენდა 2.7 მილიარდ (2,704,339,872) დოლარს (ზრდა 28.1%), რაც 594 მილიონი დოლარით მეტია წინა წლის ანალოგიურ მაჩვენებელზე.

აღსანიშნავია, რომ 2018 წლის I-III კვარტლის მონაცემებით, მთლიან შიდა პროდუქტში ტურიზმის წილი 7.6%-ს შეადგენს. რაც იმას ნიშნავს, რომ წინა წელთან შედარებით ზრდა 19%-ია. 2017 წლის ჯამური მონაცემებით, მთლიან შიდა პროდუქტში ტურიზმის წილმა 6.8% შეადგინა. ზრდა წინა წლის ანალოგიურ პერიოდთან შედარებით 11.5%-ა.

ვრცლად ნახვა
10 ქვეყანა, საიდანაც საქართველოში ყველაზე მეტი ვიზიტი განხორციელდა

2019 წლის იანვარში საქართველოს საზღვარი 528,678-მა ვიზიტორმა გადმოკვეთა, რაც 2018 წელთან შედარებით 0.1%-ით ნაკლებია. შემცირება ძირითადად თურქეთიდან, აზერბაიჯანიდან და ირანიდან ვიზიტორთა ნაკადის შემცირებას უკავშირდება. 

მათგან, ვინც საქართველოს საზღვარი გადმოკვეთა, ქვეყანაში 24 საათზე მეტი ხნის განმავლობაში 305,939 ადამიანი დარჩა, რაც 2018 წელთან შედარებით 5.9%-ით მეტია. საერთაშორისო კლასიფიკაციის მიხედვით, ტურისტებად სწორედ ის ვიზიტორები უნდა ჩაითვალონ, ვინც ქვეყანაში 24 საათზე მეტი ხნით რჩებიან და ქვეყნის მომსახურების სექტორს (რესტორნები, სასტუმროები და ა.შ.) იყენებენ. 

10 ქვეყანა, საიდანაც ყველაზე მეტი ვიზიტორი შემოდის 

  1. აზერბაიჯანი - 92,341 ვიზიტორი, კლება წინა წელთან მინუს 3.4%;
  2. რუსეთი - 85,922 ვიზიტორი, ზრდა წინა წელთან 16.8%;
  3. სომხეთი - 77,968 ვიზიტორი, კლება წინა წელთან მინუს 5%;
  4. თურქეთი - 64,349 ვიზიტორი, კლება წინა წელთან მინუს 20.2%;
  5. უკრაინა - 10,453 ვიზიტორი, ზრდა წინა წელთან 3.6%;
  6. ირანი - 8,424 ვიზიტორი, ზრდა წინა წელთან 41.2%;
  7. ისრაელი - 7,217 ვიზიტორი, ზრდა წინა წელთან 132.1%;
  8. ყაზახეთი - 3,157 ვიზიტორი, ზრდა წინა წელთან 35.9%;
  9. ფილიპინები - 3,080 ვიზიტორი, ზრდა წინა წელთან 29.8%;
  10. ინდოეთი - 2,830 ვიზიტორი, კლება წინა წელთან 5.9%.

რა შემოსავალი მიიღო საქართველომ ტურიზმიდან? 

იმას თუ რამდენს ხარჯავენ უცხოელები საქართველოში ეროვნული ბანკი ითვლის. სებ-ს იანვრის მონაცემები ჯერ არ გამოუქვეყნებია, თუმცა 2018 წლის მდგომარეობით ქვეყანამ ტურიზმიდან რეკორდული $3.2 მილიარდის შემოსავალი მიიღო. 2018 წელს საქართველოში შემოსული ვიზიტორების რაოდენობამ ისტორიაში პირველად გადააჭარბა 8 მილიონს. 

ტურისტული ინფრასტრუქტურა და სასტუმროები: 

ტურიზმის ეროვნული ადმინისტრაციის მონაცემებით, საქართველოში სულ 2,390 სასტუმროს ტიპის ობიექტია (აქედან: 867 სასტუმროა, 966 საოჯახო სასტუმრო და 557 სხვა ტიპის განთავსების ობიექტი). ამ ობიექტებში ნომრების საერთო რაოდენობა 34,608-ს შეადგენს, ხოლო საწოლების ჯამური რაოდენობა 85,314-ია. ეს ნიშნავს, რომ საქართველოს ტურისტულ სექტორს სრული დატვირთვის პერიოდში ერთდროულად 85,000 ადამიანის მიღება შეუძლია.

ვრცლად ნახვა
იანვარში საქართველოს აეროპორტები 324,554 მგზავრს მოემსახურა - ზრდა 25%-ია

ეკონომიკისა და მდგრადი განვითარების სამინისტროს ,,საქართველოს აეროპორტების გაერთიანების“ ინფორმაციით, 2019 წლის იანვარში, საქართველოს აეროპორტები ჯამში - 324,554 მგზავრს მოემსახურა, რაც 25%-ით აღემატება წინა წლის ანალოგიურ პერიოდს (2018 წელი 259,612 მგზავრი). 

იანვარში მგზავრთნაკადის ზრდა დაფიქსირდა ქვეყნის სამივე საერთაშორისო აეროპორტში: 

თბილისის საერთაშორისო აეროპორტი 2019 წლის იანვარში 252,178 მგზავრს მოემსახურა, რაც 13%-ით მეტია წინა წლის ანალოგიურ პერიოდთან შედარებით (2018 წელი მგზავრი 222,400). 

ქუთაისის საერთაშორისო აეროპორტში მგზავრთნაკადი 2019 წლის იანვარში 112%-ით გაიზარდა და 55,895 მგზავრი შეადგინა (2018 წლის იანვარი 26,345 მგზავრი). 
ზრდის ტენდენცია ნარჩუნდება ბათუმის საერთაშორისო აეროპორტში. 2019 წლის იანვარში ბათუმის ალექსანდრე ქართველის სახელობის საერთაშორისო აეროპორტით 15,973 მგზავრმა ისარგებლა, რაც 52%-ით მეტია შარშანდელ ანალოგიურ პერიოდთან შედარებით (2018 წლის იანვარი 10,504 მგზავრი). 

მგზავრთნაკადის ზრდა დაფიქსირდა ადგილობრივ აეროპორტებშიც. მესტიის თამარ მეფის სახელობის აეროპორტში 2019 წლის იანვარში მგზავრთნაკადი 18%-ით გაიზარდა და 401 მგზავრი შეადგინა. (2018 წლის იანვარი 340 მგზავრი). ამბროლაურის აეროპორტით, რომელიც იანვარში 2 წლის გახდა, გასულ თვეს 107 ადამიანმა ისარგებლა და მგზავრთნაკადი წინა წლის ანალოგიურ პერიოდთან შედარებით 365%-თ გაიზარდა (2018 წლის იანვარი 23 მგზავრი).

ვრცლად ნახვა
ტელეგრაფი საქართველოს აუცილებლად სანახავ ქვეყნებს შორის ასახელებს

ბრიტანულმა ტელეგრაფმა 2019 წლის ტურისტული გზამკვლევი გამოაქვეყნა, რომელშიც, მსოფლიოს 10 ქვეყანა არის შესული. რიგითობის მიხედვით, პირველ ადგილზე უზბეკეთია, მეორეზე - ერიტრეა, მესამეზე კი, პენსილვანიის შტატი და ქალაქი პიცბურგია. სიაში მეოთხე ადგილზე საქართველო იმყოფება. 

სტატიაში საქართველოს შესახებ წერია: 

“ამოუცნობია, თუ რატომ არ სტუმრობს საქართველოს, მსოფლიოს ერთერთ ულამაზეს მხარეს, უფრო მეტი ტურისტი. ადგილობრივთა სტუმართმოყვარეობა, მთიანი რელიეფი, ისტორიული მონასტრები და შესაძლებლობა, გაჰყვე მსოფლიოს უძველესი ღვინის წარმოშობის გზას მხოლოდ რამდენიმე მიზეზია იმისთვის, რომ საქართველო მოინახულოთ. 

გასულ წელს საქართველოში რეკორდული რაოდენობის, 8 მილიონი ვიზიტორი ჩავიდა, იზრდება ფრენების რაოდენობა, მცირე გესთჰაუსები კი, ქვეყნის ყოველ კუთხეში გვხდება. 2019 წლიდან ლონდონის ლუტონის აეროპორტიდან ქუთაისის მიმართულებით პირდაპირი ფრენები დაინიშნება, რაც ნიშნავს, რომ საქართველოს თოვლიან მწვერვალებს, ვენახებით მოფენილ ველებსა და ულამაზეს ქალაქებს უფრო მეტი მნახველი გამოუჩნდება.” 

საქართველო აუცილებლად მოსანახულებელ ადგილთა შორის დაასახელა The New York Times-მაც და AirBnb-იმაც.

ვრცლად ნახვა
ერთ წელიწადში ქუთაისის საერთაშორისო აეროპორტამდე რკინიგზას გაიყვანენ

საქართველოს აეროპორტების გაერთიანების ხელმძღვანელის გიორგი ჩოგოვაძის ინფორმაციით, ქუთაისის საერთაშორისო აეროპორტამდე რკინიგზა ერთ წელიწადში მივა.  მისი თქმით, არსებობს ალტერნატივა, რომლის თანახმადაც რკინიგზა, ტერმინალიდან, დაახლოებით, 600 მეტრის მოშორებით გაივლის. 

ცნობისთვის: ქუთაისის აეროპორტის მიმდებარედ სატრანპორტო კვანძის მშენებლობა, რომელიც ყოფილმა პრემიერ-მინისტრმა გიორგი კვირიკაშვილმა დაანონსა, 2018 წელს უნდა დასრულებულიყო, მაგრამ გასული წლის მაისში კვირიკაშილმა პროექტის დასრულების ვადა კიდევ 1 წლით გადასწია და დასძინა, რომ დაგვიანება პროექტის თავდაპირველი ვარიანტის გადამუშავებამ განაპირობა. 

გარდა ამისა, გიორგი ჩოგოვაძემ ასევე ქუთაისის საერთაშორისო აეროპორტში ახალი ტერმინალის მშენებლობის დასრულებაზეც ისაუბრა, რომელიც ქუთაისის აეროპორტის გამტარუნარიანობას 3-4-ჯერ გაზრდის. 

„შენობის კონსტრუქციული ნაწილი უკვე აშენებულია. ამჟამად სამშენებლო სამუშაოები მეორე ფაზაშია, ვგულისხმობ შენობის შეფუთვას და გადახურვას. მალე დაიწყება მესამე ფაზაც ანუ საინჟინრო სისტემების დაყენება და წლის ბოლოს დასრულდება მეოთხე ფაზა, რომელიც გულისხმობს ავეჯისა და სპეციალური დანადგარების შეტანას, რაც საჭიროა, აეროპორტის ოპერირებისთვის“, - აღნიშნა გიორგი ჩოგოვაძემ. 

ჩოგოვაძის თქმით, 2020 წლისთვის ქუთაისის საერთაშორისო აეროპორტში ძველი და ახალი ტერმინალი გაერთიანდება და შესაბამისად, გაიზრდება გამტარუნარიანობაც. 

„დღეისათვის, ქუთაისის საერთაშორისო აეროპორტში ერთდროულად სამასი მგზავრის გატარების საშუალება გვაქვს და ეს რიცხვი 1200 მგზავრამდე გაიზრდება; ასევე 3-დან 7-მდე გაიზრდება გეითების რაოდენობაც“, - აღნიშნა გიორგი ჩოგოვაძემ.

ვრცლად ნახვა
რა დაგიჯდებათ ფრენა ახალ ევროპულ მიმართულებებზე ქუთაისიდან?

მიმდინარე წლის ზაფხულში ქუთაისის საერთაშორისო აეროპორტს 6 ახალი ევროპული მიმართულება დაემატება.

კერძოდ, საუბარია, ეინდჰოვენის (ამსტერდამი), შარლერუას (ბრიუსელი), ტალინის, კოპენჰაგენის, ბარისა და ბაზელის მიმართულებებზე. ამ მიმართულებებით ფრენებს Wizz Air-ი ქუთაისიდან 1-ლი აგვისტოდან დაიწყებს.

 რა ფასად იქნება შესაძლებელი ამ ახალ მიმართულებებზე ფრენა?

როგორც ამ ეტაპზე კომპანიის ვებგვერდზეა აღნიშნული, ქუთაისი-ეინდჰოვენი-ქუთაისის მიმართულებით, ერთი გზა 85 ლარიდან, დაბრუნება კი 250 ლარის ფარგლებშია შესაძლებელი; ქუთაისი-ბრიუსელი(შარლერუა)-ქუთაისის რეისზე ბილეთის ფასი ერთი გზა 85 ლარიდან იწყება; დასაბრუნებელი ბილეთის ფასი კი 300 ლარამდე აღწევს; ტალინის მიმართულებით ქუთაისიდან გაფრენა დაახლოებით, 70 ლარიდან დაგიჯდებათ, უკან დაბრუნებისას კი ბილეთის ფასი 250 ლარიდან იწყება; კოპენჰაგენის მიმართულებით ერთი გზა 140 ლარიდან იწყება, ქუთაისში დაბრუნებისთვის კი ბილეთის ფასი დაახლოებით, 250 ლარიდან იწყება; ქუთაისი-ბარი-ქუთაისის რეისზე ერთი გზის ფასი 77 ლარიდან, დასაბრუნებელი ბილეთის საფასური კი 300 ლარის ფარგლებშია; რაც შეეხება ბაზელს, აგვისტოში ქუთაისიდან გაფრენა დაახლოებით 85 ლარიდან; ხოლო საქართველოში დაბრუნება - 254 ლარიდან დაგიჯდებათ.

ცნობისთვის, ქუთაისის საერთაშორისო აეროპორტიდან უნგრული დაბალბიუჯეტიანი ავიკომპანია Wizz Air-ი ამ ეტაპზე ევროპის 22 მიმართულებით ასრულებს პირდაპირ, რეგულარულ რეისებს.

 

წყარო: https://www.bpn.ge/article/52638-ra-dagijdebat-prena-axal-evropul-mimartulebebze-kutaisidan/

ვრცლად ნახვა
ქუთაისის აეროპორტიდან 6 ახალი მიმართულება ემატება

ეკონომიკის მინისტრის, გიორგი ქობულიას განცხადებით, გუშინ ხელი მოეწერა ხელშეკრულებას Wizz Air-თან, ახალი მიმართულებებით ფრენების შესახებ, რომელსაც კომპანია 1 აგვისტოდან ევროპის მიმართულებით შეასრულებს. 

„Wizz Air გამყოფს ახალ ბორტს, რომელიც ბაზირებული იქნება საქართველოში და იფრენს ევროპის მიმართულებით. ეს ფრენები იქნება განხორციელებული 2-3 ჯერ კვირაში, ბელგიაში, დანიაში, შვეიცარიაში, ჰოლანდიაში და ბალტიისპირეთში, კერძოდ ტალინში და აგრეთვე ბარი შედის ამ მიმართულებაში. 

ეს გვაძლევს საშუალებას, რომ კიდევ უფრო მეტი ტურისტი მოვიზიდოთ, რომელიც ჩვენ მიგვაჩნია სამიზნე ბაზრებად და საიდანაც მოდის მაღალგადამხდელი ტურისტი, რომელიც ჩვენთვის არის პრიორიტეტული. 

ეს ქართველებისთვისაც არის კარგი. ჩვენი ტურისტიც დიდი სიამოვნებით ისარგებლებენ პირდაპირი რეისებით და იფრენენ ამ საინტეერსო ქალაქებში“-განაცხადა გიორგი ქობულიამ.

1 აგვისტოდან, ქუთაისის აეროპორტს 6 ახალი ევროპული მიმართულება დაემატება. Wizzair ბარის, ბრიუსელის, კოპენჰაგენის, ტალინის, ბაზელის და ეინდჰოვენის მიმართულებებით იფრენს

ვრცლად ნახვა
ქართულ ავიაბაზარზე Ryanair-ის შემოსვლაზე მოლაპარაკებები გრძელდება

საქართველოს მთავრობა ირლანდიურ „ლოუკოსტერ“ Ryanair-თან მოლაპარაკებებს აგრძელებს. როგორც საქართველოს აეროპორტების გაერთიანების ხელმძღვანელმა გიორგი ჩოგოვაძემ "იმედის" ეთერში საუბრისას განაცხადა, მხარეებს შორის მოლაპარაკებების მორიგი რაუნდი თებერვალში შედგება. შეხვედრა ავიაკომპანია Ryanair-ის სათაო ოფისში, ქალაქ დუბლინში შედგება.

შეგახსენებთ, რომ გასული წლის თებერვალში საქართველოში ვიზიტად მყოფმა Ryanair-ისწარმომადგენელმა განაცხადა, რომ  “არ არსებობს მიზეზი, რის გამოც საქართველოში ფრენების დაწყება არ შეგვიძლია“.

აღნიშნული განცხადება Ryanair-ის მარშრუტების განვითარების დირექტორმა ნილ ო'კონერიმ თბილისში რიგით მეთხუთმეტე საერთაშორისო, საავიაციო ფორუმის CONNECT 2018-ის მსვლელობისას გააკეთა.

ვრცლად ნახვა
შენგენის ზონის რომელმა ქვეყნებმა უთხრეს უარი საზღვარზე საქართველოს მოქალაქეებს

შენგენის ზონის ქვეყნებიდან ქართველები ყველაზე ხშირად გერმანიაში მიემგზავრებიან. ამის შესახებ ინფორმაცია შს სამინისტროს 2018 წლის დეკემბრის სტატისტიკაშია მოცემული.

კერძოდ, საანგარიშო პერიოდში გერმანიაში საქართველოს მოქალაქეთა გასვლების რაოდენობა 7 914 იყო. მას მოსდევს იტალია, სადაც 4 039 გამგზავრება ფიქსირდება; მე-3 ადგილზე კი - 3 679 გასვლით პოლონეთია.

სტატისტიკა ჯამში, 29 ქვეყანას მოიცავს და ის ქვეყნებიც არის ნაჩვენები, სადაც საქართველოს მოქალაქეებს საზღვრის გადაკვეთაზე უარი უთხრეს.

აღსანიშნავია, რომ 29 ქვეყნიდან საზღვრის კვეთაზე უარი დეკემბერში მხოლოდ 12 ქვეყნის შემთხვევაში არ ფიქსირდება. ეს ქვეყნებია: ნიდერლანდები, ლიეტუვა, რუმინეთი, პორტუგალია, ბულგარეთი, მალტა, ნორვეგია, ხორვატია, სლოვაკეთი, ფინეთი, ლუქსემბურგი და სლოვენია.

რაც შეეხება უარს, გასული წლის დეკემბერში ყველაზე მეტი - 45 უარი საქართველოს მოქალაქეებმა - იტალიის საზღვრის გადაკვეთაზე მიიღეს; მას მოსდევს კვიპროსი - 34 უარით; მე-3 ადგილზეა ესპანეთი - სადაც 33 საქართველოს მოქალაქეს ეთქვა უარი. ხუთეულში არიან ასევე -საფრანგეთი და პოლონეთი, შესაბამისად, 26 და 24 მოქალაქის გამობრუნებით. ამათ გარდა, საქართველოს მოქალაქეები არ შეუშვეს ასევე - გერმანიამ (16); საბერძნეთმა (16); უნგრეთმა (18); ჩეხეთმა (3); ავსტრიამ (2); ლატვიამ (12); ბელგიამ (4); შვედეთმა (1); შვეიცარიამ (2); დანიამ (2); ესტონეთმა (2) და ისლანდიამ (1).

ვრცლად ნახვა
ნიღბებისა და კოსტუმების მისტიკური სანახაობა-კარნავალი ვენეციაში!

დახვეწილი არქიტექტურა, მისტიკური გარემო, გემოვნებით მოწყობილი ქუჩები, სტუმართმოყვარე ადამიანები, ღია კაფეები, გონდოლები, მტრედები... დიახ, შემდეგი გაჩერება ჩრდილო-აღმოსავლეთ იტალიაში, ვენეტოს რეგიონის დედაქალაქში, მეტსახელად არხების ქალაქში-ვენეციაში გვაქვს. უნიკალური, ინდივიდუალური სტილის მქონე ქალაქის 118 პატარა კუნძული ერთმანეთს ხიდებით უკავშირდება. იუნესკოს მსოფლიო მემკვიდრეობის ძეგლთა სიაში შესული ქალაქი ჭაობიან ვენეციაში მდებარეობს, სწორედ ეს ხდის მას ტურისტებისათვის მიმზიდველ, უნიკალურსა და სასურველ ქალაქად.

 

Image result for venice carnival

 

თებერვლის თვეში ხელოვნების და არქიტექტურული საოცრებების ნამდვილი მუზეუმი დამსვენებლებს, ცნობილი, „ვენეციური კარნავალით“ იზიდავს. ნიღბების და კოსტუმების ეს მისტიკური სანახაობა ყოველწლიურად, დაახლოებით 500 ათას ტურისტს მასპინძლობს. დღესასწაული დასაბამს X საუკუნიდან იღებს და ყოველწლიურად, დიდმარხვის დაწყებამდე, 12 დღის განმავლობაში მიმდინარეობს. თუ ერთხელ მაინც გიოცნებია იმპერატორების და გლადიატორების ეპოქის ხილვაზე, თუ ერთხელ მაინც გიფიქრია, როგორია ბოტიჩელის, კარავაჯოს, რაფაელის, ტიციანის, მოდილიანის განვლილი გზა და უბრალოდ, თუ გაინტერესებს, როგორია საუკუნეების ერთად „შემყრელი“ ვენეციის თებერვლის ცხოვრება, აუცილებლად უნდა დაესწრო კარნავალს. მართლაც ვის აღარ შეხვდებით ამ დროს ვენეციაში - თუ გაგიმართლათ, შეიძლება ლეონარდო და ვინჩისაც კი გადაეყაროთ. ამბობენ, რომ ვენეციის ისტორიაში კარნავალი პირველად 1094 წელს იხსენიება, თუმცა მე-14-მე-15 საუკუნემდე მონაწილეები ნიღბებს არ ირგებდნენ. კარნავალის დღეებში ვენეციის ქუჩებში ყველაზე ხშირად კომედია დელ არტეს პერსონაჟების: პანტალონეს, არლეკინის, კოლომბინას ფორმებში გამოწყობილ ადამიანებს გადაეყრებით. თუმცა, ყველაზე დიდი პოპულარობით, მე-18 საუნუნიდან მოყოლებული მისტიკური ვენეციური კოსტიუმი – ბაუტა სარგებლობს.

Related image

 

ბაუტა ტრადიციული შავი მოსასხამისგან – ტაბაროსა და ნიღბისაგან შედგება. კაცების ნიღაბი თეთრი შეფერილობისაა და ლარვა ჰქვია, რაც თარგმანში მოჩვენებას ნიშნავს. ქალები კი უპირატესობას რუხი ფერის ოვალურ „მორეტას”ანიჭებენ. ასევე ცნობილი ვენეციური ნიღაბია „მედიკო დელა პესტე“ , ეს წაგრძელებული „ნისკარტის“ მქონე ნიღაბი, ყველაზე უცნაური და ცნობილი ნიღაბია, მისი ისტორია უკავშირდება მე-17 საუკუნეში მოღვაწე ფრანგ ექიმს, რომელმაც ნიღაბი სანიტარული და ჰიგიენური ნორმების დაცვის მიზნით მოირგო, ის გამოიყენებოდა სხვადასხვა დაავადების პრევენციისათვის. ნიღაბი, ძირითადად, თეთრია, ამ ნიღაბს ირგებენ როგორც მამაკაცები, ასევე ქალები. შავი ქუდი, შავი მოსასხამი და შავი ხელთათმანებიც შავი ჭირის დროს მომუშავე ექიმების ჩაცმულობას უკავშირდება. კარნავალთან ნიღბების და კოსტიუმების გარდა სხვადასხვა სახის „ხუმრობაც“ ასოცირდება, დაახლოებით ისეთი, როგორიც „საპირველაპრილო ხუმრობაა“.

 

ვისაც დახვეწილი არქიტექტურა და შთამბეჭდავი სანახაობები გიზიდავთ, დროა, სასწრაფოდ დაგეგმოთ დასვენება და სულ მალე, თებერვლის თვეში თავად გაეცნობით ამ უნიკალური დღესასწაულის მუხტს და თავისებურებებს.

 

Related image

ვრცლად ნახვა
სტამბოლის ახალი აეროპორტი სრულად 3 მარტიდან ამოქმედდება

„ათათურქის“ აეროპორტიდან სტამბოლის ახალ აეროპორტში საოპერაციო სისტემის სრულად გადასვლა 3 მარტს დასრულდება. ამის შესახებ თურქეთის აეროპორტების სახელმწიფო ადმინისტრაციის ხელმძღვანელმა ფუნდა ოჯაკმა განაცხადა.

„ჩვენ ვიმედოვნებთ, რომ საბოლოოდ მოვახერხებთ დავასრულოთ გადაბარგება 3 მარტისთვის და ამ პერიოდიდან ყველა საერთაშორისო ფრენა განხორციელდება სტამბოლის ახალი აეროპორტიდან“, - განუცხადა მან ჟურნალისტებს ახალ აეროპორტში Duty Free-ის მეორე ფაზის გახსნისას.

მისი განცხადებით, „ათათურქში“ მხოლოდ სპეციალური და სატვირთო რეისები განხორციელდება, ასევე შენარჩუნდება როგორც საექსპოზიციო აერპორტი.

სტამბოლის ახალი აეროპორტის პირველი ნაწილი 2018 წლის 29 ოქტომბერს გაიხსნა და წლიურად 90 მილიონ პოტენციურ მგზავრს მოემსახურება, მისი მშენებლობის მეორე ფაზის დასრულება კი 2023 წლისთვის იგეგმება, შედეგად კი ეს ციფრი 200 მილიონამდე გაიზრდება.

აეროპორტი ხელს შეუწყობს არაპირდაპირ 1,5 მილიონი ადამიანის დასაქმებას და ფრენებს განახორციელებს 350 მიმართულებით.

ვრცლად ნახვა
იაპონიის დატოვებისას ტურისტებს თანხის გადახდა მოუწევთ

იაპონიის ფინანსთა სამინისტროს ეროვნული საგადასახადო სააგენტოს განცხადებით, ორშაბათიდან ტურისტებისთვის ძალაში ახალი მოსაკრებელი - „საერთაშორისო ტურისტების გადასხდელი“ შედის, რომელის გადახდაც საერთაშორისო მოგზაურებს იაპონიის დატოვებისას მოუწევთ. ის ცნობილია როგორც - "sayonara tax."

მოსაკრებლის ოდენობა 1000 იენი იქნება, რაც დღევანდელი კურსით 13 ამერიკული დოლარის ტოლფასია.

მოსაკრებლის ამოღება მოხდება საავიაციო და სამოგზაურო კომპანიების მხრიდან, ქვეყნიდან ტურისტების გამგზავრებისას. 

 

გადასახადი არ შეეხება იმ უცხოელებს, რომლებიც დეპორტაციას ექვემდებარებიან ან ქვეყანაში მხოლოდ 24 სათით იმყოფებიან. ასევე, 2 წლამდე ბავშვებს და კრუიზში მონაწილე უცხოელებს, რომლთაც მაგალითად, უამინდობის გამო უწევთ თავის შეფარება. მოსაკრებელი შეეხება დიპლომატებსაც და სხვა უცხო ქვეყნის მაღალჩინოსნებს.

როგორც სააგენტოს ვებგევრდზე ვკითხულობთ, გადასახადი მნიშვნელოვნად წაადგება იაპონიის ტურისტული ინფრასტრუქტურის მოწყობას და ამით ის ყველაზე მიმზიდველი ტურისტრული ქვეყანა გახდება.

აღსანიშნავია, რომ იაპონია 2020 წელს ზაფხულის ოლიმპიური თამაშებისთვის ემზადება, საიდანაც ქვეყნის ბიუჯეტში რამდენიმე მილიარდი დოლარის შემოსავალს ელოდებიან.

ვრცლად ნახვა
THE NEW YORK TIMES-ი ბათუმს აუცილებლად სანახავ ადგილად ასახელებს

The New York Times-მა 2019 წლის ტურისტული გზამკვლევი გამოაქვეყნა, რომელშიც, მსოფლიოს 52 ქვეყანა და ქალაქი არის შესული. რიგითობის მიხედვით, პირველ ადგილზე პუერტო რიკოა, მეორეზე - ინდოეთის ჰამპის პროვინცია, მესამეზე კი, კალიფორნიის სანტა-ბარბარას მხარეა. სიაში 38-ე ადგილზე მოხვდა ბათუმიც.

“საქართველოს დედაქალაქ თბილისში გასული ათწლეულის განმავლობაში ტურიზმის ბუმი იყო. თუმცა, ქვეყნის დასავლეთ რეგიონში, შავი ზღვის სანაპიროზე მდებარე ბათუმი, უცხოელ ვიზიტორებს სრულიად განსხვავებულ სანახაობას სთავაზობს. პატარა ქალაქი გარშემორტყმული მთებით და ქვიანი სანაპიროთი, აღმოჩენას წარმოადგენს. ქალაქი რუსეთის, ირანის, თურქეთისა და ისრაელის მოქალაქეთათვის კარგად ცნობილი დასასვენებელი ადგილია, გარდაუვალია ის, რომ ბათუმი დანარჩენი მსოფლიოს ვიზიტორებისთვისაც აღმოჩენა გახდეს,” - წერია სტატიაში.

აუცილებლად მოსანახულებელი ადგილების სიაში ასევე შევიდა კატარის დედაქალაქი დოჰა, მარსელი, ვაიომინგის შტატი, ლოს-ანჯელესი, სენეგალის დედაქალაქი დაკარი, ჰონგ-კონგი, უზბეკეთი, ბულგარეთის ქალაქი პლოვდივი, ირანი და სხვა ადგილები.

ვრცლად ნახვა
ტოპ-3 ლიდერი ავიაკომპანია საქართველოში

საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს მონაცემებით, გასული 2018 წლის განმავლობაში, საქართველოს აეროპორტები ჯამში, 5 033 323 მგზავრს მოემსახურა. მათივე ცნობით, 2017 წელთან შედარებით, მგზავრთნაკადი 23.55%-ით, ხოლო 2016 წელთან შედარებით 77.20%-ით არის გაზრდილი.

კერძოდ, გასული წლის განმავლობაში თბილისის საერთაშორისო აეროპორტი 3 808 619 მგზავრს მოემსახურა, რაც 20.37%-ით (644 480 მგზავრით) მეტია, ვიდრე 2017 წლის მონაცემებით გადაყვანილი მგზავრების რაოდენობა; ბათუმის საერთაშორისო აეროპორტის მეშვეობით 598 891 მგზავრი იქნა გადაყვანილი, რაც 20.83%-ით (103 223 მგზავრით) მეტია 2017 წლის მაჩვენებელზე; ქუთაისის საერთაშორისო აეროპორტში მგზავრთნაკადი 52.37%-ით გაიზარდა. სულ გადაყვანილ იქნა 617 373 მგზავრი - 212 200 მგზავრით მეტი, ვიდრე 2017 წელს.

რაც შეეხება განხორციელებულ რეისებს, 2018 წლის განმავლობაში, საქართველოს აეროპორტებში 3 557-ით მეტი რეისი განხორციელდა. სამგზავრო და სატვირთო რეისების რაოდენობა სულ იყო - 24 536, აქედან რეგულარული რეისების რაოდენობაა 21 519, ხოლო ჩარტერების 3 017. 2017 წელს განხორციელებულ რეისების რაოდენობასთან შედარებით, ზრდა 16.96%-ს შეადგენს.

"რაც შეეხება საქართველოს საავიაციო ბაზარზე მოქმედი ავიაკომპანიების პროცენტულ წილებს, 2018 წლის მონაცემებით, წამყვან პოზიციებზე სამი ავიაკომპანია იმყოფება, ესენია: “Wizz Air”, “Turkish Airlines” და ქართული ავიაკომპანია “Georgian Airways”-ი. სხვაობა სამი ავიაგადამზიდველის მიერ გადაყვანილი მგზავრების რაოდენობას შორის უმნიშვნელოა.

რეგულარული და მრავალჯერადი ჩარტერული რეისებით გადაყვანილი მგზავრების რაოდენობის/პროცენტული წილის მიხედვით პირველი ხუთეული ასე გამოიყურება: ავიაკომპანია Wizz Air – 587 179 მგზავრი 12%; ავიაკომპანია Turkish Airlines – 559 749 მგზავრი 11%; ავიაკომპანია Georgian Airways – 550 831 მგზავრი 11%; ავიაკომპანია Ural Airlines – 294 000 მგზავრი 6%; ავიაკომპანია Fly Dubai – 250 296 მგზავრი 5%; 2018 წლის განმავლობაში 45 069 მგზავრი გადაიყვანა ამავე წელს დაფუძნებულმა ქართულმა ავიაკომპანია Myway Airlines-მა, 20 822 მგზავრის გადაყვანა უზრუნველყო AK Air Georgia-მ, რომელიც ასევე 2018 წელს შეიქმნა და ადგილობრივი რეისების შესრულებითაა დაკავებული.

მათი წილი საავიაციო ბაზარზე ამ ეტაპზე უმნიშვნელოა. Georgian Airways-ის მიერ გადაყვანილი მგზავრების გათვალისწინებით, პროცენტული თანაფარდობა ქართულ და უცხოურ ავიაკომპანიებს შორის ერთი წლის დინამიკაში მცირედით შეიცვალა და თუ 2017 წელს გადაყვანილი მგზავრების 90% უცხოური ავიაკომპანიებზე მოდიოდა, 2018 წელს მათი წილი 2%-ით შემცირდა და შესაბამისად წილობრივი მონაცემები ასე გადანაწილდა: 88% (უცხოური ა/კ) / 12% (ქართული ა/კ),"-აღნიშნულია ინფორმაციაში.

 

ვრცლად ნახვა